Rayapati Family Politics: రాయపాటి వర్సెస్ రాయపాటి- ఇంతకీ ఆ కుటుంబం దారెటు?

Rayapati Ranga Rao: రాయపాటి వ్యవహారం రచ్చకెక్కింది. పార్టీ మారింది రంగారావు మాత్రమేనా, రాయపాటి కుటుంబం కూడానా అనే చర్చ మొదలైంది. రెండు మూడు రోజుల్లో దీనిపై మరింత క్లారిటీ వచ్చే అవకాశముంది. 

రాయపాటి వర్సెస్ రాయపాటి- ఇంతకీ ఆ కుటుంబం దారెటు?

Rayapati Aruna: ఏపీలో రాయపాటి కుటుంబం టీడీపీకి షాకిచ్చింది అంటూ ఇటీవల వార్తలొచ్చాయి. మాజీ ఎంపీ రాయపాటి సాంబశివరావు (Rayapati Sambasiva Rao) తనయుడు రాయపాటి రంగారావు టీడీపీకి గుడ్ బై చెప్పడంతోపాటు తన ఆఫీస్ రూమ్ లో ఉన్న చంద్రబాబు (Chandrababu) ఫొటోని నేలకేసి కొట్టడం, ఆ తర్వాత సీరియస్ కామెంట్స్ చేయడం తెలిసిందే. అయితే ఆ రాజీనామాకు రాయపాటి ఫ్యామిలీ మొత్తాన్ని ముడిపెట్టొద్దంటూ కొత్త వాదన మొదలైంది. 

ఎవరీ రంగారావు..?
రాయపాటి సాంబశివరావు అందరికీ తెలిసిన నేత, మాజీ ఎంపీ. ఆయన తనయుడు రాయపాటి రంగారావు ఎవరు..? ఆయన ఎక్కడినుంచి గెలిచారు..? అనే విషయాలను ఇప్పుడు టీడీపీ సానుభూతి పరులు హైలైట్ చేస్తున్నారు. రాయపాటి రంగారావు ఎవరో కూడా ప్రజలకు తెలియదని, అలాంటి వ్యక్తి టీడీపీని వీడి వెళ్తే దానికి రాద్ధాంతం ఎందుకంటున్నారు ఆ పార్టీ నేతలు. రాయపాటి రంగారావు పార్టీని వీడి వెళ్లినంత మాత్రాన అది షాకింగ్ న్యూస్ అనుకోవడం వైసీపీ, ఆ పార్టీ అనుకూల మీడియా అల్పసంతోషం అని ఎద్దేవా చేశారు. ఈ క్రమంలో అమరావతి రాజధాని ఉద్యమ నాయకురాలు రాయపాటి శైలజ వ్యాఖ్యలు ఆసక్తికరంగా ఉన్నాయి. 

రాయపాటి రంగారావు వ్యాఖ్యలని మేము ఖండిస్తున్నాం. ఆయన వ్యాఖ్యలతో మాకు సంబంధం లేదు. మా రాయపాటి కుటుంబం తెలుగుదేశం వెంటే ఉంది. - రాయపాటి శైలజ#AndhraPradesh #WhyApHatesJagan pic.twitter.com/EBao1KtvYh

— Telugu Desam Party (@JaiTDP) January 13, 2024

రాయపాటి సాంబశివరావు తమ్ముడి కుమార్తె రాయపాటి శైలజ. అమరావతి రాజధాని ఉద్యమ సమయంలో న్యాయస్థానం టు దేవస్థానం అంటూ మొదలు పెట్టిన పాదయాత్రతో ఆమె రాష్ట్రవ్యాప్తంగా అందరికీ పరిచయమయ్యారు. పాదయాత్రలో ముందుండి నడిచిన శైలజ మీడియాలో కూడా ప్రముఖంగా కనిపించారు. ఆమె ఇప్పుడు మళ్లీ మీడియా ముందుకొచ్చారు. రాయపాటి ఫ్యామిలీ టీడీపీకి ఎప్పుడూ దూరం కాలేదని అంటున్నారామె. రాయపాటి రంగారావు టీడీపీ నుంచి బయటకు వెళ్లిపోయినంత మాత్రాన ఆ కుటుంబం అంతా బయటకు వచ్చినట్టు కాదని చెప్పారు. రాయపాటి కుటుంబం టీడీపీతోనే ఉంటుందని, ఫరెవర్ చంద్రబాబుకోసమే పనిచేస్తామని సోషల్ మీడియాలో ఓ వీడియో పోస్ట్ చేశారు శైలజ. ఈ వీడియో ఇప్పుడు వైరల్ గా మారింది. 

రంగారావు కౌంటర్..
రాయపాటి శైలజ వీడియో వైరల్ గా మారడంతో మళ్లీ రంగారావు తెరపైకి వచ్చారు. చంద్రబాబు ఇంటర్నేషనల్ స్మగ్లర్, కరప్షన్ కింగ్ అంటూ మరోసారి సంచలన వ్యాఖ్యలు చేశారు. కుటుంబాల్లో చిచ్చు పెట్టడం చంద్రబాబుకి అలవాటేనన్నారు రంగారావు. విజయవాడలో కేశినేని నాని కుటుంబంలో చిచ్చుపెట్టారని, ఇప్పుడు రాయపాటి కుటుంబంలో చిచ్చు పెట్టడానికి శైలజతో తనపై ఆరోపణలు చేయిస్తున్నారన్నారు. అమరావతి ఉద్యమం పేరుతో ఎంత ఎంత వసూలు చేశారో ముందు రాయపాటి శైలజ చెప్పాలని డిమాండ్ చేశారు. వసూలు చేసిన డబ్బులు ఎవరెవరి బ్యాంక్ అకౌంట్ లోకి వెళ్ళాయో అంతా తనకు తెలుసన్నారు. అసలు రాయపాటి శైలజకు టీడీపీలో సభ్యత్వం ఉందా..? అని ప్రశ్నించారు. చంద్రబాబు వాడుకుని వదిలేస్తారని హెచ్చరించారు. యువగళం పాదయాత్ర అయిపోయిన తర్వాత లోకేష్ డబ్బులు వసూలు చేసే పనిలో పడ్డారని ఆరోపించారు. 

మొత్తమ్మీద మరోసారి రాయపాటి వ్యవహారం రచ్చకెక్కింది. పార్టీ మారింది రంగారావు మాత్రమేనా, రాయపాటి కుటుంబం కూడానా అనే చర్చ మొదలైంది. రెండు మూడు రోజుల్లో దీనిపై మరింత క్లారిటీ వచ్చే అవకాశముంది.