Vanama Raghava Arrest: వనమా రాఘవ అరెస్టు.. కుమారుడిపై ఎమ్మెల్యే వనమా వెంకటేశ్వరరావు లేఖ రాసిన కాసేపట్లోనే..

వనమా రాఘవను పోలీసులు అరెస్టు చేశారు. ప్రస్తుతం ఆయన కొత్తగూడెం పోలీసుల అదుపులో ఉన్నట్టు తెలుస్తోంది.

వనమా రాఘవేంద్రరావు(ఫైల్ ఫొటో)

ఎమ్మెల్యే వనమా వెంకటేశ్వర్రావు.. కుమారుడు వనమా రాఘవేంద్రరావును పోలీసులు అరెస్టు చేశారు. రాఘవేందర్ పై 302,306,307 సెక్షన్ల కింద కేసులు నమోదు చేసినట్టు తెలుస్తోంది. భద్రాద్రి కొత్తగూడెం జిల్లా పాల్వంచలో నాగ రామకృష్ణ అనే వ్యక్తి కుటుంబం ఆత్మహత్యకు సంబంధించిన వ్యవహారంలో.. ఆరోపణలు ఎదుర్కొంటున్నారు. రాఘవేంద్రరావును కొత్తగూడెం పోలీసులు హైదరాబాద్‌లో అరెస్టు చేసినట్టు తెలుస్తోంది.

అయితే బాధితుడు రామకృష్ణ ఆత్మహత్యకు ముందు సెల్ఫీ వీడియో చర్చనీయాంశమైంది. ఈ క్రమంలోనే ఎమ్మెల్యే వనమా వెంకటేశ్వరరావు కొతగూడెం నియోజకవర్గ ప్రజలు లేఖ రాశారు. తనను పాల్వంచ ఘటన ఆవేదనకు గురిచేసిందని పేర్కొన్నారు. తన కుమారుడిపై బాధిత కుటుంబం ఆరోపణలు చేసిందని.. పోలీసులకు పూర్తిగా సహకరిస్తామని చెప్పారు. పోలీసులు విచారణ చేసేందుకు రాఘవను.. అప్పగిస్తామని కూడా చెప్పారు. ఎమ్మెల్యే స్పందించిన కొంత సమయంలోనే.. అతడి కుమారుడు వనమా రాఘవేంద్రరావును అరెస్టు చేశారు కొత్తగూడెం పోలీసులు. హైదరాబాద్ లో అరెస్టు చేసి.. ఆపై అక్కడి నుంచి కొత్తగూడెం తీసుకొచ్చినట్టు సమాచారం. 

అసలు ఏమైందంటే..
కొత్తగూడెం జిల్లాలోని పాల్వంచలో ఈ నెల 3వ తేదీన పాత బజారుకు చెందిన రామకృష్ణ కుటుంబం ఆత్మహత్య చేసుకుంది. రామకృష్ణ, ఆయన భార్య శ్రీలక్ష్మి, కూతుళ్లు, సాహితీ, సాహిత్య బలవన్మరణం చేసుకున్నారు. అయితే తాను చనిపోయేందుకు వనమా రాఘవేంద్రరావే కారణమని ఆత్మహత్యకు ముందు సెల్ఫీ వీడియో తీశారు. ఈ వీడియో ఎక్కువగా వైరల్ అయింది. ఇప్పటికే రామకృష్ణ సూసైడ్​ నోట్​, సెల్​ఫోన్​ను పోలీసులు స్వాధీనం చేసుకున్నారు. తన కోసం పోలీసులు సెర్చ్ చేస్తున్నారని.. తెలిసి.. రాఘవ అజ్ఞాతంలోకి వెళ్లి ముందస్తు బెయిల్​ కోసం ప్రయత్నాలు చేస్తున్నట్టు ప్రచారం కూడా జరిగింది.

సెల్ఫీ వీడియోలో రామకృష్ణ ఏమన్నారంటే..

"కష్టాల్లో ఉన్న నాపై మా అక్క, అమ్మ కక్ష సాధిస్తున్నారు. ఆర్థికంగా చితికిపోయిన నన్ను రోజూ వేధింపులకు గురి చేస్తున్నారు. దీనికి తోడు వనమా రాఘవరావు టార్చర్ మరింత ఎక్కువైంది. ఈ సమస్య తీరాలి అంటే నా భార్యను ఆయన పంపించాలన్నారు. అప్పటి వరకు ఈ సమస్య పరిష్కారం కాదన్నారు. ఎవరి వద్ద చెప్పుకున్నా లాభం లేదన్నారు. చెప్పిన పని చేస్తేనే ఏం కావాలో అది చేస్తారట. రాజకీయ, ఆర్థిక బలుపుతో అవతలి వ్యక్తుల బలహీనతలను గ్రహించి ఆడుకుంటున్నాాడా వ్యక్తి. ఎన్నో కుటుంబాలు ఆయన వల్ల నాశనం అయిపోయాయి. ఈ చీకటి కోణాలకు సాక్ష్యాలు లేవు. ఓ వ్యక్తి సాయం చేయాలంటే తనకు లాభమేంటని చూసుకునే వ్యక్తి రాఘవ. నా సమస్యలో నా భార్యతో లబ్ధి పొందాలనుకున్నారు. వేరే దారి లేక నా భార్య బిడ్డలను రోడ్డున పడేయలేక సూసైడ్‌ నిర్ణయం తీసుకున్నాం. మా నాన్న ఇచ్చిన ఆస్తిలో కొంత భాగాన్ని నాకు సహకరించి అప్లులు ఇచ్చిన వారికి చెల్లించండి. మిగిలినది అమ్మ, అక్కకు వదిలేయండి. మరొకరికి అన్యాయం జరగకుండా చూడండి. "