హైకోర్టును ఆశ్రయించిన బండి సంజయ్‌- పాదయాత్రకు అనుమతి ఇవ్వాలని రిక్వస్ట్

తెలంగాణ బీజేపీ అధ్యక్షుడు బండి సంజయ్ పాదయాత్రకు పోలీసులు నిరాకరించడంతో హైకోర్టును ఆశ్రయించారు. ఆయన పాదయాత్ర చేసుకునేందుకు హైకోర్టు అనుమతి ఇచ్చింది. మధ్యాహ్నం 12 గంటలకు ఈ పిటిషన్‌పై కోర్టులో విచారణకు రానుంది. 

ఐదో విడత పాదయాత్రకు అనుమతి లేదని  చెప్పిన పోలీసులు... నిన్న సాయంత్రం బండి సంజయ్‌ను అడ్డుకున్నారు. బైంసా నుంచి ఐదో విడత పాదయాత్రకు చేపట్టేందుకు ఆయన యత్నించారు. బైంసాలో శాంతి భద్రతలకు విఘాతం కలుగుతుందని భావించిన పోలీసులు పాదయాత్ర అనుమతి నిరాకరించారు. భైంసా వెళ్తున్న ఆయన్ని అడ్డుకొని తిరిగి కరీంనగర్ పంపేశారు. 

పోలీసులు అభ్యంతరం చెప్పి పాదయాత్రకు అనుమతి ఇవ్వకపోవడంపై హైకోర్టులో పిటిషన్ వేశారు. హౌస్ మోషన్ కుదరక పోవడంతో హైకోర్టులో పిటిషన్ దాఖలు చేశారు. ఫస్ట్ కాల్ లిస్ట్‌లో పిటిషన్ మెన్షన్ చేశారు. ఇది మధ్యాహ్నం 12 గంటలకు విచారణకు రానుంది. 

బీజేపీ తెలంగాణ అధ్యక్షుడు బండి సంజయ్‌ కుమార్‌కు ఐదో విడదత పాదయాత్రపై నిన్న రాత్రి నుంచి హైడ్రామా నడుస్తోంది. ఇదివరకే నాలుగు విడతల పాదయాత్ర ముగియగా, ఐదో విడత ప్రజా సంగ్రామ యాత్ర ఇవాళ్టి(నవంబర్ 28) నుంచి ప్రారంభించాలని బండి సంజయ్ అనుకున్నారు. ఆదిలాబాద్ ఎంపీ సోయం బాపూరావు బండి సంజయ్ పాదయాత్రకు ఇటీవల పోలీసుల అనుమతి కోరారు. కానీ పాదయాత్రకు పోలీసులు అనుమతి నిరాకరించారు. శాంతిభద్రతల కారణాల దృష్ట్యా పోలీసులు అనుమతి నిరాకరించినట్లు నిర్మల్‌ జిల్లా ఎస్పీ సురేశ్‌ స్పష్టం చేశారు. ఐదో విడత పాదయాత్రను బండి సంజయ్ బైంసా నుంచి పాదయాత్ర ప్రారంభించి, కరీంనగర్‌లో భారీ సభతో ముగించాలని తొలుత భావించారు. 

ఐదో విడత పాదయాత్రకు పోలీసులు అనుమతి నిరాకరించినా బండి సంజయ్ నిర్మల్ వెళ్తుండగా పోలీసులు అడ్డుకున్నారు. జగిత్యాల దాటాక ఆయన్ని అడ్డుకున్నారు. బండి సంజయ్ వెనక్కి తిరిగి వెళ్లకపోవడంతో జగిత్యాల మండలంలోని తాటిపల్లి వద్ద పోలీసులు బండి సంజయ్ ను అడ్డుకుని అరెస్టు చేసే ప్రయత్నం చేశారు. కార్యకర్తలు, బీజేపీ శ్రేణుల సహాయంతో బండి సంజయ్ పోలీసుల నుంచి తప్పించుకుని కార్యకర్తల వాహనంలో కోరుట్ల వైపు వెళ్లారు. అక్కడ పోలీసులు ఆయనతో మాట్లాడి తిరిగి ఇంటికి పంపించేశారు. పరిస్థితి ఉద్రిక్తతంగా మారడంతో ఆయన తిరిగి కరీంనగర్ వచ్చేశారు. అనుమతి కోసం హైకోర్టును ఆశ్రయించారు.