Exclusive ABP Desam : పద్మ అవార్డులు బీజేపీ ఇస్తోందా? - నా తండ్రిని విమర్శించే అర్హత బండి సంజయ్‌కు లేదు, వెన్నెల గద్దర్ ఇంటర్వ్యూ

Vennela Gaddar: తెలంగాణ ప్రజా యుద్ధ నౌక గద్దర్‌పై కేంద్ర సహాయమంత్రి బండి సంజయ్ చేసిన వ్యాఖ్యలు పెను దుమారం రేపుతున్నాయి. ఈ వ్యాఖ్యలపై గద్దర్ కుమార్తె వెన్నెల గద్దర్ రియాక్షన్..

వెన్నెల గద్దర్‌తో ఏబీపీ ఎక్స్‌క్లూజివ్ ఇంటర్వ్యూ

Source : Whatsapp

ABP Exclusive Interview With Vennela Gaddar: తెలంగాణ ప్రజా గాయకుడు గద్దర్‌కు పద్మ అవార్డు ఇవ్వం, బీజేపీ కార్యకర్తల ప్రాణాలు తీసిన హంతకుడు గద్దర్ అంటూ కేంద్ర సహాయ మంత్రి బండి సంజయ్ చేసిన వ్యాఖ్యలు తీవ్ర దుమారం రేపాయి. ఈ క్రమంలో గద్దర్ కుమార్తె వెన్నెల గద్దర్‌తో ఏబీపీ దేశం మాట్లాడింది. బండి సంజయ్ వ్యాఖ్యలపై ఆమె ఏమంటున్నారంటే.. 

ABP దేశం: మీ తండ్రి గద్దర్ ఓ హంతకుడని బీజేపీ నేత, కేంద్ర మంత్రి బండి సంజయ్ విమర్శించారు, మీరేమంటారు..?

వెన్నెల గద్దర్ - బండి సంజయ్ గారు ఓ మంత్రి హోదాలో ఉంటూ ఈ విధంగా మాట్లాడతారని నేను అనుకోలేదు. నేనే కాదు యావత్ తెలంగాణ, ఆంధ్ర ప్రజలంతా ముక్తకంఠంతో గద్దర్‌పై చేసిన వ్యాఖ్యలను ఖండిస్తున్నారు. చాలామంది ఇష్టమొచ్చినట్లు మాట్లాడుతుంటారు. వారి మాటలను బట్టి వారి విజ్ఞత ఏంటో జనాలకు అర్ధమవుతుంది. అదే బీజేపీ నుంచి ప్రధాని మోదీ గారు, గద్దర్ చనిపోగానే మా కుటుంబ సభ్యులకు ఓ లేఖను పంపారు. గద్దర్‌కు నివాళి తెలుపుతూ మోదీ పంపిన ఆ లేఖలో భారతదేశం ఓ మహాకవిని కోల్పోయింది. తెలంగాణ ఓ ఉద్యమనేతను కోల్పోయింది అంటూ మోదీ కొనియాడాలరు. గద్దర్ సేవలను గుర్తు చేసుకుంటూ ఆయన మాటలు, పాటలతోనూ తెలుగు ప్రజలే కాకుండా , భారతదేశలో ఉన్నవారందరికీ ప్రభావితం చేశారని లేఖలో గద్దర్‌ను పొగిడారు. ఇలా దేశ ప్రధాని, బీజేపీ అగ్ర నేత మోదీ తన తండ్రిని ప్రసంశిస్తూ లేక పంపితే.. మరి సంజయ్ ఎందుకు ఇలా ఇష్టమొచ్చినట్లు మాట్లాడుతున్నారనేది ఆయన విజ్జతకే వదిలేస్తున్నాం. బీజేపీ నేతల మధ్య క్లారిటీ లేదు. 

నా తండ్రి గద్దర్ ఎప్పుడూ ఓ మాట అంటుండేవాళ్లు, ప్రజలు రాజకీయ నాయకులకు సమయం ఇస్తారు. తప్పులు సరిదిద్దుకునేందుకు ఎన్నో అవకాశాలు ఇస్తారు. ఎప్పుడైతే హద్దు దాటుతారో అప్పుడు ప్రజా యుద్దం మొదలవుతుందని అనే వారు. ఆ ప్రజా యుద్దం ఎవరూ తట్టుకోలేరు. ప్రజలే ఆయన మాటలకు గట్టిగా సమాధానం చెబుతారని అనుకుంటున్నాను. 

ABP దేశం: ప్రధాని నరేంద్ర మోదీ మీ తండ్రి సేవలను పొగుడుతుంటే, ఇక్కడ అదే పార్టీలో కేంద్ర మంత్రిగా ఉన్న బండి సంజయ్ మాత్రం తిడుతున్నారు కారణాలేమనుకుంటున్నారు..?

వెన్నుల గద్దర్ - మాకు కుటుంబ సభ్యలు కిషన్ రెడ్డి గారు, బండారు దత్తాత్రేయ గారు. వారితో మా కుటుంబానికి మంచి సత్సంబంధాలున్నాయి. ఇప్పడు విమర్శిస్తున బండి సంజయ్, అప్పుడు మా తండ్రి గద్దర్ బ్రతికున్నప్పుడు ఎందుకు మాట్లాడలేదు.?. ఇప్పుడు ఎందుకు మనిషి బ్రతికి లేనప్పుడు మాట్లడుతున్నారు. గద్దర్ ఇంకా పేద ప్రజల గుండెల్లో , తెలంగాణ ప్రజల గుండెల్లో బ్రతికే ఉన్నాడని మర్చిపోవద్దు. 

ABP దేశం: గద్దర్‌పై బండి సంజయ్‌కు అంతలా వ్యక్తిగత కక్ష ఏమిటి, ఎందుకలా తీవ్రస్దాయిలో విమర్శిస్తారు. పద్మ అవార్డుకు గద్దర్‌కు అర్హత లేదని అంత చులకనగా మాట్లడటం వెనుక కారణలేంటి..?

వెన్నెల గద్దర్ - కేంద్ర మంత్రిగా ఓ బాధ్యత గల పదవిలో ఉన్నప్పుడు మాట్లడే ముందు ఆచితూచి మాట్లాడాలి. ఇలా కనీసం మాట్లాడటం తెలియని వాళ్లకు మంత్రి పదవులు ఎలా దక్కుతాయనేది అర్ధం కాని ప్రశ్నగా ఉంది. బండి సంజయ్ సైతం ఇంగిత జ్జానం లేకుండా ప్రవర్తిస్తున్నారు. బండి సంజయ్ జ్జానం కోల్పోయి మాట్లాడుతున్నారని అనుకుంటున్నారు. పద్మ అవార్డులను ఏ ప్రాతిపదికన ఇస్తున్నారనేది బహిర్గతం చేయాలి. ఈ అవార్డులు బీజేపీ ఇస్తుందా, లేక భారత ప్రభుత్వం ఇస్తుందా బండి సంజయ్ గారు చెప్పాలి. బీజేపీకి నచ్చిన వాళ్లకే అవార్డులు ఇస్తారా.?, లేక ఉత్తమ సేవలందించిన వారికి ఇస్తారా అనేది క్లారిటీ ఇవ్వాలి. ఈ విషయంపై బండి సంజయ్‌కే అవగాహన లేదు. అధిష్టానం మెప్పు కోసమే బండి సంజయ్ ఇలా మాట్లడుతున్నారు. నా తండ్రి గద్దర్‌ను విమర్శిస్తున్నారు. తెలంగాణలో ఇలా తండ్రిని మాట్లడితే చెప్పు తీసుకుని సమాధానం చెబుతుంది. కానీ నేను సహనంతో మాట్లడుతున్నాను. కరీంనగర్ ప్రజలు బండి సంజయ్ కు తగిన సమాధనం చెబుతారు.