GHMC Function Halls: ఇకపై ఆన్ లైన్లో జీహెచ్ఎంసీ ఫంక్షన్ హాళ్లు బుకింగ్స్, ధరలు ఎంతంటే?

 GHMC Hyderabad: బల్దియా ఆధ్వర్యంలోని మల్టీ పర్పస్ ఫంక్షన్ హాళ్ల బుకింగ్స్ ను త్వరలోనే ఆన్ లైన్ లో అందుబాటులోకి తీసుకువస్తున్నారు. 

జీహెచ్ఎంసీ ఫంక్షన్ హాళ్లు బుకింగ్స్

GHMC Function Halls: హైదరాబాద్ లోని బల్దియా ఆధ్వర్యంలో ఉన్న మల్టీ పర్పస్ ఫంక్షన్ హాళ్ల బుకింగ్స్ ను త్వరలో ఆన్ లైన్ ద్వారా అందుబాటులోకి తీసుకురాబోతున్నారు. స్పోర్ట్స్ కాంప్లెక్సుల తరహాలో జీహెచ్ఎంసీ పోర్టల్ ద్వారానే ఫంక్షన్ హాళ్లను బుకింగ్ చేసుకునేందుకు అధికారులు ఏర్పాట్లు చేస్తున్నారు. మాన్యువల్ గా జరుగుతున్న బుకింగ్ లతో నెలలో ఎన్ని రోజులు బుక్ అవుతున్నాయని, ఎంత ఫీజు వసూలు చేస్తున్నారో ఉన్నతాధికారులకు తెలియడం లేదు. మరోవైపు జీహెచ్ఎంసీ ఫంక్షన్ హాళ్లకు సైతం ఇతర ఫంక్షన్ హాళ్ల మాదిరిగా భారీ ఫీజులు వసూళ్లు చేస్తున్నారనే ఫిర్యాదులు వెల్లువెత్తుతున్నాయి. ఈ క్రమంలోనే ఆన్ లైన్ బుకింగ్ సదుపాయం ద్వారా అవకతవకలకు తావుండదని.. పారదర్శకత ఉంటుందని భావించిన అధికారులు ఈ ఏర్పాట్లుకు సిద్ధం అయ్యారు. వచ్చే నెల నుంచి ఇవి అందుబాటులోకి రానున్నాయని జీహెచ్ఎంసీ అధికారులు వివరిస్తున్నారు. పోర్టల్ లో ఫంక్షన్ హాళ్ల అద్దె ధరలు, అందుబాటులో ఉన్నదీ, లేనిదీ తదితర వివరాలు తెలుసుకొని బుక్ చేసుకోవచ్చని పేర్కొన్నారు. 

జీహెచ్ఎంసీలో 25 మల్టీ పర్పస్ ఫంక్షన్ హాళ్లకు రూ.95.70 కోట్లు ముంజూరై ఏళ్లు గడుస్తుండగా... ఇప్పటి వరకు 9 ఫంక్షన్ హాళ్ల నిర్మాణం పూర్తయి వినియోగంలోకి వచ్చినట్లు జీహెచ్ఎంసీ పేర్కొంది. మరో 9 పురోగతిలో ఉన్నాయి. మిగతా ఏడు ఫంక్షన్ హాళ్ల నిర్మాణం చేపట్టాల్సి ఉంది. 

పురోగతిలో ఉన్న ఫంక్షన్ హాళ్లు..

1. హెచ్ఎఫ్ నగర్, రహ్మత్ నగర్
2. అయ్యప్ప క్రీడా మైధానం దగ్గర, వెంగళ్రావునగర్
3. టీఎస్ఐఐసీ కాలనీ, సూరారం
4. వాలీబాల్ కోర్టు దగ్గర, తార్నాక
5. పాటిగడ్డ, బేగంపేట
6. ఆరంభ చౌన్ షిప్, పాపిరెడ్డి కాలనీ
7. గోపన్ పల్లి, గచ్చిబౌలి
8. జమ్మేరాత్ బజార్ అడ్డగుట్ట, సికింద్రాబాద్

నిర్మాణం పూర్తయిన ఫంక్షన్ హాళ్లు

1. బన్సీలాల్ పేట కమ్యూనిటీ హాల్
2. చైతన్య నగర్, పటాన్ చెరు
3. భగత్ సింగ్ నగర్, చింతల్
4. కేపీహెచ్ బీ4 ఫేజ్, భగత్ సింగ్ నగర్, రామాంతపూర్
5. గాంధీ విగ్రహం దగ్గర, చంపాపేట
6. నెహ్రూనగర్ పార్కు, మారేడ్ పల్లి
7. వెస్ట్రన్ హిల్స్, అడ్డగుట్ట
8. సీతాఫల్ మండి, సికింద్రాబాద్

అయితే ఈ మల్లీ పర్పస్ ఫంక్షన్ హాళ్లను పుట్టిన రోజు వేడుకల నుంచి వివిధ రకాల శుభకార్యాలకు అద్దెకు ఇస్తారు. పెద్ద ఫంక్షన్ హాళ్ల ఖర్చులు భరించలేని వారికి సదుపాయం కల్పించాలనే లక్ష్యంతో జీహెచ్ఎంసీ ఈ మల్టీపర్సస్ పఫంక్షన్ హాళ్లను అందుబాటులోకి తెస్తుంది. అయితే రాజకీయ సంబంధమైన, పార్టీలు, మతాలకు సంబంధమైన కార్యక్రమాలను ఈ ఫంక్షన్ హాళ్లలో అనుమతించరు. అలాగే రోజు మొత్తం కాకుండా షిఫ్టుల వారీగా తీసుకునే సదుపాయం ఉంది. అందుకు సగం ఫీజు చెల్లిస్తే సరిపోతుంది. మొదటి షిఫ్టు ఉదయం 7 గంటల నుంచి సాయంత్రం 4 గంటల వరకు. రెండో షిఫ్టు 4.30 నుంచి రాత్రి 11.30 గంటల వరకు. 

హాల్ విస్తీర్ణం బట్టి అద్దెలు..

• 2 వేల చదరపు మీటర్ల వరకు రూ.10,000
• 2001-4000 చదరపు మీటర్ల వరకు రూ.15,000
• 4000 చదరపు మీటర్ల కంటే ఎక్కువ రూ.20,000
• ఈ ధరలతో పాటు 18 శాతం జీఎస్టీ, పారిశుద్ధ్య ఛార్జీల కింద 20 శాతం చెల్లించాల్సి ఉంటుంది.