Moto E32s India Launch: రూ.10 వేలలోపే మోటో కొత్త బడ్జెట్ ఫోన్ - లాంచ్ ఎప్పుడంటే?

ప్రముఖ స్మార్ట్ ఫోన్ బ్రాండ్ మోటొరోలా తన కొత్త ఫోన్ ఈ32ఎస్‌ను ఇటీవలే యూరోప్‌లో లాంచ్ చేసింది. ఈ ఫోన్ రేపు (జూన్ 2వ తేదీ) మనదేశంలో లాంచ్ కానుంది.

మోటో ఈ32ఎస్ స్మార్ట్ ఫోన్ మనదేశంలో లాంచ్ కానుంది. (Image Credits: Motorola)

మోటో ఈ32ఎస్ స్మార్ట్ ఫోన్ మనదేశంలో రేపు (జూన్ 2వ తేదీ) లాంచ్ కానుంది. యూరోప్‌లో ఈ ఫోన్ ఇటీవలే లాంచ్ అయింది. ఆండ్రాయిడ్ 12 ఆపరేటింగ్ సిస్టం, ఫోన్ వెనకవైపు మూడు కెమెరాలు ఇందులో అందించారు. మీడియాటెక్ హీలియో జీ37 ప్రాసెసర్‌పై ఈ ఫోన్ పనిచేయనుంది.

మోటో ఈ32ఎస్ ధర (అంచనా)
యూరోప్‌లో ఈ ఫోన్ ధర 149.99 యూరోల (సుమారు రూ.12,400) నుంచి ప్రారంభం అయింది. ఈ స్మార్ట్ ఫోన్ స్పెసిఫికేషన్లను బట్టి చూస్తే మనదేశంలో రూ.10 వేలలోపే దీని ధర ఉండే అవకాశం ఉంది. మిస్టీ సిల్వర్, స్లేట్ గ్రే రంగుల్లో ఈ ఫోన్ లాంచ్ కానుంది. జియో మార్ట్, రిలయన్స్ డిజిటల్, ఫ్లిప్‌కార్ట్ వంటి ఈ-కామర్స్ ప్లాట్‌ఫాంల్లో ఈ స్మార్ట్ ఫోన్ కొనుగోలు చేయవచ్చు.

మోటో ఈ32ఎస్ స్పెసిఫికేషన్లు
ఆండ్రాయిడ్ 12 ఆధారిత మై యూఎక్స్ ఆపరేటింగ్ సిస్టంపై మోటో ఈ32ఎస్ పనిచేయనుంది. ఇందులో 6.5 అంగుళాల హెచ్‌డీ+ డిస్‌ప్లేను అందించారు. 3 జీబీ ర్యామ్, 4 జీబీ ర్యామ్ ఆప్షన్లు అందుబాటులో ఉన్నాయి. 32 జీబీ, 64 జీబీ స్టోరేజ్ ఆప్షన్లు కూడా అందించారు. స్టోరేజ్‌ను మైక్రో ఎస్‌డీ కార్డు ద్వారా 1 టీబీ వరకు పెంచుకోవచ్చు.

ఇక కెమెరాల విషయానికి వస్తే... ఫోన్ వెనకవైపు మూడు కెమెరాలు ఉన్నాయి. వీటిలో ప్రధాన కెమెరా సామర్థ్యం 16 మెగాపిక్సెల్ కాగా, 2 మెగాపిక్సెల్ మాక్రో షూటర్, 2 మెగాపిక్సెల్ డెప్త్ సెన్సార్ కూడా అందించారు. సెల్ఫీలు, వీడియో కాల్స్ కోసం ముందువైపు 8 మెగాపిక్సెల్ సెన్సార్ ఉంది. మీడియాటెక్ హీలియో జీ37 ప్రాసెసర్‌పై ఈ ఫోన్ పనిచేయనుంది.

ఈ స్మార్ట్ ఫోన్ బ్యాటరీ సామర్థ్యం 5000 ఎంఏహెచ్‌గా ఉంది. 4జీ ఎల్టీఈ, వైఫై, బ్లూటూత్, ఎఫ్ఎం రేడియో, జీపీఎస్/ఏ-జీపీఎస్, యూఎస్‌బీ టైప్-సీ పోర్టు, 3.5 ఎంఎం హెడ్ ఫోన్ జాక్ కూడా ఇందులో ఉన్నాయి. యాక్సెలరో మీటర్, యాంబియంట్ లైట్ సెన్సార్, ప్రాక్సిమిటీ సెన్సార్లు కూడా అందించారు. ఫింగర్ ప్రింట్ సెన్సార్ ఫోన్ పక్కభాగంలో ఉంది. దీని మందం 0.85 సెంటీమీటర్లు కాగా, బరువు 185 గ్రాములుగా ఉంది.