Honor X40i: 17 జీబీ ర్యామ్‌తో 5జీ ఫోన్ - ధర రూ.24 వేలలోపే!

ప్రముఖ స్మార్ట్ ఫోన్ బ్రాండ్ హానర్ తన కొత్త 5జీ ఫోన్‌ను లాంచ్ చేసింది.

హానర్ ఎక్స్40ఐ స్మార్ట్ ఫోన్ లాంచ్ అయింది.

హానర్ ఎక్స్40ఐ స్మార్ట్ ఫోన్ చైనాలో లాంచ్ అయింది. ఈ ఫోన్‌లో మీడియాటెక్ డైమెన్సిటీ 700 ప్రాసెసర్‌ను అందించారు. 50 మెగాపిక్సెల్ కెమెరా, 4000 ఎంఏహెచ్ కెమెరా, 40w ఫాస్ట్ చార్జింగ్‌ వంటి ఫీచర్లు ఈ ఫోన్‌లో ఉన్నాయి. ఆండ్రాయిడ్ 12 ఆపరేటింగ్ సిస్టం కూడా హానర్ ఎక్స్40ఐలో ఉంది.

హానర్ ఎక్స్40ఐ ధర
ఈ స్మార్ట్ ఫోన్‌లో మూడు వేరియంట్లు ఉన్నాయి. వీటిలో ప్రారంభ వేరియంట్ అయిన 8 జీబీ ర్యామ్ + 128 జీబీ స్టోరేజ్ మోడల్ ధర 1,599 యువాన్లుగా (సుమారు రూ.19,000) ఉంది. 8 జీబీ ర్యామ్ + 256 జీబీ స్టోరేజ్ వేరియంట్ ధర 1,799 యువాన్లుగానూ (సుమారు రూ.21,350), 12 జీబీ ర్యామ్ + 256 జీబీ స్టోరేజ్ వేరియంట్ ధర 1,999 యువాన్లుగానూ (సుమారు రూ.23,700) నిర్ణయించారు. బ్లాక్, గ్రీన్, రోజ్, సిల్వర్ కలర్ ఆప్షన్లలో ఈ ఫోన్ కొనుగోలు చేయవచ్చు.

హానర్ ఎక్స్40ఐ స్పెసిఫికేషన్లు
ఆండ్రాయిడ్ 12 ఆధారిత మ్యాజిక్ యూఐ 6.0 ఆపరేటింగ్ సిస్టంపై ఈ ఫోన్ పనిచేయనుంది. 6.7 అంగుళాల ఫుల్ హెచ్‌డీ+ డిస్‌ప్లే ఈ స్మార్ట్ ఫోన్‌లో అందించారు. పంచ్ హోల్ డిస్‌ప్లే, స్క్రీన్ టు బాడీ రేషియో 93.6 శాతంగా ఉంది . 12 జీబీ వరకు ర్యామ్, 256 జీబీ వరకు స్టోరేజ్ అందించారు. ఇందులో 5 జీబీ స్టోరేజ్‌ను వర్చువల్ ర్యామ్‌గా ఉపయోగించుకోవచ్చు. అంటే మొత్తంగా 17 జీబీ ర్యామ్ ఈ ఫోన్‌తో పొందవచ్చన్న మాట.

దీని బ్యాటరీ సామర్థ్యం 4000 ఎంఏహెచ్‌గా ఉంది. 40W ఫాస్ట్ చార్జింగ్‌ను ఈ ఫోన్ సపోర్ట్ చేయనుంది. ఆక్టాకోర్ మీడియాటెక్ డైమెన్సిటీ ప్రాసెసర్‌పై హానర్ ఎక్స్40ఐ స్మార్ట్ ఫోన్ పనిచేయనుంది. 

ఇక కెమెరాల విషయానికి వస్తే... ఫోన్ వెనకవైపు రెండు కెమెరాలు అందించారు. వీటిలో ప్రధాన కెమెరా సామర్థ్యం 50 మెగాపిక్సెల్ కాగా, దీంతోపాటు 2 మెగాపిక్సెల్ డెప్త్ సెన్సార్ కూడా ఉన్నాయి. సెల్ఫీలు, వీడియో కాల్స్ కోసం ముందువైపు 8 మెగాపిక్సెల్ సెన్సార్ అందించారు.

డ్యూయల్ సిమ్, 5జీ, 4జీ, వైఫై, బ్లూటూత్ వీ5.1, బైదు, జీపీఎస్/ఏ-జీపీఎస్, గ్లోనాస్ వంటి కనెక్టివిటీ ఫీచర్లు అందించారు. ఫింగర్ ప్రింట్ సెన్సార్ ఫోన్ పక్క భాగంలో ఉండగా, ఫేస్ అన్‌లాక్ ఫీచర్ కూడా ఇందులో ఉంది. దీని మందం 0.74 సెంటీమీటర్లు కాగా, బరువు 175 గ్రాములుగా ఉంది.