అన్వేషించండి

T20 WC Ind vs Pak: పాక్‌ మ్యాచ్‌ ముందు కోహ్లీసేనకు కపిల్‌ హెచ్చరిక! అలా చేస్తే ఓడిపోయే ప్రమాదం లేకపోలేదు!

దాయాదుల సమరంపై కపిల్‌ దేవ్‌ మాట్లాడాడు. పాక్‌ పోరులో తీసుకోవాల్సిన జాగ్రత్తలు వివరించాడు. ఒత్తిడిని తట్టుకోవడం కీలకమని లేదంటే ఓడిపోయే ప్రమాదం ఉంటుందన్నాడు.

By : ABP Desam | Edited By: Ramakrishna Paladi | Updated at : 24 Oct 2021 12:13 PM (IST)

T20 World Cup 2021 Ind vs Pak: Pakistan Can Win The Match If: Kapil Dev Has Message For Indian Team Ahead Of T20 WC T20 WC Ind vs Pak: పాక్‌ మ్యాచ్‌ ముందు కోహ్లీసేనకు కపిల్‌ హెచ్చరిక! అలా చేస్తే ఓడిపోయే ప్రమాదం లేకపోలేదు!

కపిల్‌ దేవ్‌, విరాట్‌ కోహ్లీ

ఐసీసీ టీ20 ప్రపంచకప్‌లో పాకిస్థాన్‌తో మ్యాచుకు ముందు కపిల్‌దేవ్‌ టీమ్‌ఇండియాను హెచ్చరించాడు. ఒత్తిడిని జయించకపోతే పాకిస్థాన్‌ విజయం సాధించే అవకాశం ఉందని సూచించాడు. కోహ్లీసేన పేపర్‌పై పటిష్ఠంగానే కనిపిస్తున్నా మైదానంలోని పరిస్థితులే జయాపజయాలను నిర్ణయిస్తాయని వెల్లడించాడు. ఏబీపీ న్యూస్‌తో ఆయన ప్రత్యేకంగా మాట్లాడాడు.

ఆదివారం మైదానంలో ఏ జట్టు ఆధిపత్యం సాధిస్తుందని అడగ్గా.. 'మైదానంలో ఇవేవీ పనిచేయవు. రెండు జట్లు ఒత్తిడిలోనే ఉంటాయి. అందుకే ఒత్తిడిని ఎవరు జయిస్తారన్నది ఆసక్తికరం' అని కపిల్‌ అన్నాడు. 'పాకిస్థాన్‌ జట్టు గురించి నాకూ ఎక్కువేం తెలియదు. అయినప్పటికీ టీ20ల్లో వారు ప్రమాదకరమమని చెప్పగలను. తమదైన రోజున వారు ఎవర్నైనా ఓడించగలరు' అని ఆయన పేర్కొన్నాడు.

The world is watching.

Tonight in Dubai, India and Pakistan go toe-to-toe.#INDvPAK | #T20WorldCup pic.twitter.com/NnGtaRzv6d
— T20 World Cup (@T20WorldCup) October 24, 2021

'పేపర్‌పై టీమ్‌ఇండియా బలంగా ఉంది. వారు లయ అందుకుంటారేమో చూడాలి. ఎందుకంటే వారు టోర్నీలో తొలి మ్యాచ్‌ ఆడబోతున్నారు' అని కపిల్‌ చెప్పాడు. పాక్ అనిశ్చితి గురించి గుర్తుచేయగా.. 'రెండు జట్లు ఒకరితో ఒకరు తలపడలేదు. అందుకే కచ్చితంగా అనిశ్చితి ఉంటుంది. భారత్‌ బలంగానే కనిపిస్తోంది. కానీ పాక్‌లో ఊహించని ఆటగాళ్లు ఉన్నారు. ఏదేమైనా భారత్‌ ఆందోళన చెందాల్సిన అవసరం లేదు' అని వెల్లడించాడు. ఒకవేళ ఒత్తిడిని తట్టుకోలేకపోతే మాత్రం టీమ్‌ఇండియాను పాక్‌ ఓడించగలదని అంచనా వేశాడు.