Injury Management Crisis: CoE చుట్టూ ముదురుతున్న వివాదం.. బుమ్రా టెస్ట్ మిస్సింగ్‌పై రచ్చ, జవాబుదారీతనం ఉండాలంటూ అశ్విన్ ఘాటువ్యాఖ్యలు

బెంగళూరులోని సెంటర్ ఆఫ్ ఎక్సలెన్స్ స్పోర్ట్స్ సైన్స్ విభాగం తీరుపై తీవ్ర విమర్శలు వస్తుండగా ఆటగాళ్ల గాయాల నిర్వహణలో జవాబుదారీతనం అవసరమని రవిచంద్రన్ అశ్విన్ విమ‌ర్శించాడు.

వరుణ్ చక్రవర్తి

Source : X/Vikas662005

Former Indian Spinner Highlights Flaws In National Cricket Academy Setup: భారత క్రికెట్ నియంత్రణ మండలి (బీసీసీఐ) ఆధ్వర్యంలోని బెంగళూరు సెంటర్ ఆఫ్ ఎక్సలెన్స్ (సీవోఈ) మరోసారి తీవ్ర వివాదాల్లో చిక్కుకుంది. భారత అగ్రశ్రేణి క్రికెటర్లు తరచూ గాయాల బారిన పడటం, వారు కోలుకోవడానికి నెలల తరబడి సమయం పడుతుండటంపై పెద్ద ఎత్తున విమ‌ర్శ‌లు వెల్లువెత్తుతున్నాయి. సీవోఈ స్పోర్ట్స్ సైన్స్, మెడికల్ టీమ్‌కు జాతీయ సెలెక్షన్ కమిటీకి మధ్య సరైన కమ్యూనికేషన్ లేకపోవడం తాజాగా వెలుగులోకి వచ్చినట్లు తాజా కథనం పేర్కొంది. శ్రీలంకతో జరిగిన టెస్ట్ సిరీస్‌కు జస్ప్రీత్ బుమ్రా అందుబాటులో ఉంటాడని సెలెక్టర్లు మొదట బలంగా భావించారు. అయితే అతడి గాయం తీవ్రత అనుకున్నదానికంటే ఎక్కువని ఆ తర్వాత తెలియడంతో సెలెక్టర్లు విస్మయానికి లోన‌య్యారు. ఈ వ్యవహారం భారత క్రికెట్ వర్గాల్లో తీవ్ర చర్చకు దారితీసింది.

ఎవరికీ బాధ్యత లేదా..?
ఈ మొత్తం పరిణామాలపై భారత మాజీ స్టార్ స్పిన్నర్ రవిచంద్రన్ అశ్విన్ తన యూట్యూబ్ ఛానెల్‌లో తీవ్రంగా విమ‌ర్శించాడు. "టెస్టులు, వన్డేలు, టీ20లకు వేర్వేరు జట్లను ఏర్పాటు చేయాల్సిన సమయం వచ్చింది. ఆటగాళ్ల గాయాల నిర్వహణ విషయంలో ఎక్కడో ఒకచోట కచ్చితంగా జవాబుదారీతనం ఉండాలి. వరుణ్ చక్రవర్తి గత మూడు నాలుగు నెలలుగా ఎన్‌సీఏలోనే ఉన్నాడు. తమిళనాడు ప్రీమియర్ లీగ్ (టీఎన్‌పీఎల్) కోసం అతడికి అనుమతి కావాలని మేము అడిగితే విడుదల చేయలేదు. నెల రోజుల్లో తిరిగి రావాల్సిన వాడు రెండు మూడు నెలల పాటు అక్కడే ఉండిపోయాడు" అని అశ్విన్ అసహనం వ్యక్తం చేశాడు.

ఒలింపిక్ లిఫ్టింగ్‌తో ముప్పు.. 
ఆటగాళ్లు కూడా తమ ఫిట్‌నెస్ శిక్షణ విషయంలో అత్యంత జాగ్రత్తగా ఉండాలని అశ్విన్ పేర్కొన్నాడు. "ఒక ప్లేయర్‌గా మీరు అనుసరిస్తున్న ట్రైనింగ్ పద్ధతి సరైందో కాదో చూసుకోవాలి. మనం సరైన వ్యాయామాలే చేస్తున్నామా అనేది గమనించుకోవాలి. నా కెరీర్‌లో 2015లో నాకు సైడ్ స్ట్రెయిన్ గాయం వచ్చింది, అది కేవలం ఒలింపిక్ లిఫ్టింగ్ చేయడం వల్లే జరిగింది. ఆ గాయం తర్వాత నేను స్నాచింగ్ చేయడం పూర్తిగా ఆపేశాను. ఒలింపిక్ లిఫ్టింగ్‌తో వేగం పెరగవచ్చు, శరీరంలో పవర్ కూడా పెరుగుతుంది. అయితే ఆ తరహా వ్యాయామాలు శరీరాకి సరిపడనప్పుడు ఆటగాడు ఏం చేస్తున్నాడో స్వయంగా ఓ కన్నేసి ఉంచాలి" అని తెలిపాడు.

సమన్వయ లోపంపై బోర్డు గుర్రు..
కీలక సిరీస్‌ల సమయంలో ప్రధాన ఆటగాళ్లు అందుబాటులో ఉండకపోవడం టీమ్ ఇండియా అవకాశాలను ప్ర‌భావితం చేస్తోంది. మెడికల్ టీమ్ ఇచ్చే నివేదికలు, గ్రౌండ్ రియాలిటీకి పొంతన లేకపోవడాన్ని ఉన్నతాధికారులు సీరియస్‌గా తీసుకుంటున్నారు. భవిష్యత్తులో ఆటగాళ్ల రీహాబిలిటేషన్ ప్రక్రియలో పూర్తి పారదర్శకత తీసుకొచ్చేలా ప్రణాళికలు రూపొందిస్తున్నారు.

మరిన్ని చదవండి

28 ఏళ్ల నిరీక్షణకు మీరాబాయి చాను తెర.. వెయిట్‌లిఫ్టింగ్‌లో రజతంతో సరికొత్త చరిత్ర

సంజూను తప్పించిన రాత్రి నిద్రపట్టలేదు.. వైభవ్ కోసం కఠిన నిర్ణయం తీసుకున్నానని చెప్పిన‌ గంభీర్