Asia Cup 2023: మరోసారి దాయాదుల పోరు? - అదే జరిగితే ఫ్యాన్స్‌కు పండుగే!

Asia Cup 2023: నాలుగేండ్ల క్రితం ఇంగ్లాండ్‌లో జరిగిన 2019 వన్డే ప్రపంచకప్  తర్వాత  ఇటీవలే   పదిరోజుల వ్యవధిలో రెండు వన్డేలు ఆడిన  భారత్ - పాకిస్తాన్‌లు వన్డే వరల్డ్ కప్ కంటే ముందే మరో హైఓల్టేజ్  థ్రిల్లర్‌లో పోటీ పడే అవకాశాలున్నాయి.  అన్నీ అనుకూలిస్తే భారత్  - పాక్ ఫైనల్‌ను అభిమానులు మరోసారి చూడొచ్చు.   కానీ  అలా జరగాలంటే  పాకిస్తాన్..   సూపర్ - 4‌లో  శ్రీలంకతో జరిగే మ్యాచ్‌లో తప్పకుండ గెలవాలి. 

పాయింట్ల పట్టిక ఇలా.. 

పాకిస్తాన్‌పై 228 పరుగుల తేడాతో విజయదుందుబి మోగించిన  భారత  జట్టు  మంగళవారం  శ్రీలంకను కూడా 41 పరుగుల తేడాతో ఓడించింది. తద్వారా  రెండు విజయాలతో భారత జట్టు పాయింట్ల పట్టికలో   అగ్రస్థానం దక్కించుకోవడమే గాక ఫైనల్స్‌కు కూడా అర్హత సాధించింది.  ప్రస్తుతం పాయింట్ల పట్టిక ప్రకారం భారత్.. 4 పాయింట్లతో +2.690 నెట్ రన్ రేట్‌తో మెరుగైన స్థితిలో ఉంది.   రెండో స్థానంలో ఉన్న శ్రీలంక రెండు మ్యాచ్‌లు ఆడి ఒకదాంట్లో గెలిచి మరోదాంట్లో ఓడింది.  ఆ జట్టు ఖాతాలో రెండు పాయింట్లు ఉన్నాయి. లంక నెట్ రన్ రేట్ -0.200 గా ఉంది. ఇక మూడో స్థానంలో ఉన్న పాకిస్తాన్ రెండు మ్యాచ్‌లు ఆడి ఒకటి గెలిచి మరోదాంట్లో ఓడి  రెండు పాయింట్లతో లంకతో పాటు సమానంగా ఉన్నా పాక్ నెట్ రన్ రేట్  -1.892లో వెనుకబడింది.  రెండు మ్యాచ్‌లు ఆడి రెండూ ఓడిన బంగ్లాదేశ్ టోర్నీ నుంచి నిష్క్రమించింది. 

భారత్ - పాక్ ఫైనల్  జరగాలంటే.. 

దాయాదుల మధ్య ఫైనల్ పోరు చూడాలంటే  పాకిస్తాన్‌కు  గురువారం శ్రీలంకతో జరిగే మ్యాచ్ అత్యంత కీలకం. ఈ మ్యాచ్‌లో లంకను ఓడిస్తేనే  పాకిస్తాన్  తుదిపోరుకు అర్హత సాధించే అవకాశముంటుంది.  ఒకవేళ  వర్షం వల్ల ఈ మ్యాచ్  జరుగకపోయినా, అర్థాంతరంగా ముగిసినా  అప్పుడు పాకిస్తాన్‌కు  తిప్పలు తప్పవు. 

లంకకూ ఛాన్స్.. 

సూపర్ - 4లో మంగళవారం భారత్‌తో ముగిసిన లోస్కోరింగ్ థ్రిల్లర్‌లో ఓడిన లంకేయులకు ఫైనల్ చేరడానికి మరో అవకాశం ఉంటుంది.  బుధవారం పాకిస్తాన్‌తో జరిగే  పోరులో లంక  గెలిస్తే అప్పుడు   ఆసియా కప్ - 2023 ఫైనల్ భారత్ - శ్రీలంక మధ్య జరుగుతుంది.  వర్షం కారణంగా మ్యాచ్ రద్దు అయినా  నెట్ రన్ రేట్ మెరుగ్గా ఉన్న లంకకే ఫైనల్ చేరే అవకాశాలు ఎక్కువగా ఉంటాయి. 

టాప్ మనమే.. 

వరుసగా మూడు మ్యాచ్‌లలో గెలిచిన భారత జట్టు  ఆసియా కప్ వ్యక్తిగత గణాంకాలలోనూ  టీమిండియా ఆటగాళ్ల ఆధిపత్యం కొనసాగుతోంది.   అత్యధిక పరుగుల జాబితాలో రోహిత్ శర్మ (194)  అగ్రస్థానంలో ఉన్నాడు. తర్వాత నజ్ముల్ హోసేన్ శాంతో (193), బాబర్ ఆజమ్ (178) టాప్ - 3లో ఉన్నారు.  

అత్యధిక వికెట్ల వీరుల జాబితాలో కూడా కుల్‌దీప్ యాదవ్ అగ్రస్థానంలో ఉన్నాడు. నాలుగు మ్యాచ్‌లలో కుల్‌దీప్.. 9 వికెట్లు పడగొట్టాడు.  దునిత్ వెల్లలాగే, హరీస్ రౌఫ్ కూడా 9 వికెట్లతో  కుల్‌దీప్‌తో సమానంగా ఉన్నా బౌలింగ్ సగటు (11.33) భారత  స్పిన్నర్‌కే మెరుగైన  గణాంకాలున్నాయి.