Ashes Series 2023: వీళ్లు దంచారు - వాళ్లు కూల్చారు - రసవత్తరంగా మొదలైన యాషెస్ రణరంగం

ENG vs AUS: ఎడ్జ్‌బాస్టన్ వేదికగా ఇంగ్లాండ్ - ఆస్ట్రేలియా మధ్య జరుగుతున్న తొలి టెస్టులో టాస్ గెలిచి బ్యాటింగ్ చేసిన ఇంగ్లీష్ జట్టు.. దూకుడుకు మారుపేరైన కంగారూలనే కంగారెత్తించింది.

సెంచరీ తర్వాత అభివాదం చేస్తున్న జో రూట్

Source : England Cricket Twitter

Ashes Series 2023: ప్రపంచ క్రికెట్ అభిమానులు ఆసక్తిగా ఎదురుచూస్తున్న యాషెస్ రణరంగానికి అద్భుత ఆరంభం  దక్కింది.  ఎడ్జ్‌బాస్టన్ వేదికగా ఇంగ్లాండ్ - ఆస్ట్రేలియా మధ్య జరుగుతున్న తొలి టెస్టులో టాస్ గెలిచి బ్యాటింగ్ చేసిన ఇంగ్లీష్ జట్టు.. దూకుడుకు మారుపేరైన కంగారూలనే కంగారెత్తించింది.  ఈ క్రమంలో క్రమం తప్పకుండా వికెట్లను కోల్పోయినా ‘బజ్‌బాల్’ దృక్పథాన్ని మాత్రం వీడలేదు.  తొలి రోజు 78 ఓవర్లు మాత్రమే బ్యాటింగ్ చేసిన ఇంగ్లాండ్..8 వికెట్లు కోల్పోయి  393 పరుగుల వద్ద తొలి ఇన్నింగ్స్‌ను డిక్లేర్ చేసింది. ఇంగ్లాండ్ మాజీ సారథి  జో రూట్ (152 బంతుల్లో  118 నాటౌట్,  7 ఫోర్లు, 4 సిక్సర్లు) సెంచరీతో కదం తొక్కాడు.  

మీ దూకుడు.. సాటెవ్వడు.. 

గత ఏడాది కాలంగా తమ దూకుడైన ఆటకు బజ్‌బాల్ అని పేరు పెట్టుకుని  మరీ ప్రత్యర్థులపై వీరవిహారం చేస్తున్న  ఇంగ్లాండ్..  నేడు ఆసీస్‌కూ దాని రుచి చూపించింది.  పాట్ కమిన్స్ వేసిన  ఫస్ట్ బాల్‌నే జాక్ క్రాలీ (73 బంతుల్లో 63, 7 ఫోర్లు)  బౌండరీ  పంపించాడు.  మరో ఓపెనర్ బెన్ డకెట్ (12) విఫలమైనా  క్రాలీ మాత్రం క్రీజులో ఉన్నంతసేపూ  దూకుడుగా ఆడాడు.  ఓలీ పోప్ (44 బంతుల్లో 31, 2 ఫోర్లు) తో కలిసి రెండో వికెట్‌కు  70 పరుగులు  జోడించాడు.  అయితే లంచ్‌కు వెళ్లే ముందు ఇంగ్లాండ్ క్రాలీతో పాటు పోప్ వికెట్లను కోల్పోయింది. 

‘రూట్’ వేశాడు.. 

లంచ్ తర్వాత  ఇంగ్లాండ్ మాజీ సారథి  జో రూట్..  హ్యారీ బ్రూక్ (37 బంతుల్లో 32, 4 ఫోర్లు) తో కలిసి నాలుగో వికెట్‌కు 51 పరుగులు జోడించాడు.  కానీ దురదృష్టవశాత్తూ  బ్రూక్.. నాథన్ లియన్ బౌలింగ్ లో బంతి  వికెట్లను తాకడంతో ఔట్ అయ్యాడు. కెప్టెన్ బెన్ స్టోక్స్ (1) నిరాశపరిచాడు. కానీ  వికెట్ కీపర్ జానీ బెయిర్‌స్టో (78 బంతుల్లో 78, 12 ఫోర్లు) ఇంగ్లాండ్ ను పోటీలోకి తెచ్చాడు. వన్డే తరహా ఆట ఆడిన బెయిర్‌స్టో.. రూట్‌తో కలిసి  ఏడో వికెట్‌కు 121 పరుగులు జోడించారు.    బెయిర్‌‌స్టో తో పాటు రూట్ కూడా అర్థ సెంచరీ పూర్తి చేసుకున్నాడు. 

బెయిర్‌స్టో ను లియాన్.. 62వ ఓవర్లో పెవిలియన్ చేర్చాడు.  ఇటీవలే టెస్టులలో రిటైర్మెంట్ వెనక్కి తీసుకున్న మోయిన్ అలీ (18) ధాటిగా ఆడే క్రమంలో నిష్క్రమించాడు. కానీ రూట్ మాత్రం టెయిలెండర్ల సాయంతో  ఇంగ్లాండ్‌ను ఆదుకున్నాడు. 145 బంతుల్లో సెంచరీ పూర్తి చేసుకున్నాడు. టెస్టులలో రూట్‌కు ఇది 30వ సెంచరీ కావడం గమనార్హం.   స్టువర్ట్ బ్రాడ్ (21 బంతుల్లో  16,  2 ఫోర్లు), ఓలీ రాబిన్సన్ (31 బంతుల్లో 17 నాటౌట్, 2 ఫోర్లు) రూట్ కు అండగా నిలిచి ఇంగ్లాండ్ స్కోరును  393కు చేర్చారు.  

 

💯 reasons to LOVE this man!

A gorgeous hundred, Rooty ❤️

🏴󠁧󠁢󠁥󠁮󠁧󠁿 #ENGvAUS 🇦🇺 | @IGcom pic.twitter.com/KPkLMBV1dF

— England Cricket (@englandcricket) June 16, 2023

షాకింగ్ డిసీషన్.. 

ఇంగ్లాండ్ ఇన్నింగ్స్‌లో 78 ఓవర్ ముగియగానే  స్టోక్స్..  తొలి ఇన్నింగ్స్‌ను డిక్లేర్ చేయడం గమనార్హం. మరో రెండు వికెట్లు చేతిలో ఉన్నా..  రూట్ మంచి టచ్ లో ఉన్నా  స్టోక్స్ ఈ నిర్ణయం తీసుకున్నాడు.  ఫలితం ఏమాత్రం తేడా కొట్టినా  స్టోక్స్‌కు ఇది చేటు తేవడం ఖాయం. ఇంగ్లాండ్ ఇన్నింగ్స్ ముగిసిన తర్వాత ఆస్ట్రేలియా కూడా నాలుగు ఓవర్లు బ్యాటింగ్ చేసింది. పొద్దంతా ఫీల్డింగ్ చేసి  అలిసిపోయి  ఒకటో, రెండు వికెట్లో కోల్పోక పోతారా..? అని ఆశగా ఎదురుచూసిన ఇంగ్లాండ్ బౌలర్లకు ఆసీస్ ఓపెనర్లు ఛాన్స్ ఇవ్వలేదు.  డేవిడ్ వార్నర్ (13 బంతుల్లో  8 నాటౌట్, 2 ఫోర్లు), ఉస్మాన్ ఖవాజా (12 బంతుల్లో 4 నాటౌట్)  లు క్రీజులో ఉన్నారు. తొలి రోజు ఆట ముగిసేసమయానికి ఆసీస్.. 4 ఓవర్లలో వికెట్ నష్టపోకుండా 14 పరుగులు చేసింది.