Mahashivratri 2026: మహాశివరాత్రి రోజు వీళ్లు ఉపవాసం ఉండకూడదు, శివుడికి పూజ చేయకూడదా?

Maha Shivaratri Fasting Rules: మహాశివరాత్రి  పరమేశ్వరుడికి అత్యంత ప్రీతికరమైన రోజు. ఈ రోజు ఉపవాసం, జాగరణ చేస్తారు శివ భక్తులు. అయితే కొందరు ఉపవాసం, జాగరణ నియమాలు పాటించాల్సిన అవసరం లేదు...

Mahashivratri 2026

Source : https://in.pinterest.com/pin/921056561280989451/

Maha Shivaratri Fasting 2026: మహాశివరాత్రి ఫిబ్రవరి 15 ఆదివారం వచ్చింది. ఈ రోజు ఉపవాస సమయంలో నాలుగు గంటల పాటు శివుడిని పూజిస్తారు. అయితే, కొంతమంది ఈ రోజున ఉపవాసం ఉండకూడదు. జాగరణ కూడా చేయకూడదు. 

మహాశివరాత్రి ఉపవాసానికి సంబంధించిన నియమాలు, ఎవరు పాటించాలి? ఎవరు పాటించాల్సిన అవసరం లేదో తెలుసుకోండి.
  
మహాశివరాత్రి ఉపవాసం శివుని ఆరాధనకు అంకితం చేసిన పవిత్రమైన రోజు. ఈ రోజున శివభక్తులు ఉపవాసం ఉండి శివపూజ, రుద్రాభిషేకం, రాత్రి జాగరణలు చేస్తారు. మహాశివరాత్రి ఉపవాసం కోరికలను నెరవేరుస్తుంది,  జీవితంలో ఆనందాన్ని పెంచుతుందని చెబుతారు. అయితే ఉపవాసం ఆచరించే ముందు, దాని నియమాలను పూర్తిగా అర్థం చేసుకోవాలి. మహాశివరాత్రి ఉపవాసం కూడా అందరికీ కాదు. కాబట్టి, మహాశివరాత్రి ఉపవాసాన్ని ఎవరు పాటించాలి, ఎవరు పాటించకూడదు అనేది ముందుగానే తెలుసుకోవడం ముఖ్యం.

గర్భిణీలు , పాలిచ్చే స్త్రీలు 

గర్భిణీలు ,  పాలిచ్చే తల్లులకు అధిక పోషకాలు అవసరం. అందుకే వారు కఠినమైన ఉపవాసాలకు దూరంగా ఉండాలి.  ఎలాగైనా ఉపవాసం ఉండాల్సిందే అనే సెంటిమెంట్ ఉంటే..ముందుగా వైద్యుడిని సంప్రదించండి లేదా కఠినమైన ఉపవాసానికి బదులుగా పండ్లు లేదా ఉప్పు లేని ఆహారాలు తినడం గురించి ఆలోచించండి.
 
అనారోగ్యంతో బాధపడేవారు

తీవ్రమైన అనారోగ్యాలతో బాధపడేవారు, మధుమేహం, రక్తపోటు, గుండె జబ్బులు, మూత్రపిండాల వ్యాధి లేదా ఏదైనా ఇతర తీవ్రమైన అనారోగ్యం ఉన్నవారు ఉపవాసం ఉండకూడదు. మీరు మహాశివరాత్రి ఉపవాసం ఉంటే, ముందుగా వైద్యుడిని సంప్రదించండి.

వృద్ధులు ఉపావసం ఉండకూడదు

ఎంత ఆరోగ్యంగా ఉన్నాం అనుకున్నా.. వయసు పైబడిన తర్వాత శరీరంలో శక్తి తగ్గుతుంది. సరైన సమయానికి నిద్ర, ఆహారం అవసరం అవుతుంది. ఇలాంటప్పుడు వృద్ధులు ఉపవాసం ఉండడం వల్ల మరిన్ని అనారోగ్య సమస్యలను ఆహ్వానించినట్టు అవుతుంది. సెంటిమెంట్ పాలో అవాల్సిందే అనుకుంటే రోజంతా ఉపవాసం కాకుండా ఒకపూట భోజనం చేసి లింగోద్భవ సమయం వరకూ జాగరణ చేయండి

ఋతుస్రావం

స్త్రీలు ఋతుస్రావంలో ఉంటే మహాశివరాత్రి రోజు ఉపవాసం, జాగరణ చేయకూడదు. ఋతుస్రావం సమయంలో చేసే ఉపవాసం, జాగరణ ఫలితాలన్నివ్వదు. నాలుగు రాత్రులు పూర్తై..ఐదో రోజు స్నానం ఆచరించినవారు మహాశివరాత్రి ఉపవాసం, జాగరణ చేయొచ్చు.  

శివారాధన చేస్తే చాలు

ప్రతికూల పరిస్థితుల వల్ల లేదా ఆరోగ్య కారణాల వల్ల ఎవరైనా ఉపవాసం ఉండలేకపోతే, వారు మహా శివరాత్రి రోజు వేకువజామునే నిద్రలేచి స్నానమాచరించి శివుడిని పూజించడం, మంత్రాలు జపించడం, శివయ్యకు అభిషేకం చేయడం, దానధర్మాలు చేయడం, సాత్విక ఆహారం తీసుకోవడం, శివాలయానికి వెళ్లి దర్శనం చేసుకుని రావడం ద్వారా  శివుని ఆశీర్వాదం పొందగలరని శాస్త్రాల్లో ఉంది

శివోపాసన మంత్రం  

నిధపతయే నమః నిధనపతాంతికాయ నమః
ఊర్ధ్వాయ నమః ఊర్ధ్వలింగాయ నమః
హిరణ్యాయ నమః హిరణ్యలింగాయ నమః
సువర్ణాయ నమః సువర్ణలింగాయ నమః
దివ్యాయ నమః దివ్యలింగాయ నమః
భవాయ నమః భవలింగాయ నమః
శర్వాయ నమః శర్వ్ల్లలింగాయ నమః
శివాయ నమః శివలింగాయ నమః
జ్వలాయ నమః జ్వలలింగాయ నమః
ఆత్మాయ నమః ఆత్మలింగాయ నమః
పరమాయ నమః పరమలింగాయ నమః

 గమనిక: ఇక్కడ అందించిన సమాచారం కేవలం నమ్మకాలపై ఆధారపడి ఉంటుంది. పండితులు చెప్పిన వివరాలు, పంచాంగం నుంచి సేకరించి అందించిన వివరాలు ఇవి. వీటిని ఎంతవరకూ పరిగణలోకి తీసుకోవాలన్నది పూర్తిగా మీ వ్యక్తిగతం. ఏదైనా సమాచారం లేదా నమ్మకాన్ని అమలు చేయడానికి ముందు సంబంధిత నిపుణుడిని సంప్రదించండి.

మరిన్ని చదవండి

కాశీ నుంచి కేదార్‌నాథ్ వరకు ఈ శివాలయాల్లో శివలింగాన్ని తాకడానికి వీల్లేదు! ఎందుకో తెలుసా?

కుంభ రాశిలో కుజుడి సంచారం! ఫిబ్రవరి 23 నుంచి ఈ 3 రాశుల వారికి ధన లాభం!