Dhanteras 2024: ధన త్రయోదశి రోజు ఈ వస్తువులు అస్సలు కొనకండి ..దురదృష్టం వెంటాడుతుంది!

Dhana Trayodashi 2024: ధన త్రయోదశి రోజు బంగారం, వెండి ఆభరణాలు కొనుగోలు చేసి శ్రీ మహాలక్ష్మీదేవిని పూజిస్తారు. అయితే బంగారం వెండి కొనకపోయినా కొన్ని వస్తువులు అస్సలు కొనద్దని సూచిస్తున్నారు పండితులు.

Dhanteras 2024 (Image Credit: Freepik)

Source : Freepik

Dhanteras 2024:  హిందువుల అత్యంత పవిత్రమైన పండుగలలో ధనత్రయోదశి ఒకటి. ఈ రోజు నుంచి దీపావళి సందడి మొదలవుతుంది. ప్రతి లోగిలిలో ఈ రోజు నుంచి దీపాలు కళకళలాడిపోతాయి. ఆశ్వయుజమాసం అమావాస్య ముందు వచ్చే త్రయోదశి ( అక్టోబరు 30) ధన త్రయోదశి. ఈ రోజు బంగారం, వెండి ఆభరణాలు కొనుగోలు చేయడం సెంటిమెంట్ గా భావిస్తారు. ఆభరణాలను అమ్మవారి వద్ద ఉంచి పూజ చేస్తారు. ఆరోగ్యానికి, ఆయుర్వేదానికి అధిపతి అయిన ధన్వంతరిని, శ్రీ మహాలక్ష్మిని, కుబేరుడిని పూజిస్తారు. ఈ రోజు బంగారం , వెండి ఆభరణాలతో శ్రీ మహాలక్ష్మి పూజ చేస్తే ఐశ్వర్యం కలిసొస్తుందని విశ్వాసం. వీటితో పాటూ శ్రీయంత్రం, దక్షిణావర్తి శంఖం, కొత్తిమీర విత్తనాలు కూడా పూజలో పెడతారు. అయితే ఏం తీసుకొచ్చినా లేకపోయినా..కొన్ని వస్తువులు అస్సలు కొనుగోలు చేయకూడదు. అవేంటో తెలుసుకుందాం...

ఇనుము వస్తువులు

ఇనుముని శనికి సూచనగా చెబుతారు. అందుకే శ్రీ మహాలక్ష్మిని ఆరాధించే ఈ రోజు ఇనుము వస్తువులు అస్సలు కొనుగోలు చేయకూడదు. ఇనుము మాత్రమే కాదు.. స్టీలు, అల్యూమినియం పాత్రలు కూడా కొనకూడదు. ఈ రోజు మట్టి పాత్రలు కొనుగోలు చేసి ఇంటికి తీసుకొస్తే అంతా మంచే జరుగుతుంది.  

నలుపు, నీలం రంగు వస్త్రాలు, వస్తువులు 
 
పసుపు శుభానికి సూచన అయితే నలుపు అశుభానికి సూచన. పైగా నలుపు, నీలం రంగులను శనికి చిహ్నంగా భావిస్తారు. అందుకే అత్యంత శుభప్రదమైన ధనత్రయోదశి రోజు నలుపు, నీలం రంగు వస్తువులు, వస్త్రాలు కొనుగోలు చేయకూడదు. జంతువుల తోలుతో తయారు చేసిన వస్తువులు కూడా కొనుగోలు చేయొద్దు. చెప్పులు , షూస్ కొనొద్దు

గాజు/ప్లాస్టిక్ వస్తువులు

ఇంటి అలంకారంలో భాగంగా చాలామంది గాజు సామగ్రి కొంటారు. కానీ శ్రీ మహాలక్ష్మిని పూజించే ఈ రోజు గాజు సామగ్రి కొనుగోలు చేస్తే కుటుంబంలో సుఖ శాంతులు నశిస్తాయంటారు పండితులు. అందుకే అలంకరణ కోసం కూడా గాజు సామగ్రి ఈ రోజు కొనొద్దు. ప్లాస్టిక్ వస్తువులకు కూడా దూరంగా ఉండండి. కేవలం మట్టి వస్తువులే కొనుగోలు చేయండి. మట్టి కుండను కొనుగోలు చేస్తే ఖాళీగా తీసుకురావొద్దు..వాటిలో బియ్యం, గోధుమలు లాంటివి పెట్టి లోనికి తీసుకురండి

చాకు, కత్తెర

ధన త్రయోదశి రోజు పదునైన వస్తువులు..కత్తులు, చాకులు, సూదులు లాంటి పదునైన వస్తువులు అస్సలు కొనుగోలు చేయకూడదు. ఇలా చేస్తే నెగిటివ్ ఎనర్జీని ఏరికోరి తెచ్చుకున్నట్టే..
 
బంగారం, వెండి కాకుండా...

ధన త్రయోదశి రోజు బంగారం, వెండి ఆభరణాలు కొంటారు..వాటిని కొనుగోలు చేసే శక్తి లేకపోతే ఆగిపోండి..కానీ.. సాధారణ ఆభరణాలు కొనుగోలు చేయొద్దు. అవి కూడ ఇనుముతో సమానమే..అలాంటి వస్తువులు కొనుగోలు చేసి తీసుకొచ్చే ఇబ్బందులు తప్పవు.