Ashada Masam 2022: ఆషాఢం మాసంలో కొత్త దంపతులను ఎందుకు దూరంగా ఉంచుతారు!

జూన్ 30 నుంచి ఆషాడమాసం ప్రారంభమైంది. ఇప్పటికే కొత్త పెళ్లికూతుర్లంతా అత్తింటి నుంచి పుట్టింటికి చేరుకున్నట్టే. ఏటా ఆషాడ మాసంలో నూతన దంపతులకు ఎందుకీ ఎడబాటు?. దీనివెనుకున్న అసలు కారణం ఏంటి?

Ashada Masam 2022

చాంద్రమానాన్ని అనుసరించి భారతీయ జ్యోతిష్య పండితులు ప్రత్యేకమైన వైజ్ఞానిక ధర్మాల ఆధారంగా ప్రతి నెలలో పౌర్ణమి రోజు వచ్చే నక్షత్రం ఆధారంగా ఆ మాసానికి కొన్ని పేర్లు నిర్ణయించారు. పూర్వాషాడ, ఉత్తరాషాడ నక్షత్రం పౌర్ణమి రోజున వచ్చిన మాసానికి ఆషాడ మాసం అని పిలుస్తారు. ఈ నెల ప్రారంభం కాగానే కొత్తగా పెళ్లై అత్తవారింటికి వెళ్లిన అమ్మాయిని పుట్టింటికి తీసుకొచ్చేస్తారు. పైగా ఆ నెలలో రోజులు అత్తా కోడలు, అత్తా అల్లుడు ఒకే ఇంట్లో ఉండకూడదని కూడా అంటారు. ఎందుకిలా చేస్తారు? కారణాలేంటి...

ఆషాడ మాసంలో నెలతప్పితే సరిగ్గా ఎండలు ముదిరే సమయంలో ప్రసవం అవుతారు. మార్చి నుంచి మే లోగా డెలివరీ ఉంటుంది. అప్పుడే పుట్టిన శిశువుకు ఈ వేడివాతావరణం బాగా ఇబ్బంది కలిగిస్తుంది. శిశువు ఆరోగ్యం మీద ప్రభావం చూపిస్తుంది. తల్లి ఆరోగ్యం కూడా దెబ్బతింటుంది. ఇది తల్లీబిడ్డల ఆరోగ్యానికి ఏ మాత్రం శ్రేయస్కరం కాదు. అందుకే ఈ నెల రోజులూ నూతన వధూ వరులను దూరంగా ఉంచే సంప్రదాయం తీసుకొచ్చారు. తిరిగి శ్రావణమాసంలో భర్త వద్దకు పంపించిన తర్వాత అమ్మాయి నెల తప్పినా వాతావరణంలో వేడి తీవ్రత తగ్గేసరికి ప్రసవం ఉంటుందని. అందుకే నూతన వధూవరులను ఈ నెలలో దూరంగా ఉంచే సంప్రదాయం తీసుకొచ్చారు. 

ఆషాఢమాసంలో వానలు జోరందుకుంటాయి. ఇంట్లో అందరూ వ్యవసాయ పనులపై పొలాలకు వెళ్లినా..కొత్తగా పెళ్లైన జంట ఇల్లు కదలేందుకు అస్సలు ఆసక్తి చూపించరు. అప్పట్లో ఇంట్లో అందరూ కలసి వ్యవసాయ పనులు చేసుకునే వారు. అలాంటప్పుడు ఒక్కరు లేకపోయినా పనులు సరిగా ముుందుకు సాగవు. అందుకే కోడలిని పుట్టింటికి పంపించేసి ఆ నెల రోజులూ వ్యవసాయ పనుల్లో మునిగితేలుతారు. కొత్త అల్లుడు అత్తవారింటి గడప తొక్కకూడదన్న సంప్రదాయం కూడా ఇందుకే వచ్చిందంటారు. 

పైగా కొత్తగా పెళ్లై అత్తవారింట్లో అడుగుపెట్టిన ఆడపిల్ల ఒక్కసారిగా తల్లిదండ్రులను వదిలేసి ఉండాలన్నా ఇబ్బంది పడతారు. ఇప్పుడంటే పెళ్లికి ముందే పరిచయాలు, స్నేహాలు , రాకపోకలు సాగుతున్నాయి కానీ అప్పట్లో పెళ్లైన తర్వాతే తొలిసారి అత్తవారింట్లో అడుగుపెట్టేవారు. కొత్త కుటుంబంలో తనని తాను అడ్జెస్ట్ చేసుకునేందుకు సమయం పడుతుంది. చిన్న చిన్న సందేహాలను ఎవర్ని అడగితే ఏమనుకుంటారో అనే బిడియం ఉంటుంది. అలాంటప్పుడు అక్కడి వాతావరణాన్ని ఒ్కకసారిగా అంగీకరించే పరిస్థితులు ఉండవు. అందుకే అత్తింట్లో కొన్ని రోజులు ఉండి ఆషాడమాసం రాగానే పుట్టింటికి వెళ్లడం ద్వారా ఈ నెల రోజులూ తనని తాను ప్రిపేర్ చేసుకోవడంతో పాటూ, అక్కడ ఎలా ఉండాలో-సంసారాన్ని ఎలా తీర్చిదిద్దుకోవాలో తల్లిదండ్రుల నుంచి తగిన సలహాలు, సూచనలు తీసుకునే అవకాశం వస్తుందంటారు పెద్దలు.