TVK Vijay Risk: దినదినగండం ..నూరేళ్ల ఆయుష్షు -విజయ్ సర్కార్‌కు ఇదే పరిస్థితి - హీరో నెట్టుకురాగలరా?
TVK Vijay: విజయ్ రాజకీయాల్లో ఎవరూ ఎదుర్కోని అత్యంత క్లిష్ట పరిస్థితుల్లో ప్రభుత్వాన్ని ఏర్పాటు చేయబోతున్నారు. ఒకరిద్దరు ఎమ్మెల్యేలు అలిగినా ప్రభుత్వం రిస్క్‌లో పడిపోతుంది.
TVK Vijay government: తమిళనాడు రాజకీయాల్లో విజయ్ తన తమిళగ వెట్రి కళగం ద్వారా కోట్లాది మంది అభిమానుల ఆశలను మోస్తూ ముఖ్యమంత్రి పీఠం దిశగా అడుగులు వేశారు. అయితే, ఈ పట్టాభిషేకం పూలబాట కాదు.. ముళ్లబాట . దశాబ్దాల ద్రవిడ రాజకీయాల చరిత్రలో ఎన్నడూ లేని విధంగా అత్యంత క్లిష్టమైన, అస్థిరమైన సమీకరణాల మధ్య విజయ్ బాధ్యతలు చేపట్టబోతున్నారు. 118 మంది ఎమ్మెల్యేల మద్దతుతో మేజిక్ ఫిగర్‌ను అతి కష్టమ్మీద చేరుకున్న విజయ్ సర్కార్‌కు దినదినగండం.. నూరేళ్ల ఆయుష్షు అన్న సామెత అక్షరాలా సరిపోతుంది.
విజయ్ నేతృత్వంలోని ప్రభుత్వానికి ఉన్న ప్రధాన బలహీనత సంఖ్యాబలం . మ్యాజిక్ ఫిగర్‌కు కేవలం ఒకటి లేదా రెండు స్థానాల దూరంలోనే నిలబడటం అంటే, ఐదేళ్ల కాలం పాటు ప్రతి నిమిషం గండం గడిచినట్లే. ప్రజాస్వామ్యంలో సంఖ్యాబలం ప్రాణవాయువు వంటిది. ఒకరిద్దరు ఎమ్మెల్యేలు అలిగినా, లేదా అసంతృప్తితో రాజీనామా చేసినా ప్రభుత్వం కుప్పకూలే ప్రమాదం పొంచి ఉంది. ఇక్కడ ఒక స్వతంత్ర అభ్యర్థి లేదా చిన్న పార్టీ నేత కూడా కింగ్ మేకర్ పాత్ర పోషించే అవకాశం ఉండటంతో, వారిని బుజ్జగించడానికే విజయ్ తన శక్తిని ఎక్కువగా ఖర్చు చేయాల్సి ఉంటుంది.
మిత్రపక్షాల రిమోట్ రాజకీయం
విజయ్ ప్రభుత్వానికి మద్దతు ఇస్తున్న కాంగ్రెస్, లెఫ్ట్ పార్టీలు, వీసీకేలు ఇప్పటికీ డీఎంకే కూటమిలో అంతర్భాగమేనన్నది జగమెరిగిన సత్యం. స్టాలిన్ మౌన సమ్మతి తోనే ఈ మద్దతు లభించినట్లు స్పష్టమవుతోంది. దీనివల్ల విజయ్ ప్రభుత్వం మనుగడ సాగించాలంటే ప్రతి నిర్ణయంలోనూ మిత్రపక్షాల ఆశయాలకంటే, వారిని నడిపిస్తున్న అదృశ్య హస్తం వ్యూహాలకు అనుగుణంగా నడుచుకోవాల్సి ఉంటుంది. తన సొంత రాజకీయ ఎజెండాను అమలు చేయాలనుకున్నప్పుడు మిత్రపక్షాల నుంచి వ్యతిరేకత వస్తే, దానిని ఎదుర్కోవడం విజయ్‌కు అగ్నిపరీక్షే.
పరిపాలనా దక్షత Vs సినిమా గ్లామర్
సినిమాల్లో హీరోగా విలన్లను చిటికెలో మట్టికరిపించడం సులభం, కానీ రాజకీయాల్లో అసలైన విలన్లు వ్యవస్థలోని లొసుగులు , ప్రతిపక్షాల వ్యూహాలు. విజయ్‌కు పరిపాలనా అనుభవం శూన్యం. ఒక సుస్థిరమైన బహుమతం లేని ప్రభుత్వంపై ఐఏఎస్ అధికారులు, సీనియర్ రాజకీయ నాయకులు పెత్తనం చెలాయించే అవకాశం ఉంది. సంకీర్ణ ప్రభుత్వంలో శాఖల కేటాయింపు నుంచి నిధుల విడుదల వరకు ప్రతి అడుగులోనూ మిత్రపక్షాల ఒత్తిడి ఉంటుంది. ఈ ఒత్తిళ్లను తట్టుకుంటూ ప్రజలకు ఇచ్చిన హామీలను నెరవేర్చడం విజయ్‌కు సాధ్యమేనా అన్నది అసలు ప్రశ్న.
రాజకీయాలు అంటే కేవలం గెలవడం మాత్రమే కాదు!
తమిళనాడులో అన్నాడీఎంకే, డీఎంకే వంటి బలమైన ప్రతిపక్షాలు ఉన్నాయి. ఏ చిన్న అవకాశం దొరికినా ఈ చిన్నపాటి మెజార్టీ ఉన్న ప్రభుత్వాన్ని పడగొట్టేందుకు అవి వెనుకాడవు. అసంతృప్త ఎమ్మెల్యేలను ఆకర్షించడం ద్వారా ప్రభుత్వాన్ని అస్థిరపరిచేందుకు శక్తులు నిరంతరం కాచుకుని ఉంటాయి. ఈ వేట నుంచి తన ఎమ్మెల్యేలను కాపాడుకోవడం విజయ్‌కు నిత్యకృత్యంగా మారనుంది. రాజకీయాలు అంటే కేవలం గెలవడం మాత్రమే కాదు, గెలిచిన పీఠాన్ని కాపాడుకోవడం కూడా. విజయ్ ముందున్నది ఐదేళ్ల సుదీర్ఘ ప్రయాణం. ఆయన కేవలం ఒక నటుడు అనే ముద్రను చెరిపేసి, ఒక ముదురు రాజకీయవేత్త గా మారాల్సి ఉంటుంది. మిత్రపక్షాలను సమన్వయం చేసుకుంటూ, ప్రతిపక్షాల ఎత్తులను చిత్తు చేస్తూ, ప్రజల నమ్మకాన్ని నిలబెట్టుకోవాలంటే ఆయనకు అసాధారణమైన సహనం, వ్యూహాత్మక చతురత అవసరం. విజయ్ ఈ రాజకీయ చదరంగంలో రాజ గా నిలుస్తారా లేక కేవలం ఒక పావు గా మిగిలిపోతారా అన్నది కాలమే నిర్ణయించాలి. ఏది ఏమైనా, విజయ్ సర్కార్ ప్రయాణం మాత్రం ఉత్కంఠభరితంగా ఉండబోతోంది.
టాప్ హెడ్ లైన్స్
ట్రెండింగ్ వార్తలు
