TDP MLC Seats Competition: టీడీపీలో ఎమ్మెల్సీ సీట్ల ఉత్కంఠ - రెండు ఖాళీలకు భారీ పోటీ.. చంద్రబాబు మార్క్ సామాజిక సమీకరణాలు వర్కవుట్ అయ్యేనా?
TDP MLC Candidates Selection: ఆంధ్రప్రదేశ్ టీడీపీలో రెండు ఎమ్మెల్సీ సీట్లకు పెరిగిన పోటీ. సీఎం చంద్రబాబు నాయుడు ఎవరికి ఛాన్స్ ఇస్తారు? సీనియర్లకు చాన్స్ లభిస్తుందా?
Chandrababu Naidu MLC Seats Finalisation: ఆంధ్రప్రదేశ్లో రెండు శాసనమండలి స్థానాల భర్తీకి సమయం దగ్గరపడుతుండటంతో అధికార తెలుగుదేశం పార్టీలో రాజకీయ సమీకరణాలు వేగంగా మారుతున్నాయి. రాబోయే కేబినెట్ భేటీ అనంతరం లేదా పార్టీ సీనియర్లతో జరిపే అత్యవసర భేటీలో సీఎం నారా చంద్రబాబు నాయుడు ఈ రెండు సీట్లపై తుది నిర్ణయం తీసుకోనున్నారు. అయితే, 2024 అసెంబ్లీ ఎన్నికల్లో టికెట్లు త్యాగం చేసిన సీనియర్లు, సామాజిక వర్గాల ప్రాతినిధ్యం మరియు పొత్తు ధర్మం మధ్య చంద్రబాబు ఎవరికి అవకాశం కల్పిస్తారనే అంశం అమరావతి వర్గాల్లో తీవ్ర ఉత్కంఠ రేపుతోంది.
ప్రస్తుతం ఖాళీగా ఉన్న ఎమ్మెల్సీ స్థానాల కోసం టీడీపీ నుంచి ఆశావహుల జాబితా భారీగా ఉంది. ముఖ్యంగా గతం నుంచీ పార్టీకి విధేయులుగా ఉంటూ, ఎన్నికల సమయంలో పొత్తులు , ఇతర సమీకరణాల వల్ల అసెంబ్లీ టికెట్ లభించని పలువురు సీనియర్ నేతలు ఈ పదవిపై కోటి ఆశలు పెట్టుకున్నారు. రాయలసీమ, కోస్తా ప్రాంతాలకు చెందిన కొందరు ముఖ్య నేతలతో పాటు ఉమ్మడి జిల్లాల అధ్యక్షులు, సామాజిక వర్గాల వారీగా బలమైన గుర్తింపు ఉన్న నాయకులు చంద్రబాబు, లోకేష్లను కలిసి తమ అభ్యర్థిత్వాలను పరిశీలించాలని విజ్ఞప్తి చేస్తున్నారు.
చంద్రబాబు చూసే సమీకరణాలేంటి?
ఈ రెండు స్థానాల ఎంపికలో చంద్రబాబు ప్రధానంగా రెండు కీలకమైన అంశాలను పరిగణనలోకి తీసుకుంటున్నారు. మొదటిది త్యాగాలకు గుర్తింపు . గత అసెంబ్లీ ఎన్నికల్లో కూటమి పొత్తులో భాగంగా గెలిచే అవకాశాలు ఉన్నప్పటికీ తమ స్థానాలను మిత్రపక్షాలకు లేదా ఇతర నేతలకు వదులుకున్న నాయకులకు మొదటి ప్రాధాన్యత ఇవ్వాలనే ఆలోచనలో పార్టీ అధిష్టానం ఉంది. రెండోది సామాజిక , ప్రాంతీయ సమతుల్యత . బీసీ, ఎస్సీ లేదా మైనార్టీ వర్గాలకు ప్రాతినిధ్యం పెంచడం ద్వారా రాబోయే స్థానిక సంస్థల ఎన్నికల్లో పార్టీకి రాజకీయంగా ప్రయోజనం చేకూరేలా ప్లాన్ చేస్తున్నారు.
కూటమి పార్టీ నుంచి ఈ సారి చాన్స్ లేనట్లే్
మరోవైపు, కూటమి భాగస్వామ్య పక్షాల నుంచి కూడా ఈ సీట్లపై ఒత్తిడి ఉందనే వార్తలు వినిపిస్తున్నాయి. ఇప్పటికే గత ఎమ్మెల్సీ ఎన్నికల్లో జనసేనకు కొణిదెల నాగబాబు, బీజేపీకి సోము వీర్రాజులకు అవకాశాలు లభించినందున , ఈసారి రెండు స్థానాలనూ పూర్తి స్థాయిలో టీడీపీ ఖాతాలోనే ఉంచుకోవాలని తమ్ముళ్లు భావిస్తున్నారు. అయితే, కేంద్ర, రాష్ట్ర స్థాయిలో కూటమి బంధాన్ని మరింత బలోపేతం చేసేందుకు రాజకీయ వ్యూహకర్తగా చంద్రబాబు ఏ నిర్ణయం తీసుకుంటారోనని పార్టీ శ్రేణులు ఉత్కంఠగా ఎదురుచూస్తున్నాయి.
కొత్త పేర్లు తెరపైకి వస్తాయా?
ఈ రేసులో సీనియర్ నేతల పేర్లతో పాటు యువత, మహిళలకు కూడా అవకాశం ఇస్తారనే ప్రచారం జోరుగా సాగుతోంది. గతంలో కావలి గ్రీష్మ వంటి యువ నాయకులకు, బీసీ నేతలకు అవకాశమిచ్చిన తీరును చూస్తే, ఈసారి కూడా ఊహించని సరికొత్త పేర్లను స్క్రీన్పైకి తెచ్చినా ఆశ్చర్యపోనవసరం లేదని విశ్లేషకులు భావిస్తున్నారు. అసెంబ్లీ ఎన్నికల్లో పనిచేసిన తీరు, నియోజకవర్గాల్లో పార్టీని బలోపేతం చేసిన నాయకుల డేటాను ఐప్యాక్ లేదా అంతర్గత సర్వేల ద్వారా తెప్పించుకుని చంద్రబాబు పరిశీలిస్తున్నారు. పార్టీ కోసం కష్టపడి నమ్మకంగా ఉన్న నాయకులకు సముచిత స్థానం కల్పిస్తూనే, రాబోయే స్థానిక పోరుకు కేడర్లో నూతన ఉత్సాహాన్ని నింపేలా చంద్రబాబు తన నిర్ణయాన్ని ప్రకటించే అవకాశాలు కనిపిస్తున్నాయి. ముగింపు దశకు చేరిన ఈ రేసులో ఆ ఇద్దరు అదృష్టవంతులు ఎవరనేది మరికొద్ది రోజుల్లోనే తేలనుంది.
టాప్ హెడ్ లైన్స్
ట్రెండింగ్ వార్తలు
