AIADMK MLAs resignation: ఉపఎన్నికల కొరివితో గోక్కుంటున్న విజయ్ - తేడా వస్తే నిలబడటం కష్టమే ?
Tamil Nadu politics 2026: తమిళనాడు రాజకీయాల్లో ఊహించని పరిణామాలు చోటుచేసుకుంటున్నాయి. అన్నాడీఎంకే నుండి ఎమ్మెల్యేల రాజీనామాలు, వారు విజయ్ నేతృత్వంలోని టీవీకే లో చేరడం ఇప్పుడు హాట్ టాపిక్‌గా మారింది.
Vijay TVK party by-elections: తమిళనాడు రాజకీయ ముఖచిత్రం 2026 మే నెలలో జరిగిన ఎన్నికలతో పూర్తిగా మారిపోయింది. విజయ్ స్థాపించిన తమిళగ వెట్రి కళగం అతిపెద్ద పార్టీగా అవతరించినప్పటికీ, స్పష్టమైన మెజారిటీకి కొద్దిగా దూరంలో నిలిచింది. డీఎంకే మిత్రపక్షాలు టీవీకే వైపు రావడంతో ఇప్పటికి అంతా సేఫ్ గా ఉంది. అయితే విజయ్ తన ప్రభుత్వానికి మరింత స్థిరీకరణ కోరుకుటున్నారు. అందుకే రెబల్స్ గా మారిన అన్నాడీఎంకే ఎమ్మెల్యేలతో రాజీనామాలు చేయిస్తున్నారు. ఇప్పటికి నలుగురు ఎమ్మెల్యేలు రాజీనామా చేశఆరు. రాజీనామా చేసిన ఈ నలుగురు ఎమ్మెల్యేలకు టీవీకే అధిష్టానం రాబోయే ఉపఎన్నికల్లో మళ్ళీ టికెట్లు ఇస్తామని హామీ ఇచ్చింది. అయితే, ఇక్కడే అసలైన సవాల్ మొదలవుతుంది.
రాజీనామా చేసిన ఎమ్మెల్యేలు పదిహేను రోజుల క్రితమే అన్నాడీఎంకే రెండాకులు గుర్తుపై గెలిచారు. ఇప్పుడు విజయ్ పార్టీ గుర్తుపై పోటీ చేసినప్పుడు ప్రజలు అదే స్థాయిలో ఆదరిస్తారా అనేది మిలియన్ డాలర్ల ప్రశ్న. పార్టీ ఫిరాయింపుల చట్టం నుండి తప్పించుకోవడానికి వీరు రాజీనామా మార్గాన్ని ఎంచుకున్నప్పటికీ, ఓటర్ల తీర్పు ఎలా ఉంటుందనేది ఆసక్తికరంగా మారింది. ఈ ఎమ్మెల్యేలకు క్షేత్రస్థాయిలో బలమైన వ్యక్తిగత వర్గం ఉంది. ముఖ్యంగా ఎస్.పి. వేలుమణి వర్గానికి చెందిన వీరికి నియోజకవర్గాల్లో పట్టు ఉంది. దీనికి తోడు ప్రస్తుతం తమిళనాడులో వీస్తున్న విజయ్ వేవ్ వీరికి కలిసివచ్చే అతిపెద్ద ప్లస్ పాయింట్. యువత మరియు మహిళా ఓటర్లు విజయ్ నాయకత్వాన్ని బలపరుస్తుండటం వల్ల, వీరు తమ సొంత ఇమేజ్ మరియు విజయ్ క్రేజ్ తో సులభంగా గెలుస్తారని టీవీకే శ్రేణులు ధీమా వ్యక్తం చేస్తున్నాయి.
ఓడించి తీరాలనే పట్టుదలతో అన్నాడీఎంకే, డీఎంకే
అన్నాడీఎంకే కేడర్ ఈ రాజీనామాలను తీవ్రంగా పరిగణిస్తోంది. పళనిస్వామి నాయకత్వం వీరిని ద్రోహులు గా ముద్ర వేసి, ఉపఎన్నికల్లో ఎలాగైనా ఓడించాలని పట్టుదలతో ఉంది. రెండాకుల గుర్తుపై గెలిచి, సినిమాల సెలబ్రిటీ పంచన చేరిన వారిని ప్రజలు క్షమించరు అని ఈపీఎస్ ఇప్పటికే హెచ్చరించారు. అన్నాడీఎంకేకు ఉన్న పటిష్టమైన గ్రామస్థాయి ఓటు బ్యాంకు ఇప్పుడు వీరిపై వ్యతిరేకంగా పనిచేస్తే గట్టి పోటీ తప్పదు. డీఎంకే కూడా వీరిని ఓడించడానికి గరిష్టంగా ప్రయత్నించే అవకాశం ఉంది. తమిళనాడులో పార్టీలు మారి ఉపఎన్నికల్లో గెలిచిన దాఖలాలు ఉన్నాయి . కానీ, అప్పటి పరిస్థితులు వేరు. ఇప్పుడు టెక్నాలజీ, సోషల్ మీడియా యుగంలో ఓటరు చైతన్యం పెరిగింది. వార్డు మెంబర్ స్థాయి నుండి కష్టపడి పైకి వచ్చిన కేడర్, పార్టీని వీడిన నేతల వెంట వెళ్తుందా లేక పార్టీకే కట్టుబడి ఉంటుందా అనే దానిపైనే ఈ నలుగురి భవిష్యత్తు ఆధారపడి ఉంది.
ఉపఎన్నికలు టీవీకే భవిష్యత్‌కు కీలకం
ఈ ఉపఎన్నికలు కేవలం నలుగురు ఎమ్మెల్యేల భవిష్యత్తునే కాదు, తమిళనాడులో అన్నాడీఎంకేతో పాటు టీవీకే మనుగడను కూడా నిర్ణయించబోతున్నాయి. విజయ్ తన అధికారాన్ని సుస్థిరం చేసుకోవడానికి ఈ గెలుపు అత్యవసరం. ఒకవేళ వీరు గెలిస్తే, అన్నాడీఎంకే నుండి మరిన్ని రాజీనామాలు వచ్చే ప్రమాదం ఉంది. లేదంటే, అన్నాడీఎంకేకు మళ్ళీ పూర్వవైభవం వచ్చే ఛాన్స్ ఉంటుంది. ఏదేమైనా, ఈ ఉపఎన్నికల పోరు సినిమా వర్సెస్ సింబల్ లా మారబోతోంది.
టాప్ హెడ్ లైన్స్
ట్రెండింగ్ వార్తలు
