TVK Government: తమిళనాడు సీఎంగా విజయ్ - ఖజానా ఖాళీ.. 10 లక్షల కోట్ల అప్పు.. దళపతి కి అసలైన పరీక్ష ఇప్పుడే!
Stalin Vs Vijay: ముఖ్యమంత్రి విజయ్కు పిరాడనివ్వని సవాళ్లు ఎదురవుతున్నాయి. వెండితెరపై అసాధ్యాలను సుసాధ్యం చేసే హీరోగా మెప్పించిన ఆయనకు, ఇప్పుడు ఆర్థిక సంక్షోభం అనే అతిపెద్ద విలన్ ఎదురుగా నిలబడింది.
Tamilnadu CM Vijay Financial Challenges: తమిళనాడు ముఖ్యమంత్రిగా ప్రమాణ స్వీకారం చేసిన సి. జోసెఫ్ విజయ్ బాధ్యతలు చేపట్టిన వెంటనే రాష్ట్ర ఆర్థిక పరిస్థితిపై ఆందోళన వ్యక్తం చేశారు. గత ప్రభుత్వాల హయాంలో రాష్ట్రం సుమారు రూ. 10 లక్షల కోట్ల అప్పుల్లో కూరుకుపోయిందని, ఖజానా పూర్తిగా ఖాళీ అయిందని ఆయన ఆరోపిస్తున్నారు. పరిపాలనా అనుభవం లేని విజయ్, ఇప్పుడు ప్రతి నెలా ప్రభుత్వ ఉద్యోగుల జీతాలు, పెన్షన్లు, గత అప్పులకు వడ్డీలు చెల్లించడమే గగనంగా మారిన తరుణంలో బాధ్యతలు చేపట్టారు. ఈ ఆర్థిక సందిగ్ధతను అధిగమించేందుకు ఆయన త్వరలోనే వైట్ పేపర్ విడుదల చేస్తానని ప్రకటించడం రాష్ట్ర రాజకీయాల్లో వేడిని పెంచింది.
ఎన్నికల మేనిఫెస్టోలో విజయ్ ప్రకటించిన సంక్షేమ పథకాలు ఇప్పుడు ఆయనకు కత్తి మీద సాములా మారాయి. నెలకు 200 యూనిట్ల ఉచిత విద్యుత్, మహిళలకు ఆర్థిక సాయం, నిరుద్యోగ భృతి వంటి హామీలను అమలు చేయాలంటే రాష్ట్ర ఆదాయంలో దాదాపు మూడో వంతు నిధులు వీటికే కేటాయించాల్సి ఉంటుంది. ఇప్పటికే అప్పుల ఊబిలో ఉన్న రాష్ట్రానికి, ఈ అదనపు భారం భరించడం సాధ్యమేనా అన్నది ఆర్థిక నిపుణుల ప్రశ్న. అధికారంలోకి వచ్చిన రెండు, మూడు నెలల్లోనే ఈ హామీలపై స్పష్టత ఇవ్వకపోతే ప్రజల్లో అసంతృప్తి మొదలయ్యే ప్రమాదం ఉందని సోషల్ మీడియాలో చర్చ జరుగుతోంది.
అనుభవం లేని యంత్రాంగం - అధికారులపై ఆధారపడటం
విజయ్ మాత్రమే కాకుండా, ఆయన క్యాబినెట్లోని మెజారిటీ మంత్రులకు పరిపాలనలో కనీస అనుభవం లేదు. వ్యవస్థ ఎలా నడుస్తుంది? నిధుల సమీకరణ ఎలా చేయాలి? కేంద్రంతో ఎలా డీల్ చేయాలి? అన్న విషయాల్లో వారు పూర్తిగా ఐఏఎస్ అధికారులపైనే ఆధారపడాల్సిన పరిస్థితి నెలకొంది. సీనియర్ అధికారులను తన దారిలోకి తెచ్చుకుని, పాత పద్ధతులను మారుస్తూ కొత్త విధానాలను అమలు చేయడం విజయ్కు పెద్ద సవాల్. అధికారుల మీద పట్టు సాధించడంలో విఫలమైతే, పాలన గాడి తప్పే అవకాశం ఉంది. తమిళనాడు వంటి రాష్ట్రానికి కేంద్రం నుంచి అందాల్సిన జీఎస్టీ బకాయిలు, ఇతర నిధులు చాలా కీలకం. అయితే, బీజేపీయేతర కూటమి మద్దతుతో ప్రభుత్వాన్ని ఏర్పాటు చేసిన విజయ్కు, కేంద్రం నుంచి ఆశించిన స్థాయిలో మద్దతు లభిస్తుందా అన్నది అనుమానమే. ప్రధాని మోదీ ఆయనకు శుభాకాంక్షలు తెలిపినప్పటికీ, రాష్ట్రానికి అవసరమైన ప్రత్యేక ప్యాకేజీలు లేదా నిధుల విషయంలో కేంద్రం ఏ మేరకు సహకరిస్తుందో చూడాలి. ఒకవేళ కేంద్రం నుంచి సహకారం అందకపోతే, రాష్ట్రం మరింత రుణభారంలో పడిపోవడం ఖాయం.
ద్రవిడ కోటలో విజయ్ మోడల్ నిలుస్తుందా?
దశాబ్దాలుగా డీఎంకే, అన్నాడీఎంకేల మధ్య సాగిన తమిళ రాజకీయాలను కాదని ప్రజలు విజయ్కు అవకాశం ఇచ్చారు. అయితే, పాత ప్రభుత్వాల మాదిరిగానే ఉచితాల బాటలో నడిస్తే రాష్ట్ర ఆర్థిక పరిస్థితి దివాళా తీస్తుందని విశ్లేషకులు హెచ్చరిస్తున్నారు. తనదైన ముద్ర వేయాలని రాత్రింబవళ్లు కష్టపడుతున్న విజయ్, రొటీన్ రాజకీయాలకు భిన్నంగా ఆర్థిక క్రమశిక్షణను ఎలా పాటిస్తారో అన్నది ఇప్పుడు హాట్ టాపిక్. ఒకవేళ ఆర్థిక సమస్యల వల్ల సంక్షేమ పథకాలు నిలిచిపోతే, అది విపక్షాలకు పెద్ద అస్త్రంగా మారుతుంది.విజయ్ తన సినిమా కెరీర్లో ఎన్నో క్లిష్టమైన క్లైమాక్స్లను ఎదుర్కొన్నారు. కానీ, ఈ ఫైనాన్షియల్ క్లైమాక్స్ నుండి తమిళనాడును ఎలా గట్టెక్కిస్తారో అన్నదే ఇప్పుడు దేశవ్యాప్త ఉత్కంఠ. రాబోయే 100 రోజులు విజయ్ ప్రభుత్వానికి అగ్నిపరీక్ష వంటివే.
టాప్ హెడ్ లైన్స్
ట్రెండింగ్ వార్తలు
