Pawan Kalyan inclusive politics: జనసేన తమదే అనుకుంటున్న కాపు నేతలు - అందరిదీ అంటున్న పవన్ - ఈ గ్యాప్ ఎలా తగ్గుతుంది?
Janasena Party caste dynamics: జనసేన పార్టీలో కుల సమీకరణాలపై పవన్ కల్యాణ్ అసహనం. ఒక్క కులంతో అధికారం సాధ్యమా అని ప్రశ్నిస్తున్న జనసేనాని. పార్టీ నేతలు, క్యాడర్ ఎందుకు అర్థం చేసుకోలేకపోతున్నారు?
Kapu branding vs Pawan Kalyan vision: ఆంధ్రప్రదేశ్ రాజకీయాల్లో జనసేన పార్టీ ఒక బలమైన శక్తిగా అవతరించినప్పటికీ, ఆ పార్టీ అంతర్గత నిర్మాణంలో ఎదురవుతున్న సామాజిక సవాళ్లపై ఇప్పుడు ఆసక్తికరమైన చర్చ జరుగుతోంది. పవన్ కల్యాణ్ సార్వజనిక విజన్ వర్సెస్ క్యాడర్ కుల పరిమితుల మధ్య సంఘర్షణ జరుగుతోంది. ఆంధ్రప్రదేశ్ రాజకీయాల్లో జనసేన పార్టీ సరికొత్త శకానికి నాంది పలికినప్పటికీ, ఆ పార్టీ అంతర్గత సమీక్షల్లో ఇప్పుడు ఒక విలక్షణమైన ఆందోళన వ్యక్తమవుతోంది. పార్టీ అధినేత, ఉపముఖ్యమంత్రి పవన్ కల్యాణ్ తన సొంత పార్టీ నేతలు, సోషల్ మీడియా క్యాడర్ తీరుపై తీవ్ర అసహనంతో ఉన్నట్లు ఆయన ప్రసంగాల ద్వారానే స్పష్టమవుతోంది. జనసేన పార్టీ కేవలం కాపు సామాజికవర్గం కోసమే ఉందన్నట్లుగా కొంతమంది కీలక నేతలు, క్యాడర్ ప్రవర్తిస్తుండటంపై పవన్ కల్యాణ్ తీవ్ర అభ్యంతరం వ్యక్తం చేసినట్లు తెలుస్తోంది. పార్టీలో ఇతర కులాల నాయకులకు ప్రాధాన్యత ఇస్తుంటే, దాన్ని జీర్ణించుకోలేక సొంత శ్రేణులే విమర్శలకు దిగడం జనసేనానిని తీవ్రంగా కలచివేస్తోంది.
జనసేన కాపులకే అనే ముద్ర పడకూడదని జనసేనాని ప్రయత్నం
ఏ ఒక్క సామాజికవర్గం మద్దతుతోనూ ఏ రాజకీయ పార్టీ సుస్థిరమైన అధికారాన్ని సాధించలేదనే చారిత్రక సత్యాన్ని పవన్ కల్యాణ్ బలంగా నమ్ముతున్నారు. గతంలో ప్రజారాజ్యం వైఫల్యానికి ప్రధాన కారణం అది ఒకే కులానికి పరిమితమనే ముద్ర పడటమేనని ఆయన గుర్తించారు. అందుకే జనసేనను ప్రారంభించిన నాటి నుండి కులాలకు అతీతమైన రాజకీయం అనే నినాదాన్ని ఆయన భుజానికెత్తుకున్నారు. అయితే, నాయకత్వానికి ఉన్న ఈ స్పష్టత క్షేత్రస్థాయిలో ఉన్న క్యాడర్కు, సోషల్ మీడియా సైన్యానికి అర్థం కాకపోవడమే ఇప్పుడు పెద్ద సమస్యగా మారింది. బీసీ, ఎస్సీ, ఎస్టీ, మైనారిటీ వర్గాలను కలుపుకుపోకుండా పార్టీని విస్తరించడం సాధ్యం కాదని ఆయన పదే పదే హెచ్చరిస్తున్నారు.
కొంత మంది నేతల తీరుపై పవన్ అసహనం
జనసేన క్యాడర్ , కొంతమంది సీనియర్ నాయకులు ఇప్పటికీ ఒకే కుల సమీకరణాల చుట్టూ రాజకీయాన్ని తిప్పాలని చూడటంపై పవన్ కల్యాణ్ ఇటీవల సమావేశాల్లో తీవ్రంగా స్పందిస్తున్నారు. ఇతర కులాల వారికి పదవులు ఇస్తే సోషల్ మీడియాలో ట్రోల్ చేయడం వంటి ధోరణి పార్టీ ఎదుగుదలకు గొడ్డలిపెట్టుగా మారుతోందని ఆయన భావిస్తున్నారు. పార్టీ అధికారం దక్కించుకోవాలన్నా, భవిష్యత్తులో నిలబడాలన్నా అన్ని కులాలు ముఖ్యం" అనే కఠిన వాస్తవాన్ని క్యాడర్ ముఖంపైనే చెప్పడానికి పవన్ సిద్ధపడటం ఆయన రాజకీయ పరిణతికి నిదర్శనం. రాజకీయాల్లో ఎక్స్క్లూజివిటీ కంటే ఇంక్లూజివిటీ కే విజయావకాశాలు ఎక్కువ ఉంటాయని ఆయన నమ్ముతున్నారు. కానీ ఈ ఫార్ములాను కొంత మంది నేతలు నమ్మకడం లేదు.
ఒక్క కులంతో అధికారం రాదు!
ఆంధ్రప్రదేశ్ జనాభా విశ్లేషణను పరిశీలిస్తే.. ఏ ఒక్క కులం కూడా ఒంటరిగా ప్రభుత్వాన్ని స్థాపించే స్థాయిలో మేజారిటీ ఓటు బ్యాంకును కలిగి లేదు. కాపు సామాజికవర్గం కోస్తా జిల్లాల్లో నిర్ణయాత్మక శక్తిగా ఉన్నప్పటికీ, రాయలసీమ , ఉత్తరాంధ్రలోని కీలక ప్రాంతాల్లో బీసీలు, ఎస్సీల మద్దతు లేనిదే విజయం సాధ్యం కాదు. ఈ సమీకరణాలను బ్యాలెన్స్ చేయడం కోసమే పవన్ కల్యాణ్ పొత్తుల రాజకీయాన్ని నడిపారు. క్యాబినెట్లోనూ, పార్టీ పదవుల్లోనూ అన్ని వర్గాలకు సమన్యాయం చేయడానికి ఆయన ప్రయత్నిస్తుంటే, క్షేత్రస్థాయిలో పార్టీని ఒకే కుల పరిధిలోకి కుదించేలా వ్యవహరించడం వల్ల ఇతర సామాజికవర్గాలు జనసేనకు దూరం జరిగే ప్రమాదం ఉందని విశ్లేషకులు హెచ్చరిస్తున్నారు. జనసేన సోషల్ మీడియా వింగ్ పార్టీని సార్వజనిక వేదికగా చూపించాల్సింది పోయి, కేవలం ఒకే కుల అజెండాను భుజానకెత్తుకుంటే.. అది దీర్ఘకాలంలో పార్టీ మనుగడకే ముప్పు తెస్తుంది. పవన్ కల్యాణ్ విజన్ కేవలం ఈ ఐదేళ్ల అధికార భాగస్వామ్యం మాత్రమే కాదు.భవిష్యత్తులో జనసేనను రాష్ట్రంలో తిరుగులేని ప్రత్యామ్నాయ శక్తిగా నిలబెట్టడం. ఆ విజన్ సాకారం కావాలంటే, లీడర్ల నుంచి కిందిస్థాయి కార్యకర్త వరకు తమ సంకుచిత కుల భావాలను వీడి, పార్టీ సిద్ధాంతాలకు కట్టుబడి ఉండాల్సిందే.
పవన్ వ్యూహం క్యాడర్ కు అర్థం కావడం లేదా?
ఇతర కులాల ఓటర్లలో జనసేన పట్ల నమ్మకాన్ని కలిగించడం ద్వారానే పార్టీకి యూనివర్సల్ అప్పీల్ వస్తుంది. నాయకుడి ఆలోచనలకు అనుగుణంగా శ్రేణులు తమ మైండ్సెట్ను మార్చుకోకపోతే, పొందిన విజయాన్ని నిలబెట్టుకోవడం కష్టమేనని రాజకీయ నిపుణులు అభిప్రాయపడుతున్నారు. పవన్ కల్యాణ్ ఇస్తున్న ఈ గట్టి సందేశాన్ని క్యాడర్ ఎంత త్వరగా అర్థం చేసుకుంటే, పార్టీ అంత వేగంగా సామాజికంగా విస్తరిస్తుంది. నాయకత్వం ఆశించినట్లుగా పార్టీ అన్ని వర్గాల గొంతుకగా మారినప్పుడే, అది నిజమైన ప్రజా పార్టీగా గుర్తింపు పొందుతుంది. క్షేత్రస్థాయి కార్యకర్తలు తమ సంకుచిత వైఖరిని మార్చుకుని, పవన్ కల్యాణ్ ఆశయాలకు అనుగుణంగా నడుచుకుంటారా లేదా అనేది జనసేన భవిష్యత్తును నిర్ణయించనుంది.
Before You Go
Telangana Politics: మరో స్థాయికి వెళ్లిన బూతుల పంచాయతీ.. కంట్రోల్ తప్పిన పొలిటీషియన్స్
టాప్ హెడ్ లైన్స్
ట్రెండింగ్ వార్తలు
