Balochistan: పాక్ సైనిక స్థావరాలపై ఉగ్రమూకల దాడి.. 15 మంది ముష్కరులు, నలుగురు జవాన్లు మృతి

పాకిస్థాన్ సైనిక స్థావరాలపై జరిగిన ఉగ్రదాడిలో మొత్తం 15 మంది ఉగ్రవాదులు, నలుగురు సైనికులు మరణించారు.

పాకిస్థాన్ సైనిక స్థావరాలపై ఉగ్రదాడి

పాకిస్థాన్‌లో ఉగ్రమూకలపై ఆ దేశ సైన్యం దాడి చేసింది. సైనిక స్థావరాలలోకి ఉగ్రమూకలు చొరబడేందుకు ప్రయత్నించగా సైన్యం తిప్పికొట్టింది. ఈ కాల్పుల్లో 15 మంది ఉగ్రవాదులు, నలుగురు సైనికులు మరణించారు. ఘటనలో వీరమరణం పొందిన పాక్ సైనికులకు ప్రధాని ఇమ్రాన్ ఖాన్ నివాళులర్పించారు. వారి ప్రాణత్యాగాలను కీర్తించారు.

" ఉగ్రదాడులను అరికట్టి ప్రాణాలకు తెగించి పోరాడిన మా భద్రతా బలగాలకు మా సెల్యూట్. మా సైనికుల వెనుకే దేశం ఉంది. మమ్మల్ని కాపాడేందుకు అహర్నిశలు ప్రాణాలకు తెగించి వీరు పోరాడుతున్నారు.                                               "

-ఇమ్రాన్ ఖాన్, పాకిస్థాన్ ప్రధాని

We salute our brave security forces who repulsed terrorist attacks against security forces' camps in Panjgur & Naushki, Balochistan. The nation stands united behind our security forces who continue to give great sacrifices to protect us.

— Imran Khan (@ImranKhanPTI) February 3, 2022

బీజింగ్ ఒలింపిక్స్ ప్రారంభోత్సవ కార్యక్రమంలో పాల్గొనేందుకు ప్రధాని ఇమ్రాన్ ఖాన్ చైనాకు బయలుదేరే కొన్ని గంటల ముందే ఈ ఘటన జరిగింది.

ఏం జరిగింది?

నైరుతి బలూచిస్థాన్​ రాష్ట్రంలో పంజగుర్​, నౌష్కి సైనిక స్థావరాలపై ఉగ్రవాదులు దాడులు జరిపారు. ఉగ్రదాడులను పాక్ సైన్యం ప్రతిఘటించింది. ఈ కాల్పుల్లో ఆరుగురు ఉగ్రవాదులు అక్కడికక్కడే మరణించారు. మరో తొమ్మిది మంది అనంతరం మరణించారు.

అయితే ఉగ్రవాదుల దాడిలో నలుగురు సైనికులు కూడా ప్రాణాలు కోల్పోయారు. ఈ మేరకు పాక్ అంతర్గ వ్యవహారాల మంత్రి షేక్ రషీద్ అహ్మద్ తెలిపారు.

ఈ దాడులకు నిషేధిత బలూచిస్థాన్ లిబరేషన్ ఆర్మీ(బీఎల్​ఏ) బాధ్యత వహిస్తున్నట్లు ప్రకటించింది. సైనిక స్థావరాలలోకి చొరబాటుకు ప్రయత్నించినట్లు పేర్కొంది. బలూచిస్థాన్ వేర్పాటువాద సంస్థ బీఎల్​ఏ ఆ ప్రాంతంలో నిరంతరం దాడులకు పాల్పడుతోంది.