Umesh Katti Passed Away: గుండెపోటుతో కర్ణాటక మంత్రి హఠాన్మరణం- ప్రధాని మోదీ దిగ్భ్రాంతి

Umesh Katti Passed Away: కర్ణాటక మంత్రి ఉమేశ్ కత్తి గుండెపోటుతో హఠాన్మరణం చెందారు.

గుండెపోటుతో కర్ణాటక మంత్రి హఠాన్మరణం ( Image Source :ANI )

Umesh Katti Passed Away: కర్ణాటక మంత్రి ఉమేశ్‌ కత్తి (61) గుండెపోటుతో మంగళవారం అర్ధరాత్రి కన్నుమూశారు. అటవీ శాఖ మంత్రిగా ఉన్న ఉమేశ్ కత్తి మృతి చెందడంతో యావత్ రాష్ట్రం షాకైంది.

ఇలా జరిగింది

మంగళవారం రాత్రి 10 గంటల సమయంలో ఛాతీ నొప్పి రావడంతో ఉమేశ్ కత్తి కుప్పకూలిపోయారు. ఆ సమయంలో ఉమేశ్.. డాలర్స్‌ కాలనీలోని తన నివాసంలో ఉన్నారు. వెంటనే చికిత్స కోసం ఉమేశ్ కత్తిని.. రామయ్య ఆసుపత్రికి తరలించారు. అత్యవసర చికిత్స అందించినప్పటికీ ఫలితం లేకపోయింది. చికిత్సకు ఆయన శరీరం సహకరించకపోవడంతో రాత్రి 11.40 నిమిషాలకు ఆయన మృతి చెందినట్లు వైద్యులు ప్రకటించారు. 

ప్రొఫైల్

• ఉమేశ్ కత్తి స్వస్థలం బెళగావి జిల్లా చిక్కోడి తాలూకా ఖడకలాట గ్రామం.
• ఆయనకు భార్య లీల, కుమారుడు నిఖిల్‌, కుమార్తె స్నేహా ఉన్నారు.
• బెళగావి జిల్లా హుక్కేరి నియోజకవర్గం నుంచి ఎనిమిది సార్లు ఆయన ఎమ్మెల్యేగా గెలిచారు.
• ఐదు సార్లు మంత్రిగా సేవలందించారు.
• ప్రస్తుతం అటవీ, ఆహారం, పౌర సరఫరాలు, వినియోగదారుల వ్యవహారాల శాఖల మంత్రిగా ఉన్నారు.

మోదీ దిగ్భ్రాంతి

ఉమేశ్ కత్తి మృతి పట్ల ప్రధాని నరేంద్ర మోదీ, కర్ణాటక సీఎం బసవరాజ్ బొమ్మై దిగ్భ్రాంతి వ్యక్తం చేశారు. 

Shri Umesh Katti Ji was an experienced leader who made rich contributions to Karnataka’s development. Pained by his demise. My thoughts are with his family and supporters in this tragic hour. Om Shanti.

— Narendra Modi (@narendramodi) September 7, 2022

" శ్రీ ఉమేష్ కత్తి జీ.. కర్ణాటక అభివృద్ధికి గొప్ప కృషి చేసిన అనుభవజ్ఞుడైన నాయకుడు. ఆయన మరణం బాధ కలిగించింది. ఈ విషాద సమయంలో నా ఆలోచనలు ఆయన కుటుంబం, మద్దతుదారులతో ఉన్నాయి. ఓం శాంతి.                                     "

-  ప్రధాని నరేంద్ర మోదీ

" నా సన్నిహిత మిత్రుడిని కోల్పోయాను, నాకు తను సోదరుడు, తనకు గుండె జబ్బులు ఉన్నాయని తెలుసు. కానీ ఇంత త్వరగా మమ్మల్ని విడిచి వెళతాడని ఊహించలేదు. తను రాష్ట్రానికి ఎంతో సేవలు చేశాడు. అనేక శాఖలను సమర్ధవంతంగా నిర్వహించాడు. ఆయన మరణం రాష్ట్రానికి భారీ నష్టం. దీనిని పూరించడం చాలా కష్టం.                                           "

- బసవరాజ్ బొమ్మై, కర్ణాటక సీఎం