NTPC Protest: రైలును తగలబెట్టిన అభ్యర్థులు.. ఆర్‌ఆర్‌బీ పరీక్షల్లో అవకతవకలు జరిగాయని ఆగ్రహం

ఆర్‌ఆర్‌బీ పరీక్షల్లో అవకతవకలు జరిగాయని ఆరోపిస్తూ అభ్యర్థులు చేసిన ఆందోళనలు హింసాత్మకంగా మారాయి. బిహార్‌లో ఓ రైలుకు నిరసకారులు నిప్పుపెట్టారు.

రైలుకు నిప్పు పెట్టిన నిరసనకారులు

బిహార్‌లో నిరుద్యోగులు చేసిన నిరసనలు హింసాత్మకంగా మారాయి. ఆర్​ఆర్​బీ పరీక్షల్లో అవకతవకలు జరిగాయని ఆరోపిస్తూ ఉద్యోగార్థులు ఆందోళనలు చేపడుతున్నారు. అయితే ఈరోజు గయాలో రైలు పట్టాలపై ఆందోళనలు చేపట్టిన ఉద్యోగార్థుల్లో కొందరు హింసకు పాల్పడ్డారు. ఆగి ఉన్న భభువా-పట్నా ఇంటర్‌సిటీ ఎక్స్‌ప్రెస్‌కు నిప్పుపెట్టారు.

Gaya, Bihar | Aspirants vandalized train over alleged irregularities in Railway exam

CBT 2 exam date was not notified; no update on Railway exam which was notified in 2019...Result is still awaited...We demand cancellation of CBT 2 exam & release of exam result: Protester pic.twitter.com/9eyW8JphYa

— ANI (@ANI) January 26, 2022

నిరసనకారులను పోలీసులు చెదరగొట్టారు. ప్రస్తుతం పరిస్థితి అదుపులోనే ఉందని గయా ఎస్‌ఎస్‌పీ తెలిపారు.

" ప్రస్తుతం పరిస్థితి అదుపులోనే ఉంది. నిరసనకారులు.. రైలుకు నిప్పంటించారు. ఈ పని చేసిన కొంతమందిని మేం గుర్తించాం. ఎవరో చెప్పిన మాటలకు ప్రభావితులై ప్రభుత్వ ఆస్తులను ధ్వంసం చేయొద్దని ఉద్యోగార్థులను మేం కోరుతున్నాం. ఈ వ్యవహారంపై ప్రభుత్వం ఇప్పటికే కమిటీని నియమించింది.                                                             "

-ఆదిత్య కుమార్, గయా ఎస్‌ఎస్‌పీ

రద్దు చేయాల్సిందే..

మరోవైపు ఆందోళనకారులు సీబీటీ 2 పరీక్షను రద్దు చేయాలని డిమాండ్ చేశారు. 

" సీబీటీ 2 పరీక్ష నోటిఫికేషన్ ఇంకా రాలేదు. 2019లో ఇచ్చిన రైల్వే పరీక్ష నోటిఫికేషన్‌లోనూ ఎలాంటి పురోగతి లేదు. పరీక్ష ఫలితాలు ఇంకా రాలేదు. అందుకే సీబీటీ 2 పరీక్షను రద్దు చేసి ఫలితాలను విడుదల చేయాలని మేం డిమాండ్ చేస్తున్నాం.                                                      "

-ఆందోళనకారులు

అలా చేయొద్దు..

ఈ ఘటనపై రైల్వే మంత్రి అశ్వినీ కుమార్ వైష్ణవ్ స్పందించారు. ప్రభుత్వ ఆస్తులను ధ్వంసం చేయొద్దని నిరసనకారులకు తెలిపారు.

" మీ ఆస్తుల్ని మీరే ధ్వంసం చేసుకోవద్దు. ప్రభుత్వ ఆస్తుల్ని ధ్వంసం చేస్తే చట్టబద్ధంగా చర్యలు తప్పవు. సమస్య పరిష్కారానికి అంతా ప్రయత్నిస్తున్నారు. ఏమైనా ఇబ్బందులు ఉంటే అభ్యర్థులు సరైన మార్గంలో వాటిని ప్రభుత్వం దృష్టి తీసుకురావాలి. ఇలా చేయకూడదు.                                                   "

-అశ్వినీ కుమార్ వైష్ణవ్, రైల్వే మంత్రి 

అంతకుముందు.. ఆర్​ఆర్​బీ ఎన్​టీపీసీ, లెవల్​ 1 పరీక్షలను నిలిపివేస్తున్నట్లు భారతీయ రైల్వే శాఖ ప్రకటించింది. రైల్వేలో అభ్యర్థుల ఎంపిక ప్రక్రియను నిరసిస్తూ పలుచోట్ల ఆందోళనలు చెలరేగిన నేపథ్యంలో ఈ నిర్ణయం తీసుకుంది.

రాహుల్ ఆగ్రహం..

ఈ ఘటనపై కాంగ్రెస్ నేతలు రాహుల్ గాంధీ, ప్రియాంక గాంధీ ఆగ్రహం వ్యక్తం చేశారు. ఈ పరీక్షా విధానాన్ని వ్యతిరేకిస్తూ పోరాటం చేస్తోన్న యువతకు మద్దతు పలికారు రాహుల్ గాంధీ. తమ హక్కుల కోసం గళాన్ని విప్పే స్వేచ్ఛ యువతకు ఉందన్నారు.