Republic Day 2022 Celebration : కన్నార్పకుండా చూసేలా గణతంత్ర వేడుకలు.. ఈ సారి ఎన్నెన్ని విశేషాలో తెలుసా..?

భారత గణతంత్ర దినోత్సవానికి సర్వం సిద్ధమయింది. భారత శక్తి సామర్థ్యాలను రక్షణ బలగాలు ప్రదర్శించనున్నాయి. అలాగే ఈ సారి కన్నార్పకుండా చూసేలా కార్యక్రమాలను రూపొందించారు.

రిపబ్లిక్ డే వేడుకల్లో ఈ సారి ఎన్నో ప్రత్యేకతలు !

ఈ సారి భారత గణతంత్ర వేడుకల్లో ఎంతో ప్రత్యేకత కనిపించనుంది. ప్రధానంగా  ప్రధాన కవాతులో నేషనల్ క్యాడెట్ కార్ప్స్ ద్వారా 'షాహీదోన్ కో షట్ షట్ నమన్' కార్యక్రమాన్ని ప్రదర్శిస్తారు. భారత వైమానిక దళానికి చెందిన 75 విమానాలు, హెలికాప్టర్ల ద్వారా ప్రదర్శన ఉంటుంది. దేశవ్యాప్తంగా వందేభారతం నృత్య పోటీ ద్వారా ఎంపికైన 480 మంది నృత్యకారుల సాంస్కృతిక ప్రదర్శనలు ఇస్తారు. 'కలా కుంభ్' ఈవెంట్ సమయంలోనూ అందరికీ ఆ అనుభూతి అందేలా ఏర్పాట్లు చేశారు.  వేడుకలను చూసేందుకు వచ్చే ప్రేక్షకులకు మెరుగైన వీక్షణ అనుభవం కోసం 10 పెద్ద ఎల్‌ఈడీ స్క్రీన్లను ఏర్పాటు చేస్తున్నారు.  ప్రొజెక్షన్ మ్యాపింగ్‌తో పాటు 'బీటింగ్ ది రిట్రీట్' వేడుక కోసం 1,000 దేశీయంగా అభివృద్ధి చేసిన డ్రోన్‌ల ద్వారా డ్రోన్ షోను కూడా ఏర్పాటు చేశారు. 

ప్రధాన మంత్రి  నరేంద్ర మోడీ జాతీయ యుద్ధ స్మారకాన్ని సందర్శించడంతో గణతంత్ర దినోత్సవ పరేడ్ వేడుక ప్రారంభమవుతుంది. అమరవీరులకు పుష్పగుచ్ఛం ఉంచి నివాళులు అర్పిస్తారు. ఆ తర్వాత ప్రధాని కవాతును చూసేందుకు రాజ్‌పథ్‌కు వెళతారు. సాంప్రదాయం ప్రకారం, జాతీయ జెండాను ఎగురవేస్తారు,  రాష్ట్రపతి రామ్‌నాథ్ కోవింద్ గౌరవ వందనం స్వీకరించడంతో పరేడ్ ప్రారంభమవుతుంది. త్రివిద దళాలు తమ శక్తిసామర్థ్యాలను ప్రదర్శిస్తాయి. అలాగే డీఆర్డీఏ, ఇండియన్ కోస్ట్ గార్డ్, సెంట్రల్ రిజర్వ్ ఫోర్స్ పోలీస్, ఢిల్లీ పోలీసులు, ఎన్‌సీసీ కూడా కవాతులో భాగంగా ప్రదర్శన ఇస్తాయి. 

కవాతుతర్వాత 12 రాష్ట్రాలు, కేంద్రపాలిత ప్రాంతాలు,  తొమ్మిది మంత్రిత్వ శాఖలు సిద్దం చేసిన శకటాల ప్రదర్శన ఉంటుంది. ఆ తర్వాత  'ఆజాదీ కా అమృత్ మహోత్సవ్'లో భాగంగా, భారత వైమానిక దళానికి చెందిన 75 విమానాలు, హెలికాప్టర్లు అనేక నిర్మాణాలను ప్రదర్శిస్తాయి. పాతకాలపు అలాగే రాఫెల్, సుఖోయ్, జాగ్వార్, Mi-17, సారంగ్, అపాచీ మరియు డకోటా వంటి ప్రస్తుత ఆధునిక విమానాలు/హెలికాప్టర్‌లు రాహత్, మేఘన, ఏకలవ్య, త్రిశూల్, తిరంగ, విజయ్ మరియు అమృత్‌లతో సహా విభిన్న నిర్మాణాలను ప్రదర్శిస్తాయి. జాతీయ గీతం మరియు మూడు రంగుల బెలూన్‌లను విడుదల చేస్తాయి.  ఫ్లై పాస్ట్ సమయంలో కాక్‌పిట్ వీడియోలను చూపించడానికి మొదటిసారిగా IAF దూరదర్శన్‌తో కలిసి ప్రత్యేక ఏర్పాట్లు చేస్తోంది. 

అన్ని రకాల కోవిడ్ మార్గదర్శకాలను చాలా పక్కాగా పాటిస్తున్నారు. సాధారణంగా కవాతు చూసేందుకు అవకాశం లేని సమాజంలోని విభిన్న వర్గాల వారికి అవకాశం కల్పించేందుకు ప్రత్యేక ఏర్పాట్లు చేశారు. రిపబ్లిక్ డే పరేడ్‌తో పాటు 'బీటింగ్ ది రిట్రీట్' వేడుకను చూడటానికి ఆటో-రిక్షా డ్రైవర్లు, నిర్మాణ కార్మికులు, సఫాయి కర్మచారిలు, ఫ్రంట్‌లైన్ ఆరోగ్య కార్యకర్తలకు ఆహ్వానం పంపారు.  

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి