Presidential Election: దీదీకి 'KK' షాక్- రాష్ట్రపతి ఎన్నికల్లో విపక్షాల ఐక్యత గోవిందా గోవిందా!

Presidential Election: ప్రతిపక్షాలను ఏకతాటిపైకి తెచ్చేందుకు టీఎంసీ అధినేత్రి మమతా బెనర్జీ ఏర్పాటు చేసిన సమావేశానికి ముఖ్యమంత్రులు కేసీఆర్, కేజ్రీవాల్ గైర్హాజరయ్యారు.

దీదీకి 'KK' షాక్- రాష్ట్రపతి ఎన్నికల్లో విపక్షాల ఐక్యత గోవిందా గోవిందా!

Presidential Election: రాష్ట్రపతి ఎన్నికల వేళ ప్రతిపక్షాలను ఏకతాటిపైకి తెచ్చేందుకు బంగాల్ సీఎం మమతా బెనర్జీ ఏర్పాటు చేసిన సమావేశం ప్రారంభమైంది. అయితే ఈ కీలక భేటీకి టీఆర్ఎస్, ఆమ్‌ఆద్మీ, బీజేడీ పార్టీలు గైర్హాజరయ్యాయి. దిల్లీలోని కాన్‌స్టిట్యూషన్ క్లబ్‌లో ఈ భేటీ జరుగుతోంది.

Delhi | Leaders of 17 parties- TMC, Congress, CPI, CPI(M), CPIML, RSP, Shiv Sena, NCP, RJD, SP, National Conference, PDP, JD(S), DMK, RLD, IUML and JMM - are participating in the Opposition leaders' meeting called by Mamata Banerjee ahead of Presidential election. pic.twitter.com/gSuvbE5ukz

— ANI (@ANI) June 15, 2022

17 పార్టీలు

ఈ సమావేశానికి 17 పార్టీలకు చెందిన నేతలు హాజరయ్యారు. టీఎంసీ, కాంగ్రెస్, సీపీఐ, సీపీఐ (M), సీపీఐఎమ్‌ఎల్, ఆర్‌ఎస్‌పీ, శివసేన, ఎన్‌సీపీ, ఆర్‌జేడీ, ఎస్‌పీ, నేషనల్ కాన్ఫెరెన్స్, పీడీపీ, జేడీ(S), డీఎమ్‌కే, ఆర్‌ఎల్‌డీ, ఐయూఎమ్ఎల్, జేఎమ్ఎమ్ పార్టీల నేతలు ఈ సమావేశానికి వచ్చారు.

KK షాక్!

ప్రతిపక్షాల ఐక్యతలో కీలకంగా వ్యవహరిస్తారని భావించిన తెలంగాణ సీఎం కేసీఆర్, దిల్లీ సీఎం కేజ్రీవాల్ ఈ భేటీకి హాజరుకాకపోవడం దీదీకి పెద్ద మైనస్ అని విశ్లేషకుల మాట. ఇప్పటికే ఈ సమావేశంలో మహారాష్ట్ర సీఎం ఉద్ధవ్ ఠాక్రే పాల్గొనలేరని శివసేన ప్రకటించింది. మరోవైపు బీజేడీ అధినేత నవీన్ పట్నాయక్ కూడా ఈ భేటీకి డుమ్మా కొట్టారు.

మరోవైపు అభ్యర్థిని ప్రకటించిన తర్వాత మాత్రమే ఈ వ్యవహారంపై స్పందిస్తామని ఆమ్ ఆద్మీ పార్టీ చెప్పినట్లు సమాచారం. కాంగ్రెస్ పార్టీని ఈ భేటీ పిలవడాన్ని వ్యతిరేకిస్తూ టీఆర్ఎస్ ఈ సమావేశానికి గైర్హాజరైంది.

విభజన శక్తులకు వ్యతిరేకంగా బలమైన, సమర్థవంతమైన ప్రతిపక్షాన్ని నిర్మించే చర్యల్లో భాగంగా ఈ సమావేశాన్ని నిర్వహిస్తున్నట్లు టీఎంసీ అధినేత్రి మమతా బెనర్జీ ప్రకటించారు.

కాంగ్రెస్ తరఫున

కాంగ్రెస్ అధ్యక్షురాలు సోనియా గాంధీని ఈ భేటీకి ఆహ్వానించినప్పటికీ, ఆమె ప్రస్తుతం ఆసుపత్రిలో చికిత్స పొందుతున్నారు. దీంతో కాంగ్రెస్ నేత మల్లికార్జున ఖర్గే ఈ భేటీకి హాజరయ్యారు. కాంగ్రెస్ లేకుండా రాష్ట్రపతి ఎన్నికల్లో అభ్యర్థిని ఎన్నుకోవడం సాధ్యంకాదని, ఎందుకంటే, కాంగ్రెస్‌కు 50 శాతం ఓట్లు ఉన్నాయని ఖర్గే అన్నారు. 

అభ్యర్థి ఎవరు?

శరద్ పవార్‌ను ప్రతిపక్షాల అభ్యర్థిగా నిలపాలని మమతా బెనర్జీ గట్టిగా పట్టుపడుతున్నట్లు తెలుస్తోంది. అయితే ఈ ఎన్నికల్లో పోటీ చేసేందుకు పవార్ ససేమిరా అన్నట్లు సమాచారం.