Delhi Dehradun Expressway Accident: ఢిల్లీ- డెహ్రాడూన్ ఎక్స్‌ప్రెస్‌వేపై రోడ్డు ప్రమాదం.. నలుగురు మృతి- సేఫ్ జర్నీకి ఇవి పాటించండి

ఢిల్లీ- డెహ్రాడూన్ ఎక్స్‌ప్రెస్‌వేపై ఎగ్జిట్ మిస్ అయిందని కారును రివర్స్ చేస్తుండగా వెనుక నుంచి వేగంగా దూసుకొచ్చిన ఎస్‌యూవీ ఢీకొట్టింది. ఈ ప్రమాదంలో ఒకే కుటుంబానికి చెందిన నలుగురు మృతిచెందారు.

ఢిల్లీ- డెహ్రాడూన్ ఎక్స్‌ప్రెస్‌వేపై రోడ్డు ప్రమాదం..

Source : X.com

Show Quick Read

Key points generated by AI, verified by newsroom

• ఢిల్లీ-డెహ్రాడూన్ ఎక్స్‌ప్రెస్‌వే ప్రమాదంలో కారు రివర్స్‌ చేయగా, నలుగురు మృతి.
• ఎగ్జిట్ మిస్సవడంతో రివర్స్ చేయడం, అతివేగం ప్రమాదానికి ప్రధాన కారణం.
• రోడ్డు భద్రతా నియమాలు, క్రమశిక్షణ లేకపోతే ఘోర పరిణామాలు తప్పవు.

Delhi Dehradun Expressway Road Accident | న్యూఢిల్లీ: రోడ్డు మీద ప్రయాణం చేసే సమయంలో చాలా జాగ్రత్తగా ఉండాలి. కేవలం మనం మాత్రమే కాదు, అవతలి వ్యక్తి సైతం రోడ్ సేఫ్టీ రూల్స్, ట్రాఫిక్ నిబంధనలు పాటించాలి. ఒక చిన్న నిర్లక్ష్యం, అవగాహన లేమితో ఓ కుటుంబానికి చెందిన నలుగురు ప్రాణాలు కోల్పోయారు. ఢిల్లీ- డెహ్రాడూన్ ఎక్స్‌ప్రెస్‌వేపై జరిగిన ఘోర ప్రమాదం వీడియో సోషల్ మీడియాలో వైరల్ అవుతోంది. 

ఢిల్లీ- డెహ్రాడూన్ ఎక్స్‌ప్రెస్‌వేపై వెళ్తుండగా డ్రైవర్ ఎగ్జిట్ మిస్ అయిన తర్వాత కారును రివర్స్ చేస్తుండగా, వెనుక నుంచి అతివేగంతో వచ్చిన ఎస్‌యూవీ వీరి కారును ఢీకొట్టింది. రివర్స్ చేస్తున్న కారులో ప్రయాణిస్తున్న ఓ కుటుంబానికి చెందిన నలుగురు ప్రాణాలు కోల్పోయారు. ఈ ప్రమాదానికి సంబంధించిన వీడియో హైవేలపై రోడ్డు భద్రతా నియమాలు పాటించకపోతే జరిగే పరిణామాలకు నిదర్శనంగా నిలిచింది. 

ఎక్స్‌ప్రెస్‌వేపై ఎగ్జిట్ మిస్ అయితే ఎట్టి పరిస్థితుల్లోనూ వాహనం రివర్స్ చేయవద్దు. కొంచెం ముందుకు వెళ్లి తరువాత ఎగ్జిట్ వద్ద దిగి మళ్లీ రావడమే సురక్షితమని అధికారులు సూచించారు.  హై స్పీడ్, లాంగ్ డిస్టెన్స్, మోడరన్ ఫీచర్లు ఉన్నప్పటికీ, చిన్నపాటి నిర్లక్ష్యం కూడా ఘోర పరిణామాలకు దారితీస్తుంది. ఎక్స్‌ప్రెస్‌వేపై సురక్షితమైన డ్రైవింగ్ అనేది కేవలం రూల్స్ పాటించడం మాత్రమే కాదు, నిరంతరం అప్రమత్తతతో పాటు ఓపిక,  బాధ్యతగా ఉండాలి. జాగ్రత్తలు పాటిస్తే మీతో పాటు అవతలి వ్యక్తుల ప్రాణాలను కాపాడుకోవచ్చు.

⚠️🚨#RoadSafety ఢిల్లీ-డెహ్రాడూన్ ఎక్స్‌ప్రెస్‌వేపై ఎగ్జిట్ మిస్ కావడంతో కారును రివర్స్ చేస్తుండగా వెనుక నుంచి వేగంగా వచ్చిన ఎస్‌యూవీ ఢీకొట్టింది. ఈ ఘోర ప్రమాదంలో ఒకే కుటుంబానికి చెందిన నలుగురు అక్కడికక్కడే ప్రాణాలు కోల్పోయారు. ఎక్స్‌ప్రెస్‌వేపై ఎగ్జిట్ మిస్ అయితే ఎట్టి… pic.twitter.com/64NK51L935

— TG Govt Updates (@TGGovtUpdates) June 29, 2026

ఎక్స్‌ప్రెస్‌వేపై స్పీడ్ కంట్రోల్
ఎక్స్‌ప్రెస్‌వేపై నిర్ణీత వేగ పరిమితిని ఖచ్చితంగా పాటించాలి. సాధారణంగా వేగ పరిమితి గంటకు 80- 100 కిలోమీటర్లు మధ్య ఉంటుంది, కానీ వాతావరణం, ట్రాఫిక్‌ను బట్టి స్పీడ్ తగ్గించి నడపాలి. ముఖ్యంగా హైవేలపై వేగంగా వెళ్తూ అకస్మాత్తుగా బ్రేకులు వేయడం మానుకోవాలి. ముందు వెళ్తున్న వాహనానికి తగినంత దూరం పాటించండి. తాజా రోడ్డు ప్రమాదంలో అతివేగం వల్ల పరిస్థితి మరింత దారుణంగా మారింది. మరోవైపు ఎగ్జిట్, ఎంట్రీ మిస్ అయిన వాహనదారులు అదే మార్గంలో రివర్స్ చేసుకోవడం సైతం ప్రమాదాలకు కారణం అవుతుంది. 

లేన్ డిసిప్లిన్, ఓవర్‌టేక్ చేయడం
ఎల్లప్పుడూ ఎడమ లేన్‌లోనే ఉండాలి. కుడి లేన్‌ను ఓవర్‌టేకింగ్ కోసం మాత్రమే ఉపయోగించాలి. లేన్ మార్చేటప్పుడు ఇండికేటర్ కచ్చితంగా వేయాలి. సైడ్ మిర్రర్స్ చెక్ చేసుకుంటూ జాగ్రత్తగా వాహనం నడపాలి. ఇండికేటర్ వేయకుండా లేన్ మార్చడం లేదా తక్కువ వేగంతో వెళ్లే వాహనాలను రైట్ లేన్‌లో ఆపడం ప్రాణాల మీదకు తెస్తుంది. ఎక్స్‌ప్రెస్‌వేపై వాహనాలను రివర్స్ తీయడం లేదా రాంగ్ సైడ్ డ్రైవ్ చేయడం వల్ల ప్రమాదాలు జరుగుతాయి. 

చిన్నపాటి యాక్సిడెంట్ లేదా బ్రేక్‌డౌన్ అయినప్పుడు హజార్డ్ లైట్లు ఆన్ చేయడంతో పాటు వీలైతే రిఫ్లెక్టివ్ ట్రయాంగిల్ ఉంచాలి. NHAI హెల్ప్‌లైన్ లేదా యాప్‌ను ఉపయోగించాలని అధికారులు సూచిస్తున్నారు. వాహనం నడిపేటప్పుడు సీట్ బెల్ట్ ధరించడంతో పాటు రోడ్ సేఫ్టీ రూల్స్, ట్రాఫిక్ రూల్స్ పాటిస్తూ డ్రైవింగ్ చేయడం ద్వారా చాలా వరకు ప్రమాదాలు నివారించవచ్చు.

మరిన్ని చదవండి

బోడుప్పల్‌లో గృహప్రవేశ వేడుకలో హింస.. కుటుంబంపై 50 మంది మూకుమ్మడి దాడితో ఉద్రిక్తత

దుప్పటి అడిగినందుకు విద్యార్థినిని హాస్టల్ ఖాళీ చేపించిన వార్డెన్! చింతలపూడిలో ఘటన