Chandrayaan 3: ఈనెల 25న మరోసారి చంద్రయాన్-3 కక్ష్య పెంపు

Chandrayaan 3: చంద్రయాన్-3 కక్ష్యను మరోసారి పెంచనున్నారు శాస్త్రవేత్తలు. ఈ నెల 25వ తేదీన మరోసారి ఇంజిన్ ను మండించి తదుపరి దశలోకి చంద్రయాన్ ను మళ్లించనున్నారు.

ఈనెల 25న మరోసారి చంద్రయాన్-3 కక్ష్య పెంపు

Source : twitter/ISRO

Chandrayaan 3 Latest Updates: చంద్రయాన్ -3 కక్ష్యను మరోసారి పెంచనున్నారు. ఈ నెల 25వ తేదీన ఐదో సారి చంద్రయాన్ కక్ష్య దూరాన్ని పెంచేందుకు శాస్త్రవేత్తలు సన్నద్ధమయ్యారు. భారత అంతరిక్ష పరిశోధన సంస్థ - ఇస్రో.. సతీష్ ధావన్ స్పేస్ సెంటర్ షార్ నుంచి ఈ నెల 14వ తేదీన ప్రయోగించిన చంద్రయాన్-3 (Chandrayaan 3) మిషన్ లో భాగంగా కక్ష్య పొడగింపు చేపట్టనున్నారు. 25వ తేదీన మధ్యాహ్నం 2 నుంచి 3 గంటల మధ్య ఈ ఆపరేషన్ చేపట్టనున్నట్లు ఇస్రో అధికారులు తెలిపారు.

భూమికి సంబంధించిన కక్ష్యలో ఆఖరిసారిగా చేపట్టే ఆపరేషన్ తో చంద్రయాన్ -3 భూమి నుంచి విశ్వంలో చంద్రుడికి చేరుకునే దిశగా ప్రయాణం మొదలుపెట్టనుంది. ఆగస్టు 1వ తేదీ నాటికి చంద్రయాన్ -3 లూనార్ ఆర్బిట్ (చంద్ర కక్ష్య)కు చేరుకుంటుంది. అక్కడి నుంచి 17 రోజుల పాటు చంద్రుడి చుట్టూ పరిభ్రమిస్తూ ఆగస్టు 23వ తేదీన చంద్రునికి 30 కిలోమీటర్ల ఎత్తులో ప్రపొల్షన్ మాడ్యూల్ ల్యాండర్ ను విడిచి పెడుతుంది. 

నాలుగు  లక్షల కిలోమీటర్ల ప్రయాణం

చంద్రయాన్ 3ని బాహుబలి రాకెట్‌గా చెప్పిన ఇస్రో ఆ తరవాత దానికి  Launch Vehicle Mark 3 గా పేరు పెట్టింది. దీని బరువు 642 టన్నులు. బరువు 3,921 కిలోలు. భూమి నుంచి చంద్రుడి వరకూ దాదాపు 4 లక్షల కిలోమీటర్ల వరకూ ప్రయాణిస్తుంది. 24 రోజుల పాటు ఇది భూమి చుట్టూ ప్రదక్షిణలు చేయనుంది. ఆగస్టు 23 లేదా 24 న చంద్రుడి ఉపరితలంపై ల్యాండ్‌ అవుతుందని ఇస్రో అంచనా వేస్తోంది.

ల్యాండర్, రోవర్ మాడ్యూల్‌ వేరువేరుగా ఉన్న ఈ స్పేస్‌ క్రాఫ్ట్‌ చంద్రుడి సౌత్ పోల్‌ కి సమీపంలో ల్యాండ్ అవ్వనుంది. ప్రపొల్షన్ మాడ్యూల్ భూమి చుట్టూ పలుసార్లు తిరిగి చంద్రుడిపై దిగుతుంది. చంద్రుడిపై గ్రావిటీకి తగ్గట్టుగా మాడ్యూల్‌ మెల్లగా కిందకు దిగుతుంది. ల్యాండర్‌ విడిపోతుంది. లాంఛ్‌ అయినప్పటి నుంచి సరిగ్గా నెల రోజుల తరవాత చంద్రుడిపై మాడ్యూల్ దిగుతుంది.

తక్కువ ఖర్చుతో ప్రయోగం

చైనా, రష్యాలు జంబో రాకెట్లను ఉపయోగించి చంద్రుడిపైకి ఉపగ్రహాలను పంపించాయి. చైనా, అమెరికా దాదాపు రూ.1000 కోట్ల వరకు ఖర్చు చేస్తుండగా.. ఇస్రో మాత్రం రూ.500 కోట్ల నుంచి రూ.600 కోట్లతోనే ప్రయోగం చేపడుతోంది. చంద్రుడి కక్ష్య వరకు వెళ్లే శక్తివంతమైన రాకెట్ సైతం ఇస్రో వద్ద లేకపోయినా క్లిష్టమైన ప్రక్రియలో ప్రయోగం చేపట్టింది. భారత్ సత్తా ప్రపంచమంతా చాటేలా ప్రయోగం చేసింది.

వర్చువల్ టెలిస్కోప్‌కు చిక్కిన చంద్రయాన్ (Chandrayaan - 2)

ఇటలీలోని మన్సియానోకు చెందిన వర్చువల్ టెలిస్కోప్ ప్రాజెక్ట్ అంతరిక్షంలో తిరుగుతూ చంద్రుడి వైపు ప్రయాణిస్తున్న చంద్రయాన్-3ను చిత్రీకరించింది. అందులో చంద్రయాన్-3 ఓ చుక్కలా వేగంగా ప్రయాణిస్తోంది. భూమికి 341 కిలోమీటర్ల ఎత్తులో చంద్రయాన్-3 కదలికలను వర్చువల్ టెలిస్కోప్ గుర్తించింది. ఈ వీడియో సోషల్ మీడియాలో ట్రెండింగ్ అయ్యింది. ఇటలీకి చెందిన ఈ వర్చువల్ టెలిస్కోప్ ఖగోళానికి చెందిన పలు విషయాలను ఎప్పటికప్పుడు గుర్తించి సమాచారం ఇస్తూ ఉంటుంది. చంద్రయాన్-3 విషయంలోను ఈ టెలిస్కోప్ తన పనితనం, నైపుణ్యం ప్రదర్శించింది.