Birbhum Violence: బీర్భూమ్ బాధితులకు దీదీ సాయం- 5 లక్షల పరిహారం, ప్రభుత్వం ఉద్యోగం

బంగాల్‌ బీర్భూమ్‌లో జరిగిన హింసాత్మక ఘటనపై ప్రభుత్వం చర్యలు చేపట్టింది. బాధితులను పరామర్శించిన సీఎం మమతా బెనర్జీ పరిహారం ప్రకటించారు.

బీర్భూమ్ బాధితులకు దీదీ సాయం- 5 లక్షల పరిహారం, ప్రభుత్వం ఉద్యోగం

బంగాల్‌లోని బీర్భూమ్ జిల్లాలో జరిగిన హింసాకాండలో ప్రాణాలు కోల్పోయిన వారి కుటుంబాలను సీఎం మమతా బెనర్జీ పరామర్శించారు. ఈ ఘటనలో మృతి చెందిన 8 మంది కుటుంబాలకు రూ.5 లక్షల చొప్పున పరిహారం చెల్లిస్తామన్నారు. అంతేకాకుండా ఒక్కొక్క కుటుంబంలో ఒకరికి ప్రభుత్వ ఉద్యోగం కల్పిస్తామని హామీ ఇచ్చారు.

#WATCH | West Bengal CM Mamata Banerjee meets the kin of those killed in #Birbhum violence. Visuals from Bagtui village, Rampurhat pic.twitter.com/iIhSQjLpu8

— ANI (@ANI) March 24, 2022

మృతుల్లో ఇద్దరు బాలలు కూడా ఉండటంతో వీరికి అదనంగా రూ.50,000 చొప్పున పరిహారం చెల్లిస్తామని దీదీ అన్నారు. దుండగులు దహనం చేసిన ఇళ్ళను పునర్నిర్మించుకోవడానికి రూ.2 లక్షలు చొప్పున ఇస్తామన్నారు.

కఠిన చర్యలు

ఈ హింసాత్మక ఘటనను ఆపలేకపోయిన సీనియర్ పోలీస్ అధికారులపై కఠిన చర్యలు తీసుకుంటామని మమతా అన్నారు. ఘటనపై నిష్పాక్షికంగా దర్యాప్తు చేయిస్తామన్నారు. రాష్ట్రవ్యాప్తంగా చట్టవిరుద్ధ ఆయుధాలను, మందుగుండు సామగ్రిని స్వాధీనం చేసుకుంటామని చెప్పారు. 

మోదీ సీరియస్

ఈ హత్యాకాండను అతిక్రూరమైన ఘటనగా అభివర్ణించారు ప్రధాని నరేంద్ర మోదీ. దర్యాప్తునకు అవసరమైతే సాయం అందించేందుకు కేంద్రం సిద్ధంగా ఉందని పేర్కొన్నారు. ఈ ఘటనకు పాల్పడినవారిని అసలు క్షమించకూడదని మోదీ అన్నారు.

దారుణం

రాంపుర్ హట్ పట్టణానికి సమీపంలో ఉన్న బగ్టుయి గ్రామంలో దుండగులు మంగళవారం హింసాకాండకు పాల్పడ్డారు. ఓ ఇంటిలో ఉన్న ఎనిమిది మందిని సజీవ దహనం చేశారు. అంతకుముందు వీరిని తీవ్రంగా కొట్టినట్లు పోస్ట్‌మార్టం నివేదిక వెల్లడించింది. ఈ హింసాకాండలో దాదాపు 12 ఇళ్ళను తగులబెట్టారు. టీఎంసీ నేత భడు షేక్ హత్యానంతరం ఈ హింసాకాండ జరిగింది.

ఈ కేసులకు సంబంధించి పోలీసులు 23 మందిని అరెస్టు చేశారు. షేక్‌ను హత్య చేయడానికి బాంబు దాడి చేసిన వ్యక్తి కూడా అరెస్టయినవారిలో ఉన్నాడు. ఈ హింసాకాండలో మరణించినవారి మృతదేహాలకు నిర్వహించిన పోస్ట్‌మార్టమ్ నివేదిక ప్రకారం, మొదట వీరిని తీవ్రంగా కొట్టి, హింసించి, ఆ తర్వాత సజీవ దహనం చేసినట్లు  తెలుస్తోంది. మృతుల్లో ముగ్గురు మహిళలు, ఇద్దరు బాలలు ఉన్నారు.