Owaisi Z-Category Security: ఓవైసీకి ఇంకా ముప్పు ఉంది.. Z కేటగిరీ భద్రత తీసుకోవాలి: అమిత్ షా

అసదుద్దీన్ ఓవైసీపై జరిగిన దాడి గురించి రాజ్యసభలో వివరించారు కేంద్ర హోంమంత్రి అమిత్ షా.

అమిత్ షా

ఉత్తర్‌ప్రదేశ్‌లో ఏఐఎమ్ఐఎమ్ అధినేత అసదుద్దీన్ ఓవైసీపై జరిగిన దాడి గురించి కేంద్ర హోంమంత్రి అమిత్ షా.. రాజ్యసభలో ఓ ప్రకటన చేశారు. ప్రభుత్వం అందించే జడ్ కేటగిరీ భద్రతను స్వీకరించాలని ఓవైసీని కోరారు అమిత్ షా. హాపుర్ జిల్లాకు ఓవైసీ వస్తున్నట్లు అధికారులకు సమాచారమేమీ లేదని తెలిపారు. ఘటన తర్వాత ఓవైసీ సురక్షితంగా దిల్లీకి చేరుకున్నారని వివరించారు.

Home Ministry took report from State Govt immediately. On basis of earlier inputs from central security agencies,Centre had ordered to provide him security. But due to his unwillingness to avail security,Delhi & Telangana Police's efforts to provide him security didn't succeed:HM pic.twitter.com/xE8vR2NRXG

— ANI (@ANI) February 7, 2022

" ఘటన తర్వాత కేంద్ర హోంశాఖ.. రాష్ట్ర ప్రభుత్వం నుంచి వెంటనే నివేదిక తెప్పించింది. భద్రతా సంస్థల నుంచి అందిన సమాచారం ఆధారంగా కేంద్ర ప్రభుత్వం ఇదివరకే ఆయనకు భద్రత కల్పించే ఏర్పాట్లు చేసింది. కానీ ఆయన నిరాకరించడం వల్ల దిల్లీ, తెలంగాణ పోలీసుల ప్రయత్నాలు ఫలించలేదు. ఘటన తర్వాత ఓవైసీకి ఉన్న ముప్పును మరోసారి మదింపు చేశాం. జడ్ కేటగిరీ భద్రత కల్పించాలని ఆదేశించాం. కానీ ఆయన మౌఖికంగా చేసిన వ్యాఖ్యలను బట్టి దీన్ని తిరస్కరించినట్లు తెలుస్తోంది. ఇంకా భద్రతాపరమైన ముప్పు ఉన్నందున.. కేంద్రం అందిస్తున్న జడ్ కేటగిరీ భద్రతను ఓవైసీ స్వీకరించాలని కోరుతున్నా                                                 "

-అమిత్ షా,  కేంద్ర హోంమంత్రి

ఈ ఘటనపై దర్యాప్తు కొనసాగుతోందని షా తెలిపారు. కారును ఫోరెన్సిక్ బృందాలు క్షుణ్నంగా పరిశీలిస్తున్నాయని చెప్పారు. ఘటన జరిగిన ప్రాంతం నుంచి ఆధారాలు సేకరిస్తున్నాయని వెల్లడించారు. ప్రభుత్వ వర్గాల అంచనా ప్రకారం ఓవైసీకి ఇంకా భద్రతాపరమైన ముప్పు ఉందన్నారు.

దాడి ఇలా..

అసదుద్దీన్‌ ఓవైసీపై గురువారం ఉత్తరప్రదేశ్‌లో హత్యాయత్నం జరిగింది. పశ్చిమ యూపీలో అసెంబ్లీ ఎన్నికలు ప్రచారంలో పాల్గొని, గురువారం దిల్లీకి తిరిగివస్తుండగా హపూర్‌-ఘజియాబాద్‌ మార్గంలో ఛిజార్సీ టోల్‌ప్లాజా సమీపంలో ఓవైసీ కారుపై దుండగులు కాల్పులు జరిపారు. సాయంత్రం 6 గంటలకు ఈ సంఘటన జరిగినట్లు ఓవైసీ స్వయంగా వెల్లడించారు. ఈ కాల్పుల్లో ఎవరూ గాయపడలేదు.

ఓవైసీ కారుపై కాల్పుల ఘటన నేపథ్యంలో ఆయనకు 'Z' కేటగిరీ భద్రత కల్పిస్తూ శుక్రవారం కేంద్ర హోం మంత్రిత్వ శాఖ నిర్ణయం తీసుకుంది. Z‌ కేటగిరీ కింద 22 మంది భద్రతా సిబ్బందితోపాటు ఒక ఎస్కార్ట్‌ వాహనాన్ని కేటాయించనుంది. వీరిలో నలుగురు నుంచి ఆరుగురు ఎన్‌ఎస్‌జీ కమాండోలు, పోలీసు సిబ్బంది కూడా ఉంటారు. అయితే కేంద్ర నిర్ణయాన్ని అసదుద్దీన్‌ తిరస్కరించారు.