Breaking News: పీఆర్సీపై 72 గంటల్లో సీఎం జగన్ కీలక నిర్ణయం

ఏపీ, తెలంగాణ రాష్ట్రాలతో పాటు దేశ వ్యాప్తంగా, అంతర్జాతీయంగా నేడు జరిగే వార్తల అప్‌డేట్స్, వివరాలు మీకోసం..

Background

ఈశాన్య బంగాళాఖాతంలో ఏర్పడిన అల్పపీడన ప్రభావం దక్షిణాది రాష్ట్రాలైన ఏపీ, తెలంగాణ, తమిళనాడు రాష్ట్రాలపై ఉంటుందని భారత వాతావరణ కేంద్రం తెలిపింది. తక్కువ ఎత్తులో ఈశాన్య దిశ నుంచి బంగాళాఖాతం తీర ప్రాంతాల్లో, తమిళనాడు, ఏపీ తీరం వెంట బలమైన గాలులు వీస్తున్నాయి. వీటి ప్రభావంతో ఏపీలో మరో రెండు రోజులపాటు వర్షాలు కురవనున్నాయి. నేడు, రేపు తేలికపాటి నుంచి ఓ మోస్తరు వర్షాలు కురిసే అవకాశం ఉందని అమరావతి వాతావరణ కేంద్రం తెలిపింది. 
ఉత్తర కోస్తాంధ్ర, యానాంలలో నేటి నుంచి రెండు రోజులపాటు తేలికపాటి జల్లులు కురవనున్నాయి. ఒకట్రెండు చోట్ల ఓ మోస్తరు నుంచి భారీ వర్షాలు, ఉరుములు మెరుపులతో కురిసే అవకాశం ఉందని వాతావరణ శాఖ అధికారులు అంచనా వేశారు. దక్షిణ కోస్తాంధ్రలో నేడు తేలికపాటి వర్షాలు కురవనుండగా.. రేపు కొన్ని ప్రాంతాల్లో చిరు జల్లులు కురిసే అవకాశం ఉందని తెలిపారు.
తెలంగాణ వెదర్ అప్‌డేట్..
నైరుతి బంగాళాఖాతంలో వీస్తున్న చల్ల గాలుల ప్రభావం కొంతమేర తెలంగాణలోనూ ఉంది. అయితే రాష్ట్రంలో ఎలాంటి వర్ష సూచన లేదని హైదరాబాద్ వాతావరణ కేంద్రం తెలిపింది. ముఖ్యంగా పగటి ఉష్ణోగ్రతలు ఉమ్మడి ఆదిలాబాద్, ఖమ్మం లోని కొన్ని ప్రాంతాల్లో భారీ పడిపోతాయని తెలిపింది.
తెలుగు రాష్ట్రాల్లో బంగారం ధర నేడు అతి స్వల్పంగా పెరిగింది. తెలుగు రాష్ట్రాల్లో గ్రాముకు రూ.1 చొప్పున పెరిగింది. వెండి ధర మాత్రం స్థిరంగా ఉంది. తాజాగా 22 క్యారెట్ల 10 గ్రాముల (తులం) బంగారం ధర, ఇవాళ హైదరాబాద్‌ మార్కెట్‌లో రూ.45,110 గా ఉంది. 24 క్యారెట్ల ప్యూర్ బంగారం ధర ప్రస్తుతం రూ.49,210 గా ఉంది. ఇక స్వచ్ఛమైన వెండి ధర హైదరాబాద్ మార్కెట్‌లో కిలో రూ.65,100గా ఉంది. తెలంగాణ వ్యాప్తంగా మిగతా నగరాల్లోనూ ఇవే ధరలు అమల్లో ఉంటున్నాయి.
హైదరాబాద్‌లో నేడు పెట్రోల్ ధర లీటరుకు రూ.108.20గా స్థిరంగానే ఉంది. డీజిల్ ధర లీటరుకు రూ.94.62 గా నిలకడగానే ఉంది. గత కొన్ని రోజుల నుంచి హైదరాబాద్‌లో నిలకడగానే ధరలు ఉంటున్నాయి. ఇక వరంగల్‌లో నేడు (డిసెంబరు 13) రూ.0.27 పైసలు తగ్గి పెట్రోల్ ధర రూ.107.69 గా కొనసాగుతోంది. డీజిల్ ధర రూ.0.25 పైసలు తగ్గి రూ.94.14 గా ఉంది.  
ఆంధ్రప్రదేశ్‌లో ఇంధన ధరలు ఇలా..
విశాఖపట్నం మార్కెట్‌లో పెట్రోల్ ధర ప్రస్తుతం రూ.109.95గా ఉంది. పాత ధరతో పోలిస్తే ఏకంగా రూ.0.59 పైసలు పెరిగింది. డీజిల్ ధర విశాఖపట్నంలో రూ.96.01గా ఉంది. ఇది రూ.0.54 పైసలు పెరిగింది. ఇక విజయవాడ మార్కెట్‌లో పెట్రోల్ ధర నేడు కాస్త తగ్గింది. లీటరు ధర ప్రస్తుతం రూ.0.15 పైసలు పెరిగి రూ.110.36 గా ఉంది. డీజిల్ ధర రూ.0.14 పైసలు పెరిగి రూ.96.45గా ఉంది. అయితే, అమరావతి ప్రాంతంలో కొద్ది రోజుల ఇంధన ధరలు గమనిస్తే స్వల్పంగా హెచ్చుతగ్గులు ఉన్నాయి.

18:54 PM (IST)  •  13 Dec 2021

పీఆర్సీపై 72 గంటల్లో సీఎం జగన్ కీలక నిర్ణయం

పీఆర్సీపై ఏపీ సీఎం జగన్ కు నివేదిక అందించామని సీఎస్ సమీర్ శర్మ తెలిపారు. 72 గంటల్లో సీఎం జగన్ పీఆర్సీపై కీలక నిర్ణయం తీసుకోనున్నట్లు పేర్కొన్నారు. 
 

16:30 PM (IST)  •  13 Dec 2021

తమిళనాడు శ్రీరంగనాథ ఆలయంలో సిఎం కేసీఆర్ ప్రత్యేక పూజలు

తెలంగాణా ముఖ్యమంత్రి కేసీఆర్ దంపతులు తమిళనాడులోని ప్రసిద్ది చెందిన రంగనాథ స్వామి ఆలయాన్ని సందర్శించుకున్నారు. అక్కడ ప్రత్యేక పూజలు చేశారు. ఆలయానికి చేరుకున్న కేసీఆర్‌కు తమిళనాడు మంత్రి అరుణ్‌ నెహ్రూ, కలెక్టర్‌ శ్రీనివాస్ పూర్ణకుంభంతో స్వాగతం పలికారు. అనంతరం ఆయన గజేంద్రుణికి ప్రత్యేక పూజలు చేశారు. 

15:57 PM (IST)  •  13 Dec 2021

బెయిల్‌ రద్దు పిటిషన్‌పై సీఎం జగన్‌కు తెలంగాణ హైకోర్టు నోటీసులు

 జగన్ మోహన్‌రెడ్డి బెయిల్‌ పిటిషన్‌పై తెలంగాణ హైకోర్టులో విచారణ జరిగింది. వైఎస్‌ఆర్‌సీపీ ఎంపి రఘురామకృష్ణరాజు వేసిన పిటిషన్‌పై విచారణ చేపట్టింది. జగన్ బెయిల్ రద్దు చేయాలని రఘురామకృష్ణ రాజు పిటిషన్ వేశారు. ఆదాయానికి మించిన ఆస్తుల కేసులో 11 ఛార్జ్‌షీట్లు విచారణలో ఉన్నాయని కోర్టుకు వివరించారు పిటిషనర్‌ రఘురామకృష్ణరాజు తరఫున న్యాయవాది.  బెయిల్‌ రద్దు చేసి ఆ ఛార్జ్‌ షీట్లపై విచారణ చేయాలని కోర్టుకు అభ్యర్థించారు. బెయిల్‌ రద్దుకు సంబంధించిన పిటిషన్‌ను ఇప్పటికే సీబీఐ కోర్టు కొట్టేసింది. దీంతో రఘురామకృష్ణరాజు హైకోర్టును ఆశ్రయించారు. పిటిషనర్‌ చెప్పింది విన్న హైకోర్టు జగన్‌కు నోటీసులు జారీ చేసింది. అనంతరం విచారణ రెండు వారాలకు వాయిదా వేసింది. 

15:41 PM (IST)  •  13 Dec 2021

బాలీవుడ్ నటి కరీనా కపూర్ కు కరోనా వైరస్

బాలీవుడ్ నటి కరీనా కపూర్ కు కరోనా సోకింది. అమృత అరోరాకు సైతం కొవిడ్ ఉన్నట్టు తేలింది. వీరిద్దరూ కరోనా నిబంధనలను ఉల్లంఘించి చాలా పార్టీలకు హాజరైనట్టు తెలుస్తోంది. ఈ ఇద్దరు సూపర్ స్ప్రెడర్‌లుగా మారే అవకాశం ఉంది. కరీనా కపూర్, అమృతా అరోరాతో పరిచయం ఉన్న వ్యక్తులు కరోనా పరీక్ష చేయించుకోవాల్సిందిగా ముంబయి అధికారులు ఆదేశించారు. 

14:22 PM (IST)  •  13 Dec 2021

సమంతకు అస్వస్థత

ప్రముఖ హీరోయిన్ సమంత తీవ్ర అస్వస్థతకు గురయ్యారు. ఈమె నిన్న కడపలో పర్యటించిన సంగతి తెలిసిందే. అక్కడ ఓ షాపింగ్ మాల్‌ను ప్రారంభించారు. కడప నుంచి హైదరాబాద్ చేరుకున్న తర్వాత అస్వస్థతకు గురయినట్లుగా తెలుస్తోంది. జలుబు, వైరల్ ఫివర్‌తో సమంత ఇబ్బందిపడుతున్నట్లుగా సమాచారం. చికిత్స కోసం హైదరాబాద్‌లోని ఏఐజీ అసుపత్రిలో చేరారు.