Excessive Typing Side Effects : రోజంతా టైపింగ్ చేస్తున్నారా? అయితే జాగ్రత్త.. మీకు చేతి, మణికట్టు సమస్యలు రావచ్చు
Repetitive Strain Injuries : కొందరు చాలా గట్టిగా టైప్ చేస్తారు. మరికొందరు రోజంతా టైప్ చేస్తూనే ఉంటారు. ఇలాంటి వారికి ఫ్యూచర్లో చేతి, మణికట్టు, వేళ్లు డ్యామేజ్ అవుతాయంటున్నారు నిపుణులు. ఎందుకంటే
- కంప్యూటర్లు, ల్యాప్టాప్లు, మొబైల్ ఫోన్ల అతి వాడకం వల్ల చేతులు, మణికట్టు సమస్యలు.
- పునరావృతమయ్యే ఒత్తిడి గాయాలు (RSIs) పెరుగుతున్నాయి, లక్షణాలను నిర్లక్ష్యం చేయకూడదు.
- తప్పు భంగిమ, మధ్యలో విరామం తీసుకోకపోవడం సమస్యను మరింత తీవ్రతరం చేస్తాయి.
- నివారణకు సరైన భంగిమ, వ్యాయామాలు, అవసరమైతే వైద్యుల సలహా తీసుకోవాలి.
Typing Could Lead to Serious Hand Problems : ఈరోజుల్లో కంప్యూటర్లు, ల్యాప్టాప్లు, మొబైల్ ఫోన్లు లేకుండా పని చేయడం దాదాపు అసాధ్యంగా మారింది. ఐటీ ఉద్యోగులు, ఆఫీస్ వర్కర్స్, విద్యార్థులు, గేమర్స్ ఇలా అన్ని రకాల వారు గంటల తరబడి టైపింగ్ చేయడం, మౌస్ ఉపయోగించడం చేస్తున్నారు. అయితే ఇలా నిరంతరం చేతులను ఒకే విధంగా ఉపయోగించడం వల్ల చేతులు, మణికట్టు, వేళ్లు, మోచేయులు, భుజాలపై తీవ్ర ప్రభావం పడుతుందని అంటున్నారు నిపుణులు.
హైదరాబాద్లోని యశోద హాస్పిటల్స్కు చెందిన క్లినికల్ డైరెక్టర్, సీనియర్ కన్సల్టెంట్ ఆర్థోపెడిక్, రోబోటిక్ జాయింట్ రీప్లేస్మెంట్ & ఆర్థ్రోస్కోపీ సర్జన్ డాక్టర్ సునీల్ దాచేపల్లి ప్రకారం.. ప్రస్తుతం రిపిటేటివ్ స్ట్రెయిన్ ఇంజరీస్ కేసులు ఎక్కువ అవుతున్నాయి. ముఖ్యంగా ఎక్కువసేపు కీబోర్డ్, ల్యాప్టాప్, మొబైల్ వాడేవారిలో ఈ సమస్యలు ఎక్కువగా కనిపిస్తున్నాయని ఆయన తెలిపారు.
సమస్యలకు కారణాలు
ఒకే రకమైన కదలికలను పదే పదే చేయడం వల్ల చేతుల్లోని కండరాలు, టెండన్స్, నరాలు, జాయింట్లపై ఒత్తిడి పెరుగుతుందని తెలిపాపు డాక్టర్ సునీల్. దీని కారణంగా కార్పల్ టన్నెల్ సిండ్రోమ్, టెండనైటిస్, ట్రిగ్గర్ ఫింగర్, టెన్నిస్ ఎల్బో, మణికట్టు నొప్పి, నరాల ఒత్తిడి వంటి సమస్యలు వస్తున్నాయన్నారు.
మొదట్లో లక్షణాలు తక్కువగా కనిపిస్తాయని.. దీంతో చాలామంది దానిని నిర్లక్ష్యం చేస్తారని తెలిపారు. కానీ తర్వాత పరిస్థితి తీవ్రమై రోజువారీ పనులు చేయడం కూడా కష్టంగా మారే అవకాశం ఉందని హెచ్చరిస్తున్నారు.
ప్రారంభ లక్షణాలు ఇవే
ఈ సమస్యలు మొదరయ్యే ముందు ప్రారంభంలో కొన్ని లక్షణాలు కనిపిస్తాయట. వేళ్లు మొద్దుబారడం, మణికట్టు లేదా బొటనవేలు నొప్పి, ఉదయం సమయంలో చేతులు గట్టిపడినట్లు అనిపించడం, వస్తువులను బలంగా పట్టుకోలేకపోవడం, మోచేయి నుంచి చేతివరకు మంటగా అనిపించడం, వేళ్లు లాక్ అయినట్లు లేదా క్లిక్ శబ్దం రావడం, రాత్రి సమయంలో లేదా ఎక్కువసేపు టైపింగ్ చేసిన తర్వాత నొప్పి పెరగడం వంటి లక్షణాలు కనిపిస్తాయి.
భంగిమ కూడా కారణమే
తప్పు పొజిషన్లో కూర్చొని పని చేయడం కూడా ఈ సమస్యలకు ప్రధాన కారణమని చెప్తున్నారు నిపుణులు. టైపింగ్ సమయంలో మణికట్టును వంచి ఉంచడం, నిరంతరం మౌస్ వాడడం, చేతులకు సపోర్ట్ లేకుండా పని చేయడం, చెడు భంగిమలో కూర్చోవడం వల్ల చేతులపై ఒత్తిడి మరింత పెరుగుతుంది.
అలాగే మధ్యలో బ్రేక్స్ తీసుకోకుండా గంటల తరబడి స్క్రీన్ ముందు కూర్చోవడం వల్ల కూడా కండరాల అలసట, ఇన్ఫ్లమేషన్ మరింత ఎక్కువవుతాయి.
నిర్లక్ష్యం చేస్తే..
ప్రారంభ దశలో జాగ్రత్తలు తీసుకోకపోతే ఈ సమస్యలు ముదిరిపోయే ప్రమాదం ఉంది. కొన్ని సందర్భాల్లో స్ప్లింట్స్, ఫిజియోథెరపీ, మందులు, ఇంజెక్షన్లు అవసరం కావచ్చు. నరాలపై ఒత్తిడి ఎక్కువైతే శస్త్రచికిత్స కూడా చేయాల్సి రావచ్చని వైద్యులు చెప్తున్నారు.
తీసుకోవాల్సిన జాగ్రత్తలు
చేతులు, మణికట్టును కాపాడుకోవాలంటే ప్రతి 45 నుంచి 60 నిమిషాలకు చిన్న బ్రేక్ తీసుకోవాలి. మణికట్టు, వేళ్ల స్ట్రెచింగ్ వ్యాయామాలు చేయాలి. టైపింగ్ సమయంలో మణికట్టును నిటారుగా ఉంచాలి. ఎర్గోనామిక్ కీబోర్డ్, మౌస్, కుర్చీలు ఉపయోగించాలి. కీబోర్డ్పై ఎక్కువ బలంగా టైప్ చేయకూడదు. స్క్రీన్ను కళ్ల స్థాయిలో ఉంచుకోవాలి. వ్యాయామం చేస్తూ కండరాల బలం, ఫ్లెక్సిబిలిటీ పెంచుకోవాలి.
వైద్య సహాయం ఎప్పుడు తీసుకోవాలంటే..
ఈ సమస్య కొన్ని వారాలకంటే ఎక్కువ రోజులు ఉంటే జాగ్రత్త పడాలి. చేతి నొప్పి, మొద్దుబారడం, బలహీనత, పనులు చేయడంలో ఇబ్బంది వంటి లక్షణాలు కొనసాగితే వైద్యులను సంప్రదించాలి. ముందుగానే చికిత్స తీసుకుంటే సమస్య తీవ్రమవకుండా అరికట్టవచ్చని నిపుణులు చెప్తున్నారు.
గమనిక : ఈ కథనంలో అందించిన సమాచారం నిపుణులు పంచుకున్నారు. ఇది సాధారణ సమాచార ప్రయోజనాల కోసం మాత్రమే ఉద్దేశించబడింది. వృత్తిపరమైన వైద్య సలహా, రోగ నిర్ధారణ లేదా చికిత్సకు ప్రత్యామ్నాయం కాదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే, ఎల్లప్పుడూ మీ వైద్యుడు లేదా ఇతర అర్హత కలిగిన ఆరోగ్య సంరక్షణ ప్రదాత సలహా తీసుకోండి.
Before You Go
Simple Yoga for Body Fat | చెడు కొవ్వును సింపుల్ యోగాసనాలతో దూరం చేయండి
టాప్ హెడ్ లైన్స్
ట్రెండింగ్ వార్తలు
