Sleep: రాత్రిపూట ఈ ఆహారాలకు దూరంగా ఉంటే చంటి పిల్లల్లా హాయిగా నిద్రపోవచ్చు

మంచి ఆరోగ్యానికి సమతుల ఆహారంతో పాటు తగినంత నిద్ర ముఖ్యం. సంపూర్ణమైన నిద్రను పొందే వ్యక్తి ఇతర వ్యక్తుల కంటే ఆరోగ్యంగా ఉంటాడు. అందుకే రోజూ రాత్రిపూట ఏడు నుంచి ఎనిమిది గంటల నిద్రపోవాలని చెబుతారు.  చాలామందికి గాఢ నిద్ర పట్టదు. క్రమరహిత నిద్ర పట్టడం వల్ల పెద్దగా ఉపయోగం లేదు. అంటే రెండు గంటలకు, మూడు గంటలకు ఒకసారి తెలివి వచ్చి, మళ్ళీ నిద్ర పట్టడానికి ఇబ్బంది పడుతూ నిద్రపోవడం. దీన్ని గాఢనిద్ర అని భావించరు. సంపూర్ణ నిద్ర అని కూడా పిలవరు. ఏడెనిమిది గంటలు తెలివి రాకుండా నిద్రపోతేనే శరీరానికి ఆరోగ్యం. అయితే ఇలా గాఢ నిద్ర పట్టకపోవడానికి అనేక కారణాలు ఉన్నాయి. అందులో ముఖ్యమైనది ఆహారం. మీరు రాత్రిపూట తీసుకున్న ఆహారం, రాత్రి నిద్రకు భంగం కలిగిస్తుంది.

కెఫిన్
కెఫిన్ ఉండే టీ, కాఫీలు రాత్రిపూట తాగకూడదు. ఐస్ క్రీమ్,  డిజర్ట్ లలో కూడా కెఫిన్ ఉంటుంది.  కొన్ని చాక్లెట్లలో కూడా ఈ కెఫీన్ లభిస్తుంది. కాబట్టి వీటిని సాయంత్రం ఏడు దాటాక తినకపోవడం మంచిది. ఇవన్నీ నిద్రను అడ్డుకుంటాయి.

ఆమ్ల ఆహారాలు
రాత్రిపూట పుల్లగా ఉండే ఆహారాలేవీ తినకూడదు. వీటిలో ఆమ్లత్వం అధికంగా ఉంటుంది. అందుకే పుల్లటి పండ్ల రసాలు, పచ్చి ఉల్లిపాయలు, టమోటోతో వండిన వంటలు తినకూడదు. ఇవన్నీ ఎసిడిటీకి కారణం అవుతాయి. 

భారీ ఆహారాలు
రాత్రిపూట తేలిగ్గా ఉండే ఆహారమే తినాలి. భారీ ఆహారాలను తినడం వల్ల జీర్ణ వ్యవస్థ ఇబ్బంది పడుతుంది. పొట్ట ఉబ్బరంగా అనిపిస్తుంది. జీర్ణం కావడానికి ఎక్కువ సమయం పడుతుంది. ఇది మీ నిద్రను ప్రభావితం చేస్తుంది. కడుపు నొప్పి, కడుపు తిమ్మిరి వంటి సమస్యలు రావచ్చు. అందుకే రాత్రి పూట తేలికపాటి ఆహారాలను తీసుకోవాలి. వేపుడు పదార్థాలకు దూరంగా ఉండాలి.

ద్రవాహారాలు
రాత్రిపూట లిక్విడ్ డైట్ తీసుకోవడం పూర్తిగా మానేయాలి. లిక్విడ్ డైట్ తీసుకోవడం వల్ల మూత్ర విసర్జనకు పదేపదే లేవాల్సి వస్తుంది. అందుకే పుచ్చకాయ, దోసకాయ వంటివి రాత్రిపూట తినకూడదు. నీరు కూడా మితంగా తాగాలి. 

ఆల్కహాల్ 
ఆల్కహాల్ రాత్రి నిద్రను చాలా ప్రభావితం చేస్తుంది. జీర్ణక్రియపై చెడు ప్రభావం చూపిస్తుంది. దీనివల్ల తరచూ మూత్ర విసర్జనకు వెళ్లాల్సి వస్తుంది. నిద్రకు భంగం కలిగించే మొదటి ద్రావకం ఆల్కహాల్. 

నిద్ర తగ్గితే ఆ ప్రభావం పూర్తి శరీరంపై పడుతుంది. మెదడు కూడా సరిగా ఆలోచించలేదు. కాబట్టి ప్రతి ఒక్కరూ నిద్రకు ప్రాధాన్యత ఇవ్వాలి.

Also read: క్యాన్సర్, గుండె జబ్బులకు 2030 నాటికల్లా వ్యాక్సిన్లు, అలా జరిగితే స్వర్ణ యుగమే