HYROX Fitness Race : HYROX ఫిట్‌నెస్ రేస్ ట్రెండింగ్.. బిగినర్స్ కూడా ట్రై చేయొచ్చా? డాక్టర్ సూచనలు ఇవే

Fitness Race Trend : రన్నింగ్‌తో పాటు బలాన్నిచ్చే వ్యాయామాలతో కూడిన HYROX ఫిట్‌నెస్ రేస్ ప్రస్తుతం ట్రెండింగ్‌లో ఉంది. అయితే బిగినర్స్ దీనిలో పాల్గొనే ముందు ఎలాంటి జాగ్రత్తలు తీసుకోవాలి?

HYROX ఫిట్నెస్ ట్రెండ్ ఫాలో అవ్వాలంటే తీసుకోవాల్సిన జాగ్రత్తలివే

Source : Envato

High Intensity Fitness Race : ఫిట్‌నెస్‌పై ఆసక్తి ఉన్నవారిలో ఇప్పుడు HYROX రేస్‌పై చర్చ పెరుగుతోంది. రన్నింగ్‌తో పాటు స్ట్రెంత్ అవసరమయ్యే వ్యాయామాలు చేసే ఈ పోటీలో పాల్గొనాలని చాలామంది ఆసక్తి చూపిస్తున్నారు. అయితే జిమ్ కొత్తగా ప్రారంభించినవారు కూడా ఈ రేసులో పాల్గొనవచ్చా? దీనివల్ల మోకాళ్లు, చీలమండలపై ఎంత ఒత్తిడి పడుతుంది? గాయాల బారిన పడకుండా ఎలాంటి జాగ్రత్తలు తీసుకోవాలో.. డాక్టర్లు చెప్తోన్న విషయాలు ఏంటో చూసేద్దాం. 

HYROX

HYROX అనేది రన్నింగ్, ఫంక్షనల్ ఫిట్‌నెస్ వ్యాయామాలను కలిపి చేసే ఒక రకమైన ఫిట్‌నెస్ రేస్. ఇందులో పాల్గొనేవారు మొత్తం ఎనిమిది కిలోమీటర్లు పరుగెత్తాలి. ప్రతి కిలోమీటర్ రన్నింగ్ తర్వాత.. ఒక వ్యాయామ స్టేషన్‌లో నిర్దిష్టమైన వ్యాయామాన్ని పూర్తి చేయాలి. 
ఈ రేసులో స్లెడ్‌ను నెట్టడం, వెనక్కి లాగడం, రోయింగ్, బర్పీ బ్రాడ్ జంప్స్, ఫార్మర్స్ క్యారీ, ఇసుక సంచిని భుజాలపై మోసుకుంటూ లంజెస్ చేయడం, వాల్ బాల్స్ వంటి వ్యాయామాలు ఉంటాయి. వీటిని పూర్తి చేయడానికి శారీరక దృఢత్వంతో పాటు ఓర్పు, కండరాల బలం కూడా అవసరం.

బిగినర్స్ కూడా HYROXలో చేరవచ్చా? 

వ్యాయామాలు కొత్తగా ప్రారంభించినవారు కూడా సరైన శిక్షణతో, క్రమంగా ఫిట్‌నెస్‌ను పెంచుకుంటూ HYROX కోసం సిద్ధమవ్వవచ్చు. అంతేకానీ మొదటి నుంచే అధిక తీవ్రతతో కూడిన వ్యాయామాలు చేయడం మంచిది కాదని డాక్టర్ సునీల్ దాచేపల్లి తెలిపారు. శరీరాన్ని అలవాటు చేయకుండా ఒక్కసారిగా ఎక్కువ దూరం పరుగెత్తడం, భారీ బరువులు ఎత్తడం వల్ల గాయాల ప్రమాదం పెరగవచ్చు అంటున్నారు. 

హైదరాబాద్‌కు చెందిన యశోద హాస్పిటల్స్​లో క్లినికల్ డైరెక్టర్, సీనియర్ కన్సల్టెంట్ ఆర్థోపెడిక్, రోబోటిక్ జాయింట్ రీప్లేస్‌మెంట్ అండ్ ఆర్థ్రోస్కోపిక్ సర్జన్​గా చేస్తోన్న డాక్టర్ సునీల్ దాచేపల్లి సూచనల ప్రకారం.. రన్నింగ్, భారీ బరువులతో చేసే వ్యాయామాలు, వేగవంతమైన కదలికలు కలిసినప్పుడు కీళ్లు, కండరాలు, టెండన్లు, లిగమెంట్లపై గణనీయమైన ఒత్తిడి పడుతుంది. అందువల్ల బిగినర్స్ ముందుగా తగిన శిక్షణ తీసుకోవాలి.

ఫిట్‌నెస్‌ను పెంచుకోండి

జిమ్ కొత్తగా ప్రారంభించినవారు వేగంగా నడవడం, తేలికపాటి జాగింగ్, ప్రాథమిక స్ట్రెంగ్త్ ట్రైనింగ్‌తో మొదలుపెట్టాలి. ఆ తర్వాత శరీర సామర్థ్యాన్ని బట్టి క్రమంగా వ్యాయామాల తీవ్రతను పెంచుకోవాలి. గుండె, ఊపిరితిత్తుల సామర్థ్యంతో పాటు కండరాల బలం పెరిగిన తర్వాతే HYROX తరహా వ్యాయామాలను సాధన చేయడం మంచిది.

మోకాళ్లు, చీలమండలపై ఒత్తిడి

HYROXలో పదేపదే పరుగెత్తాల్సి ఉంటుంది. దీనివల్ల మోకాళ్లు, చీలమండలు, పాదాలపై ఒత్తిడి పెరుగుతుంది. అందుకే మొదటి రోజే ఎక్కువ దూరం పరుగెత్తకుండా, క్రమంగా దూరాన్ని, వేగాన్ని పెంచుకోవాలి. శిక్షణ తీవ్రతను ఒక్కసారిగా పెంచితే టెండన్లలో వాపు లేదా ఎముకలపై అధిక ఒత్తిడితో సంబంధం ఉన్న గాయాలు వచ్చే ప్రమాదం ఉంటుంది.

టెక్నిక్‌తో వ్యాయామాలు

స్క్వాట్స్, లంజెస్, స్లెడ్ పుష్స్, బరువులు మోస్తూ నడవడం వంటి వ్యాయామాలు చేయాలంటే కండరాల నియంత్రణ, కీళ్ల స్థిరత్వం అవసరం. అలసిపోయినప్పుడు కూడా సరైన పద్ధతిలో వ్యాయామాలు చేయడం ముఖ్యం. తప్పు టెక్నిక్‌తో బరువులు ఎత్తడం, శరీర సామర్థ్యానికి మించిన బరువులు ఉపయోగించడం వల్ల కండరాలు పట్టేయడం, కీళ్లకు గాయాలు కావడం వంటి సమస్యలు ఎదురవుతాయి. 

గాయాలు నిర్లక్ష్యం చేయకండి

గతంలో మోకాలి లిగమెంట్ల గాయాలు, మెనిస్కస్ సమస్యలు, చీలమండ బెణుకులు లేదా దీర్ఘకాలిక నడుము నొప్పి ఉన్నవారు HYROX శిక్షణ ప్రారంభించే ముందు వైద్యుల సలహా తీసుకోవాలి. గాయం నుంచి కోలుకున్నంత మాత్రాన వెంటనే అధిక తీవ్రతతో కూడిన వ్యాయామాలకు సిద్ధమైనట్లు కాదు. నొప్పి ఉందా? కీళ్లు స్థిరంగా ఉన్నాయా? కండరాల బలం తిరిగి వచ్చిందా? వంటి అంశాలను పరిశీలించి వ్యాయామాలను ఎంచుకోవాలి. 

వార్మప్, విశ్రాంతి

ప్రతి వ్యాయామ సెషన్‌కు ముందు వార్మప్ చేయాలి. శరీరానికి తగిన విశ్రాంతి ఇచ్చేందుకు శిక్షణ మధ్యలో విశ్రాంతి రోజులు కూడా ఉండాలి. ఒకేసారి రన్నింగ్ దూరం, వ్యాయామ తీవ్రత, బరువులను పెంచకూడదని డాక్టర్ సునీల్ తెలిపారు. సరైన చెప్పులు, షూలు ధరించడంతో పాటు కండరాల బలం, బ్యాలెన్స్, శరీర కదలికల సామర్థ్యాన్ని పెంచే వ్యాయామాలను కూడా ప్రణాళికలో చేర్చాలి.

నొప్పి వస్తే లైట్ తీసుకోకండి

వ్యాయామం చేసిన తర్వాత కొంత కండరాల నొప్పి లేదా అలసట ఉండవచ్చు. అయితే నొప్పి తీవ్రంగా ఉన్నా, క్రమంగా పెరుగుతున్నా, నడవడానికి లేదా పరుగెత్తడానికి ఇబ్బందిగా ఉన్నా నిర్లక్ష్యం చేయకూడదు. కీళ్ల వాపు పదేపదే రావడం, కీలు అస్థిరంగా అనిపించడం లేదా ఎముకలో ఒకేచోట నొప్పి ఉండటం వంటి లక్షణాలు కనిపిస్తే వైద్యులను సంప్రదించాలి.

ఎవరు జాగ్రత్తగా ఉండాలి?

ఇప్పటికే ఆరోగ్య సమస్యలు ఉన్నవారు, గతంలో ఆర్థోపెడిక్ గాయాలకు గురైనవారు అధిక తీవ్రతతో కూడిన శిక్షణ ప్రారంభించే ముందు తగిన వైద్య నిపుణుడిని సంప్రదించాలి. వారి ఆరోగ్య పరిస్థితి, గాయం నుంచి కోలుకున్న స్థితి ఆధారంగా వ్యాయామాల తీవ్రతను నిర్ణయించుకోవాలి.

డాక్టర్ సునీల్ ప్రకారం HYROX అనేది కేవలం వేగంగా పరుగెత్తే పోటీ మాత్రమే కాదు. దీనికి ఓర్పు, కండరాల బలం, కీళ్ల స్థిరత్వం, సరైన వ్యాయామ పద్ధతులు అవసరం. బిగినర్స్ కూడా ఇందులో పాల్గొనాలని లక్ష్యంగా పెట్టుకోవచ్చు. అయితే తొందరపడకుండా, శరీర సామర్థ్యాన్ని బట్టి క్రమంగా శిక్షణ పెంచుకోవాల్సి ఉంటుంది.

గమనిక : ఈ కథనంలో అందించిన సమాచారం నిపుణులు పంచుకున్నారు. ఇది సాధారణ సమాచార ప్రయోజనాల కోసం మాత్రమే ఉద్దేశించబడింది. వృత్తిపరమైన వైద్య సలహా, రోగ నిర్ధారణ లేదా చికిత్సకు ప్రత్యామ్నాయం కాదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే, ఎల్లప్పుడూ మీ వైద్యుడు లేదా ఇతర అర్హత కలిగిన ఆరోగ్య సంరక్షణ ప్రదాత సలహా తీసుకోండి.

 

మరిన్ని చదవండి

ఎముకల బలహీనతను సూచించే సంకేతాలు ఇవే.. జాగ్రత్త బోన్స్ విరిగిపోతాయట

రక్తం ఎక్కడ తయారవుతుందో తెలుసా? ఎముకలు ఈ ప్రక్రియలో ఎలా సహాయపడతాయి?