Jasmine Bhasin: వామ్మో, కంటి లోపల ఇలాంటి గాయాలు కూడా ఏర్పడతాయా? సీరియల్ నటికి నరకం చూపిన కార్నియల్ డ్యామేజ్ - అసలు ఏంటిది?
Jasmine Bhasin: తాజాగా బుల్లితెర నటి జాస్మిన్ భాసిన్.. తనకు కార్నియల్ డ్యామేజ్ జరిగిందని ప్రకటించింది. దీంతో అసలు కార్నియల్ డ్యామేజ్ అంటే ఏంటి, దేనివల్ల వస్తుంది అని నెటిజన్లు సెర్చ్ చేస్తున్నారు.
Jasmine Bhasin: బాలీవుడ్లో కొంతమంది బుల్లితెర హీరోయిన్లు.. వెండితెర హీరోయిన్లకు పోటీగా నటిస్తూ ఫ్యాన్ ఫాలోయింగ్ను సంపాదించుకున్నారు. అలాంటి క్రేజ్ ఉన్న నటీమణుల్లో జాస్మిన్ భాసిన్ కూడా ఒకరు. ప్రస్తుతం ఈ భామ పేరు సోషల్ మీడియాలో తెగ వైరల్ అవుతోంది. దానికి తనకు వచ్చిన వ్యాధే కారణం. తాజాగా జాస్మిన్ భాసిన్ కంటికి గాయమయ్యింది. దానివల్ల భరించలేని నొప్పితో తను డాక్టర్ను సంప్రదించింది. అప్పుడే తనకు కార్నియల్ డ్యామేజ్ జరిగిందని బయటపడింది. అసలు కార్నియల్ డ్యామేజ్ అంటే ఏంటి? దాని లక్షణాలు ఏంటి? ఎలా నివారించాలి? అని ప్రేక్షకులు సెర్చ్ చేయడం మొదలుపెట్టారు.
అలా జరిగింది..
ఈరోజుల్లో చాలామంది కళ్లద్దాలు పెట్టుకోవడం కంటే కాంటాక్ట్ లెన్స్ ధరించడమే బెటర్ అని భావిస్తున్నారు. అలాగే ఢిల్లీలో జరిగిన ఒక ఈవెంట్కు కాంటాక్ట్ లెన్స్ ధరించడం వల్ల తనకు కార్నియల్ డ్యామేజ్ జరిగిందని జాస్మిన్ భాసిన్ బయటపెట్టింది. ‘‘నా కాంటాక్ట్ లెన్స్కు ఏం సమస్య ఉందో తెలియదు కానీ అవి పెట్టుకున్న తర్వాత నా కళ్ల మండడం మొదలయ్యింది. మెల్లగా ఆ మంట చాలా పెరిగిపోయింది. ముందు నేను డాక్టర్ దగ్గరకు పరిగెత్తాలి అనుకున్నాను కానీ వర్క్ కమిట్మెంట్ ఉండడం వల్ల ఈవెంట్ అయ్యాక వెళ్దామని ఆగాను. నేను ఈవెంట్లో మొత్తం గ్లాసెస్ పెట్టుకొని ఉన్నాను. కాసేపటి తర్వాత నాకేం కనిపించలేదు’’ అని చెప్పుకొచ్చింది జాస్మిన్ భాసిన్.
కారణాలు, లక్షణాలు..
కళ్లల్లో ఉండే కార్నియాకు జరిగే గాయాన్ని కార్నియా డ్యామేజ్ అంటారని వైద్యులు చెప్తున్నారు. కార్నియా అనేది కళ్ల ముందు భాగంపై ఉండే టిష్యూ. ఇది డ్యామేజ్ అవ్వడం వల్ల కళ్ల ఆరోగ్యం దెబ్బతింటుంది. కార్నియల్ డ్యామేజ్కు ఎన్నో కారణాలు ఉంటాయి. కళ్లను ఎక్కువగా నలపడం, కెమికల్స్, కాంటాక్ట్ లెన్స్, అల్ట్రావైలెట్ రేస్ ద్వారా ఈ డ్యామేజ్ జరిగే అవకాశాలు ఎక్కువ. కళ్లు మసకగా కనిపించడం కార్నియల్ డ్యామేజ్లో మొదటి లక్షణం. కళ్లల్లో ఏదో ఉన్నట్టుగా మంట రావడం, వెలుగును చూడలేకపోవడం, కళ్లల్లో నుంచి నీళ్లు రావడం దీనికి సంబంధించిన ఇతర లక్షణాలు.
చికిత్స, నివారణ..
ఒకవేళ కళ్లలో ఏదైనా పడినట్టుగా అనిపిస్తే డాక్టర్ సహాయం లేకుండా దానిని తీసే ప్రయత్నం చేయకూడదు. పొరపాటున కళ్లల్లో కెమికల్స్ ఏమైనా పడితే వెంటనే వాటిని కడిగేయాలి. డాక్టర్ ఇచ్చిన ఐ డ్రాప్స్, ఆయింట్మెంట్స్ వంటివి మాత్రమే ఉపయోగించాలి. గాయం తగ్గేవరకు కాంటాక్ట్ లెన్స్ ఉపయోగించకూడదు. డాక్టర్ను సంప్రదించిన తర్వాత కూడా రెండురోజుల పాటు నొప్పి తగ్గకపోతే వెంటనే మరోసారి డాక్టర్ను సంప్రదిస్తే మంచిది. కెమికల్స్ దగ్గర పనిచేస్తున్నప్పుడు కచ్చితంగా కళ్లద్దాలు ఉపయోగించాలి. యూవీ నుంచి రక్షించే కళ్లద్దాలు అయితే మరీ మంచిది. చెత్త పడినప్పుడు కళ్లను కవర్ చేసుకోవాలి. కాంటాక్ట్ లెన్స్ ధరించినప్పుడు అవి సరిగా ఉన్నాయా లేదా చూసుకోవాలి.
టాప్ హెడ్ లైన్స్
ట్రెండింగ్ వార్తలు
