Flu Vaccine : ఫ్లూను నిర్లక్ష్యం చేస్తే ప్రమాదం అంటోన్న నిపుణులు.. ప్రతి ఏడాది టీకా తీసుకోవాల్సిందేనట
Flu vs Common Cold : ఫ్లూను సాధారణ జలుబుగా పొరబడటం మంచిది కాదంటున్నారు నిపుణులు. ప్రతి సంవత్సరం ఫ్లూ టీకా వేయించుకోవడం తీవ్రమైన ఇన్ఫెక్షన్ల ప్రమాదాన్ని తగ్గించడంలో సహాయపడుతుందని అంటున్నారు.
- చాలామంది ఫ్లూని సాధారణ జలుబుగా పొరబడుతున్నారు; అది తీవ్రమైనది.
- మధుమేహం, ఆస్తమా రోగులకు ఫ్లూ ప్రాణాంతకం; నివారణే ఉత్తమం.
- ఫ్లూ వైరస్ నిరంతరం మారుతుంది కాబట్టి, వార్షిక టీకా అవసరం.
- టీకా తీవ్ర అనారోగ్యాన్ని తగ్గిస్తుంది; స్వల్ప లక్షణాలు అపోహలు.
Annual Flu Shot : చాలా మంది ఫ్లూ లేదా ఇన్ఫ్లుఎంజాను కేవలం కొన్ని రోజుల్లో దానంతట అదే తగ్గిపోయే ఒక సీజనల్ జ్వరం లేదా తేలికపాటి జలుబుగా భావిస్తారు. పలు రిపోర్ట్స్ ప్రకారం.. ప్రతి సంవత్సరం ముఖ్యంగా వర్షాకాలం, శీతాకాలంలో వేలాది మంది ఫ్లూ బారిన పడుతున్నారు. అయినప్పటికీ కొద్దిమంది మాత్రమే టీకా వేయించుకోవాలని ఆలోచిస్తున్నారు. పోలియో, మీజిల్స్, హెపటైటిస్ వంటి వ్యాధులకు టీకాలు సులభంగా అందుబాటులో ఉన్నప్పటికీ.. వార్షిక ఫ్లూ టీకా మాత్రం అత్యంత తక్కువగా ఉపయోగిస్తున్న వాటిలో ఒకటిగా మిగిలిపోయిందని.. దీనిపై సరైన అవగాహన లేకపోవడమే దీనికి కారణమని అంటున్నారు.
నిపుణులు మాత్రం ఫ్లూను తేలికగా తీసుకోవద్దని చెప్తున్నారు. ప్రతి ఏడాది ఫ్లూ టీకా తీసుకోవాలని సూచిస్తున్నారు. మరి దీనిని ఎందుకు తేలికగా తీసుకోకూడదో, ప్రతి ఏడాది ఫ్లూ టీకా తీసుకోవడం ఎందుకు అవసరమో ఇప్పుడు తెలుసుకుందాం.
Also Read : వర్షాల వల్ల జలుబు, దగ్గు వస్తున్నాయా? రోగనిరోధక శక్తి కోసం వీటిని తినమంటోన్న వైద్యులు
ఫ్లూని లైట్ తీసుకోకండి..
ఫ్లూను సాధారణ జలుబుగా పొరబడటమే అతిపెద్ద అపోహ అంటున్నారు నిపుణులు. ఎందుకంటే సాధారణ జలుబుకు కారణమయ్యే వైరస్ కంటే ఫ్లూ పూర్తిగా భిన్నమైన వైరస్ వల్ల వస్తుందని.. అది చాలా తీవ్రంగా ఉంటుందని వైద్యులు చెబుతున్నారు. ఆరోగ్యంగా ఉన్నవారు కొన్ని రోజుల్లోనే కోలుకుంటారు. కానీ ముందు నుంచే అనారోగ్య సమస్యలు ఉన్నవారికి ఇది ప్రాణాంతకం కావచ్చని హెచ్చరిస్తున్నారు.
ఫ్లూ ప్రమాదం ఎవరికి ఎక్కువ?
మధుమేహం, అధిక రక్తపోటు, ఆస్తమా, గుండె జబ్బులు, మూత్రపిండాలు, కాలేయ సమస్యలు ఉన్నవారికి ఈ ప్రమాదం ఎక్కువగా ఉంటుందని తెలిపారు. అందుకే దీనిని తేలికగా తీసుకోకపోవడం మంచిదని అంటున్నారు. అలాగే ఫ్లూ వచ్చినా మందులతో నయం అవుతుంది కాబట్టి టీకా ఎందుకు వేయించుకోవాలని విస్మరిస్తూ ఉంటారు. కానీ చికిత్స కన్నా నివారణే ఎప్పుడూ ఉత్తమమైనదని వైద్యులు చెబుతారు.
ఫ్లూ అనేది టీకాతో నివారించగల వ్యాధి. టీకా వేయించుకోవడం వల్ల తీవ్రమైన అనారోగ్యం, ఆసుపత్రిలో చేరడం, చివరికి మరణం సంభవించే ప్రమాదం గణనీయంగా తగ్గుతుందని సూచిస్తున్నారు. లేదంటే ఈ వైరస్ న్యుమోనియాకు కూడా కారణం కావచ్చు. ముందు నుంచే ఉన్న ఆస్తమా లేదా గుండె జబ్బులను తీవ్రతరం చేసి, తరచుగా ఆసుపత్రిలో చేరడానికి దారితీయవచ్చు.
Also Read : డాక్టర్ దగ్గరకు వెళ్లకుండా దగ్గు, జలుబు మందులు వాడుతున్నారా? ప్రాణాలకే ముప్పు!
వ్యాక్సిన్ వేయించుకుంటే ఫ్లూ వస్తుందా?
ఫ్లూ వ్యాక్సిన్ వేయించుకోవడం వల్లనే ఫ్లూ వస్తుందనేది మరో ప్రధాన అపోహ ఉంది. వ్యాక్సిన్ వల్ల ఫ్లూ రాదని వైద్యులు స్పష్టంగా చెబుతున్నారు. కొంతమందికి వ్యాక్సిన్ వేసిన చోట తేలికపాటి నొప్పి లేదా వాపు, స్వల్ప జ్వరం, ఒళ్లు నొప్పులు లేదా ఒకటి రెండు రోజుల పాటు అలసట వంటివి కలగవచ్చు. అయితే ఈ లక్షణాలు తాత్కాలికమైనవి. శరీరం రోగనిరోధక వ్యవస్థ వ్యాక్సిన్‌కు సరిగ్గా స్పందిస్తోందని సూచిస్తాయి. దీనిని ఒక అనారోగ్యంగా పరిగణించకూడదని క్లారిటీ ఇచ్చారు.
ప్రతి ఏడాది వేయించుకోవాలా?
పోలియో లేదా తట్టు టీకాలా కాకుండా.. ఫ్లూ టీకా జీవితంలో ఒక్కసారి వేసుకునే పరిష్కారం కాదు. ఫ్లూ వైరస్ నిరంతరం రూపాంతరం చెందుతుంది. ప్రతి సీజన్‌లో కొత్త రకాలు వ్యాపిస్తాయి. దీనివల్ల పాత టీకాల ప్రభావం తగ్గుతుంది. కాబట్టి ప్రస్తుతం వ్యాపిస్తున్న రకానికి అనుగుణంగా ప్రతి సంవత్సరం కొత్త టీకా వేయించుకోవాలని వైద్యులు సిఫార్సు చేస్తున్నారు. 18 ఏళ్లు పైబడిన ప్రతి ఒక్కరూ.. ముఖ్యంగా 50 ఏళ్లు పైబడిన వారు, గర్భిణీ స్త్రీలు, ఆరోగ్య కార్యకర్తలు, మధుమేహం, అధిక రక్తపోటు ఉన్నవారు ప్రతి సంవత్సరం ఫ్లూ టీకా వేయించుకోవాలని సూచిస్తున్నారు.
Also Read : చలికాలంలో వచ్చే వ్యాధులు దూరం చేసే ఇంటి చిట్కాలు.. వీటితో జలుబు, దగ్గు, కీళ్లనొప్పులు దూరం
వ్యాక్సిన్ ఎప్పుడు తీసుకుంటే మంచిది?
భారతదేశంలోని చాలా ప్రాంతాలలో వర్షాకాలం ప్రారంభమయ్యే ముందు టీకాలు తీసుకోవడం మంచిది. లేదా వర్షాలు కురిసే సమయంలో కూడా ముందు జాగ్రత్తగా టీకా తీసుకోవాలి. దీనికోసం వైద్యులు క్వాడ్రివాలెంట్ ఫ్లూ వ్యాక్సిన్‌ను సిఫార్సు చేస్తారు. ఇది ఆ సీజన్‌లో ప్రబలంగా ఉండే అవకాశం ఉన్న నాలుగు వేర్వేరు వైరస్ రకాల నుంచి రక్షణ కల్పిస్తుంది.
జలుబు, మరిన్ని సీజనల్ వ్యాధుల గురించిన హెల్త్ టిప్స్ కోసం దీనిని క్లిక్ చేయండి.
గమనిక : ఈ కథనంలో అందించిన సమాచారం నిపుణులు పంచుకున్నారు. ఇది సాధారణ సమాచార ప్రయోజనాల కోసం మాత్రమే ఉద్దేశించబడింది. వృత్తిపరమైన వైద్య సలహా, రోగ నిర్ధారణ లేదా చికిత్సకు ప్రత్యామ్నాయం కాదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే, ఎల్లప్పుడూ మీ వైద్యుడు లేదా ఇతర అర్హత కలిగిన ఆరోగ్య సంరక్షణ ప్రదాత సలహా తీసుకోండి.
టాప్ హెడ్ లైన్స్
ట్రెండింగ్ వార్తలు
