Monsoon Diet Tips : వర్షాల వల్ల జలుబు, దగ్గు వస్తున్నాయా? రోగనిరోధక శక్తి కోసం వీటిని తినమంటోన్న వైద్యులు
Monsoon Diet for Better Immunity : వర్షాలు మొదలైపోయాయి. ఈ సమయంలో జలుబు, దగ్గుతో పాటు ఇతర వైరల్ సమస్యలు ఎక్కువగా వస్తాయి. అందుకే ఈ సమయంలో కొన్ని ఫుడ్స్ తినాలంటున్నారు నిపుణులు.
- వర్షాకాల వ్యాధుల నివారణకు ఆహారంలో మార్పులు అవశ్యం.
- అల్లం, వెల్లుల్లి, పసుపు, విటమిన్-సి పండ్లు చేర్చండి.
- ప్రోటీన్, పెరుగు, మజ్జిగ, వేడి సూప్లు రోగనిరోధకశక్తిని పెంచుతాయి.
- వేయించినవి, చక్కెర, అపరిశుభ్ర ఆహారాలకు దూరంగా ఉండాలి.
Foods To Boost Immunity in Monsoon : వర్షాలు ఎండల నుంచి ఉపశమనం కలిగించినప్పటికీ.. వర్షాకాలం వచ్చినప్పటి నుంచి సీజన్ వ్యాధులు ఎక్కువ అవుతాయి. జలుబు, దగ్గు, గొంతు నొప్పి, వైరల్ ఇన్ఫెక్షన్లు, జీర్ణ సమస్యలు తరచుగా ఇబ్బంది పెడతాయి. అందుకే ఈ సమయంలో రోగనిరోధక శక్తి పెంచుకోవడానికి కొన్ని జాగ్రత్తలు తీసుకుంటూ.. ఫుడ్ విషయంలో కొన్ని మార్పులు చేయాలని సూచిస్తున్నారు నిపుణులు.
రోగనిరోధక శక్తిని పెంచుకోవడానికి డైట్లో కొన్ని ఆహారాలు చేర్చుకోవాలి.. అలాగే కొన్ని ఫుడ్స్కి దూరంగా ఉండాలని చెప్తున్నారు. సమతుల్య ఆహారం తీసుకోవడం వల్ల శరీరంలో ఇన్ఫెక్షన్లతో పోరాడే సామర్థ్యం పెరుగుతుందని హైదరాబాద్లోని యశోద హాస్పిటల్స్ చీఫ్ డైటీషియన్గా చేస్తోన్న సుజాత స్టీఫెన్ వెల్లడించారు. ఫుడ్ విషయంలో ఎలాంటి జాగ్రత్తలు తీసుకోవాలో సూచించారు.
అలాంటి ఫుడ్ తినాలి..
వర్షాలు పడేప్పుడు లేదా వానాకాలంలో తాజాగా వండిన, వేడిగా ఉండే ఆహారాన్ని తీసుకోవడం మంచిదని నిపుణులు సూచిస్తున్నారు. ఎక్కువసేపు నిల్వ చేసిన లేదా చల్లారిన ఆహారం తీసుకోవడం వల్ల ఫుడ్బోర్న్ ఇన్ఫెక్షన్ల ప్రమాదం పెరగవచ్చని తెలిపారు. వేడి ఆహారం జీర్ణం కావడానికి సులభంగా ఉంటుందన్నారు.
అల్లం, వెల్లుల్లి, పసుపు
వర్షాకాలంలో అల్లం, వెల్లుల్లి, పసుపును కచ్చితంగా డైట్లో చేర్చుకోవాలి అంటున్నారు. ఎందుకంటే వాటిలో యాంటీ ఇన్ఫ్లమేటరీ, యాంటీ మైక్రోబియల్ గుణాలు ఉంటాయి. ఇవి శ్వాసకోశ ఆరోగ్యానికి, రోగనిరోధక శక్తిని పెంచడానికి హెల్ప్ చేస్తాయి. కూరలు, పప్పులు, సూప్లు లేదా హెర్బల్ డ్రింక్స్తో కలిపి వీటిని తీసుకోవచ్చు.
విటమిన్-సి కోసం ఫ్రూట్స్
ఉసిరికాయ, జామ, నారింజ, బత్తాయి, దానిమ్మ, బొప్పాయి, పియర్ వంటి పండ్లలో విటమిన్-సి, యాంటీఆక్సిడెంట్లు అధికంగా ఉంటాయి. ఇవి శరీరంలోని రోగనిరోధక కణాల పనితీరుకు మద్దతు ఇవ్వడంలో సహాయపడతాయి.
సూప్లు, రసం
వర్షాకాలంలో వేడి వేడి సూప్లు, రసం, హెర్బల్ టీలు, పెసరపప్పు వంటకాలు తీసుకోవడం మంచిది. ఇవి శరీరానికి హైడ్రేషన్ అందించడమే కాకుండా.. గొంతుకు ఉపశమనం కలిగిస్తాయి. వెచ్చని అనుభూతి ఇస్తాయి.
ప్రోటీన్ను లైట్ తీసుకోకండి..
రోగనిరోధక శక్తిని బలోపేతం చేయడంలో ప్రోటీన్ కీలక పాత్ర పోషిస్తుంది. కాబట్టి పప్పులు, పాలు, పెరుగు, గుడ్లు, చేపలు, చికెన్ వంటి ప్రోటీన్ ఆహారాలు యాంటీబాడీల ఉత్పత్తికి సహాయపడతాయి. కండరాల ఆరోగ్యానికి కూడా మంచివి.
పెరుగు, మజ్జిగ
వేసవిలో ఎక్కువమంది పెరుగు, మజ్జిగ తీసుకుంటారు. కానీ వర్షాలు పడేప్పుడు మానేస్తారు. కానీ వర్షాకాలంలో తాజా పెరుగు, మజ్జిగ వంటి ప్రోబయోటిక్ ఆహారాలు తీసుకోవాలని వైద్యులు సూచిస్తున్నార. ఎందుకంటే ఇవి పేగుల ఆరోగ్యాన్ని మెరుగుపరుస్తాయి. గట్ హెల్త్ బాగుంటే రోగనిరోధక శక్తి కూడా మెరుగ్గా పనిచేస్తుందని సుజాత స్టీఫెన్ తెలిపారు.
తినకూడనివి ఇవే..
వర్షాకాలంలో ఎక్కువగా వేయించిన పదార్థాలు, చక్కెర అధికంగా ఉండే పానీయాలు, పరిశుభ్రత లేని స్ట్రీట్ ఫుడ్, సరిగా కడగని పండ్లు, కూరగాయలను తీసుకోవడం వల్ల జీర్ణ సమస్యలు, ఇన్ఫెక్షన్ల ప్రమాదం పెరుగుతుంది. కాబట్టి వీటికి వీలైనంత దూరంగా ఉండాలని తెలిపారు.
తగినంత నీరు
వర్షాకాలంలో దాహం తక్కువగా అనిపించినా.. శరీరానికి అవసరమైనంత నీరు అందించడం ముఖ్యమని చెప్తున్నారు నిపుణలు. సరైన హైడ్రేషన్ రోగనిరోధక వ్యవస్థ పనితీరుకు మంచిదని చెప్తున్నారు.
అయితే రోగనిరోధక శక్తి అనేది ఏదోక ఆహారం తీసుకుంటే పెరిగిపోయేది కాదు. పోషకాహారం, తగినంత నిద్ర, క్రమం తప్పని వ్యాయామం, పరిశుభ్రత, సరైన హైడ్రేషన్ వంటి ఆరోగ్యకరమైన అలవాట్ల కలయికే ఇమ్యూనిటీ. ఇది బాగుంటే వర్షాకాలంలో వచ్చే జలుబు, దగ్గు, ఇతర సీజనల్ ఇన్ఫెక్షన్ల నుంచి రక్షణ అందడం సులభం అవుతుంది.
మరిన్ని ఇంట్రెస్టింగ్ హెల్త్ ఆర్టికల్స్, ఇంటి చిట్కాల కోసం దీనిని క్లిక్ చేయండి.
గమనిక : ఈ కథనంలో అందించిన సమాచారం నిపుణులు పంచుకున్నారు. ఇది సాధారణ సమాచార ప్రయోజనాల కోసం మాత్రమే ఉద్దేశించబడింది. వృత్తిపరమైన వైద్య సలహా, రోగ నిర్ధారణ లేదా చికిత్సకు ప్రత్యామ్నాయం కాదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే, ఎల్లప్పుడూ మీ వైద్యుడు లేదా ఇతర అర్హత కలిగిన ఆరోగ్య సంరక్షణ ప్రదాత సలహా తీసుకోండి.
టాప్ హెడ్ లైన్స్
ట్రెండింగ్ వార్తలు
