Low Fibre Risks : ఫైబర్ ఫుడ్స్ తినకపోతే జీర్ణక్రియ, బరువు తగ్గడంపై ఎలాంటి ఎఫెక్ట్ ఉంటుంది? ఏవి తింటే మంచిది?

Fibre-Rich Foods : తినే ఆహారంలో ఫైబర్ ఎక్కువ లేకపోతే.. బరువు తగ్గడం కష్టమవుతుందని.. మలబద్ధకం సమస్య పెరగవచ్చని చెప్తున్నారు. ఇది ఎంతవరకు నిజం.. ఫైబర్ కోసం ఎలాంటి ఫుడ్స్ తీసుకోవాలో చూసేద్దాం.

డైట్‌లో ఫైబర్ తగ్గితే శరీరానికి కలిగే ఇబ్బందులు ఇవే

Source : Envato

Show Quick Read

Key points generated by AI, verified by newsroom

• ఫైబర్ జీర్ణక్రియకు, మొత్తం శరీర ఆరోగ్యానికి చాలా ముఖ్యం.
• తక్కువ ఫైబర్ మలబద్ధకం, ఆకలి, రక్తంలో చక్కెరను పెంచుతుంది.
• ఫైబర్ పండ్లు, కూరగాయలు, తృణధాన్యాలు, పప్పులలో సమృద్ధిగా లభిస్తుంది.
• ఫైబర్ క్రమంగా పెంచి, నీరు త్రాగడం, వైద్య సలహా తీసుకోండి.

Fibre Importantance On Health : రోజువారీ ఆహారంలో కార్బోహైడ్రేట్లు, ప్రోటీన్‌ల గురించి ఎక్కువగా మాట్లాడుతుంటాం. కానీ శరీర ఆరోగ్యానికి అవసరమైన మరో ముఖ్యమైన పోషకం ఫైబర్. పండ్లు, కూరగాయలు, పప్పులు, తృణధాన్యాల్లో లభించే ఫైబర్ జీర్ణవ్యవస్థ ఆరోగ్యంగా పనిచేయడంలో కీలక పాత్ర పోషిస్తుంది. ఫైబర్ తక్కువగా తీసుకుంటే మలబద్ధకం వంటి సమస్యలతో పాటు ఇతర ఆరోగ్య సమస్యలు కూడా వచ్చే అవకాశం ఉంటుంది.

అందుకే శరీరానికి ఫైబర్ అందించాలని చెప్తున్నారు నిపుణులు. కేవలం ప్రోటీన్ మాత్రమే తీసుకుని.. కార్బ్స్ తగ్గిస్తే సరిపోదని.. శరీరానికి తగినంత ఫైబర్ కూడా ఇవ్వాలని చెప్తున్నారు. మరి ఫైబర్ తక్కువగా తీసుకుంటే ఏమవుతుంది? ఫైబర్ తింటే కలిగే లాభాలు ఏంటో.. ఏ ఫుడ్స్​లో ఫైబర్ ఎక్కువగా దొరుకుతుందో ఇప్పుడూ చేసేద్దాం. 

ఫైబర్ తీసుకోకపోతే వచ్చే సమస్యలు..

మలబద్ధకం సమస్య  

ఫైబర్ మలాన్ని పేగుల్లో సులభంగా కదలడానికి సహాయపడుతుంది. ఆహారంలో ఫైబర్ తక్కువగా ఉంటే మలం గట్టిగా మారి మలబద్ధకం సమస్య వచ్చే అవకాశం ఎక్కువగా ఉంటుంది.

ఎక్కువ ఆకలి   

ఫైబర్ ఎక్కువగా ఉండే ఆహారాలు జీర్ణం కావడానికి కొంత సమయం పడుతుంది. దీంతో ఎక్కువసేపు కడుపు నిండిన భావన ఉంటుంది. ఫైబర్ తక్కువగా ఉండే ప్రాసెస్డ్ ఫుడ్స్ తీసుకుంటే త్వరగా ఆకలి వేసి, అవసరానికి మించి తినే అవకాశం ఉంటుంది.

బరువు నియంత్రణ  

ఫైబర్ ఉన్న ఆహారాలు కడుపు నిండిన భావనను పెంచడంలో సహాయపడతాయి. దీంతో ఆహారం పరిమాణాన్ని నియంత్రించుకోవడం సులభం కావచ్చు. అయితే ఫైబర్ మాత్రమే బరువు తగ్గించదు. సమతుల్య ఆహారం, వ్యాయామం కూడా అవసరం.

రక్తంలో చక్కెర స్థాయిలు  

డైటరీ ఫైబర్ కొన్ని కార్బోహైడ్రేట్ల జీర్ణక్రియను నెమ్మదింపజేయడంలో సహాయపడుతుంది. దీంతో భోజనం తర్వాత రక్తంలో చక్కెర వేగంగా పెరగకుండా ఉండేందుకు తోడ్పడవచ్చు.

పేగుల ఆరోగ్యంపై ప్రభావం 

కొన్ని రకాల ఫైబర్ పేగుల్లో ఉండే ప్రయోజనకరమైన బ్యాక్టీరియాకు ఆహారంగా పనిచేస్తుంది. ఫైబర్ తక్కువగా ఉండే ఆహారం పేగుల ఆరోగ్యకరమైన సూక్ష్మజీవుల సమతుల్యతపై ప్రభావం చూపే అవకాశం ఉంది.

ఫైబర్ తీసుకోవడం వల్ల కలిగే ప్రయోజనాలు

ఫైబర్‌ను సరైన మోతాదులో తీసుకోవడం వల్ల జీర్ణక్రియ సక్రమంగా సాగేందుకు, మలబద్ధకం తగ్గేందుకు సహాయపడుతుంది. అలాగే కడుపు నిండిన భావన ఎక్కువసేపు ఉండటం వల్ల బరువు నియంత్రణకు మద్దతు ఇవ్వవచ్చు. కరిగే ఫైబర్ గుండె ఆరోగ్యానికి, కొలెస్ట్రాల్ స్థాయిలను అదుపులో ఉంచడానికి కూడా ఉపయోగపడవచ్చు.

ఫైబర్ ఫుడ్స్ 

మీ డైట్​లో ఫైబర్ ఉండాలనుకుంటే.. కొన్ని ఫుడ్స్ కచ్చితంగా తీసుకోవాలి. జామపండు, యాపిల్, బేరిపండ్లు, నారింజ వంటి పండ్లను జ్యూస్ కంటే పండుగానే తినడం మంచిది. తొక్క తినడానికి అనుకూలంగా ఉంటే అలాగే తీసుకోవచ్చు. క్యారెట్, బీన్స్, బెండకాయ, బ్రొకోలీ, ఆకుకూరలు వంటి వాటిని రోజువారీ ఆహారంలో చేర్చుకోవాలి.

కందిపప్పు, పెసరపప్పు, శనగలు, రాజ్మా, బీన్స్ వంటివి ఫైబర్‌తో పాటు ప్రోటీన్‌ను కూడా అందిస్తాయి. ఓట్స్, బ్రౌన్ రైస్, చిరుధాన్యాలు,గోధుమతో చేసిన ఆహారాలను తీసుకోవచ్చు. చియా సీడ్స్, అవిసె గింజలు వంటి వాటిలో కూడా ఫైబర్ ఉంటుంది. వీటిని మోతాదులో తీసుకోవాలి. 

ఫైబర్ ఒకేసారి పెంచేస్తే.. 

ఇప్పటివరకు తక్కువ ఫైబర్ తీసుకుంటున్నవారు ఒక్కరోజులో ఫైబర్ పెంచేయాలి అనుకోకూడదు. అధిక మొత్తంలో ఫైబర్ తీసుకుంటే.. గ్యాస్, కడుపు ఉబ్బరం లేదా అసౌకర్యం వంటి ఇబ్బందులు కలుగుతాయి. కాబట్టి ఆహారంలో క్రమంగా ఫైబర్‌ను పెంచాలి. ఫైబర్ ఎక్కువగా తీసుకునేటప్పుడు తగినంత నీరు తాగడం కూడా చాలా ముఖ్యం. 

రోజుకు ఎంత ఫైబర్ అవసరమనేది.. వయసు, లింగం, ఆరోగ్య పరిస్థితిని బట్టి మారుతుంది. కేవలం ఒకే రకం ఫైబర్ ఫుడ్‌పై ఆధారపడకుండా పండ్లు, కూరగాయలు, పప్పులు, తృణధాన్యాలను కలిపి తీసుకోవడం మంచిది. దీర్ఘకాలంగా మలబద్ధకం లేదా ఇతర జీర్ణ సమస్యలు ఉంటే సొంతంగా డైట్ మార్చుకోవడం కంటే వైద్యుడి సలహా తీసుకోవడం మంచిది.

గమనిక : ఈ కథనంలో అందించిన సమాచారం నిపుణులు పంచుకున్నారు. ఇది సాధారణ సమాచార ప్రయోజనాల కోసం మాత్రమే ఉద్దేశించబడింది. వృత్తిపరమైన వైద్య సలహా, రోగ నిర్ధారణ లేదా చికిత్సకు ప్రత్యామ్నాయం కాదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే, ఎల్లప్పుడూ మీ వైద్యుడు లేదా ఇతర అర్హత కలిగిన ఆరోగ్య సంరక్షణ ప్రదాత సలహా తీసుకోండి.

 

మరిన్ని చదవండి

ఉదయాన్నే వాము నీరు తాగితే కలిగే అద్భుత లాభాలు.. బరువు తగ్గడం నుంచి గట్ హెల్త్ వరకు

దీపావళి సమయంలో గట్ హెల్త్​ని ఇలా కాపాడుకోండి.. కడుపు ఉబ్బరం, జీర్ణ సమస్యలు రాకూడదంటే