Healthy Gut : కడుపు శుభ్రం కావాలంటే డీటాక్స్ డ్రింక్స్ అవసరం లేదు.. ఈ 3 అలవాట్లు చాలు, మలబద్ధకం కూడా తగ్గిపోతుంది

Skip Detox Drinks : కడుపు శుభ్రంగా ఉండాలని.. గట్ హెల్త్ మెరుగుపడాలని చాలామంది డీటాక్స్ డ్రింక్స్ తాగుతారు. పేగుల ఆరోగ్యానికి ఇవేమి అవసరం లేదని.. కేవలం 3 పద్ధతులు ఫాలో అయితే చాలని అంటున్నారు.

డీటాక్స్ డ్రింక్స్ తాగకండి.. కడుపును శుభ్రం చేసే టిప్స్ ఇవే

Source : Envato

Show Quick Read

Key points generated by AI, verified by newsroom

• డిటాక్స్ డ్రింక్స్ బదులు, సాధారణ అలవాట్లతో జీర్ణవ్యవస్థకు ఆరోగ్యం.
• పీచు పదార్థాలు, పులియబెట్టిన ఆహారాలు పేగు ఆరోగ్యాన్ని మెరుగుపరుస్తాయి.
• రోజువారీ నడక, తగినంత నీరు మలబద్ధకం నివారిస్తాయి, ఆరోగ్యానికి.

Constipation and Gut Health : జీర్ణవ్యవస్థ ఆరోగ్యంగా ఉండాలని చాలామంది ఉదయాన్నే డిటాక్స్ డ్రింక్స్, వివిధ రకాల హెర్బల్ వాటర్స్ తాగుతుంటారు. అయితే పేగుల ఆరోగ్యాన్ని మెరుగుపరచుకోవడానికి ఖరీదైన పానీయాలు ఏవి అవసరం లేదని చెబుతున్నారు గ్యాస్ట్రోఎంటరాలజిస్ట్ డాక్టర్ సౌరభ్ సేథి. రోజూ తీసుకునే ఆహారంలో కొన్ని మార్పులు చేసుకోవడంతో పాటు, చిన్న చిన్న అలవాట్లు పాటిస్తే జీర్ణవ్యవస్థ ఆరోగ్యాన్ని కాపాడుకోవచ్చని సూచిస్తున్నారు. ఇంతకీ ఆ అలవాట్లు ఏంటో చూసేద్దాం.

ఫైబర్ రిచ్ ఫుడ్స్

పేగుల ఆరోగ్యాన్ని కాపాడుకోవడంలో ఫైబర్ కీలక పాత్ర పోషిస్తుంది. కానీ చాలామంది తగినంత పీచు పదార్థాలు తీసుకోవట్లేదని డాక్టర్ తెలిపారు. కాబట్టి డైట్లో ఉడికించిన కూరగాయలు, ఫైబర్ ఎక్కువగా ఉండే పండ్లు, తృణధాన్యాలు, పప్పుధాన్యాలు, గింజలను చేర్చుకోవాలని సూచిస్తున్నారు. 

" ఫైబర్ అనేది పేగుల్లో మంచి బ్యాక్టీరియా వృద్ధి చెందడానికి తోడ్పడుతుంది. అలాగే మలబద్ధకం సమస్యను తగ్గించడంలోనూ సహాయపడుతుంది. సాధారణంగా మహిళలు రోజుకు సుమారు 25 గ్రాములు, పురుషులు 38 గ్రాముల ఫైబర్ తీసుకోవాల్సి ఉంటుంది. అయితే వయసు, ఆహార అవసరాలను బట్టి ఈ పరిమాణం మారవచ్చు. ఫైబర్‌ను ఒక్కసారిగా ఎక్కువ చేయకుండా క్రమంగా పెంచుకోవాలి. "

-డాక్టర్ సౌరభ్ సేథి 

పులియబెట్టిన ఆహారాలు 

పేగుల్లో మంచి బ్యాక్టీరియా సమతుల్యతగా ఉండటం జీర్ణవ్యవస్థకు చాలా ముఖ్యం. ఇందుకోసం రోజువారీ ఆహారంలో పెరుగు, మజ్జిగ వంటి పులియబెట్టిన ఆహారాలను చేర్చుకోవచ్చు. వీటిలో ఉండే బ్యాక్టీరియా జీర్ణవ్యవస్థ ఆరోగ్యానికి తోడ్పడుతుంది. అందుకే వేసవిలోనే కాకుండా ఏడాది పొడవునా మజ్జిగ, పెరుగు తీసుకోవచ్చు. 

 

 

 

 

 

View this post on Instagram

 

 

 

 

 

 

 

 

 

 

 

అలాగే చక్కెర ఎక్కువగా కలిపిన ఫ్లేవర్డ్ యోగర్ట్‌లకు బదులుగా సాధారణ పెరుగు తీసుకోవడం మంచిది. పాలు పడనివారు లేదా లాక్టోజ్‌ను జీర్ణించుకోలేనివారు తమకు సరిపోయే ప్రత్యామ్నాయాలను ఎంచుకోవాలి.

రోజువారీ నడక..

జీర్ణవ్యవస్థ ఆరోగ్యంగా ఉండాలంటే ఆహారంతో పాటు శారీరక శ్రమ కూడా అవసరం. రోజంతా కుర్చీలో కూర్చుని పనిచేసేవారు.. భోజనం చేసిన వెంటనే పడుకునేవారిలో కొందరికి మలబద్ధకం వంటి సమస్యలు ఎదురవుతుంటాయి. ఇలాంటి వారు ప్రతిరోజూ కొంత సమయం నడవడానికి కేటాయించాలని డాక్టర్ సౌరబ్ సేథి సూచిస్తున్నారు.

నడక పేగుల కదలికలకు తోడ్పడి మలవిసర్జన సక్రమంగా జరిగేందుకు సహాయపడుతుంది. కాబట్టి భోజనం చేసిన తర్వాత వీలైతే 10 నుంచి 15 నిమిషాలు నెమ్మదిగా నడవవచ్చు. క్రమంగా రోజుకు కనీసం 30 నిమిషాల శారీరక శ్రమ చేసేలా అలవాటు చేసుకోవాలి. అయితే తిన్న వెంటనే వేగంగా నడవడం లేదా తీవ్రమైన వ్యాయామం చేయాల్సిన అవసరం లేదు.

నీళ్లు తాగడం మరచిపోవద్దు

ఫైబర్ ఎక్కువగా తీసుకునేటప్పుడు తగినంత నీరు తాగడం చాలా ముఖ్యం. శరీరంలో నీరు సరిపడా లేకపోతే ఫైబర్ తీసుకున్నప్పటికీ మలబద్ధకం పెరిగే అవకాశం ఉంటుంది. అందుకే రోజంతా కొద్దికొద్దిగా నీళ్లు తాగుతూ ఉండాలని వైద్యులు సూచిస్తున్నారు. 

పేగుల ఆరోగ్యం కోసం డిటాక్స్ డ్రింక్స్ తప్పనిసరి కాదు. సమతుల్య ఆహారం, తగినంత ఫైబర్, రోజూ నడవడం, సరిపడా నీళ్లు తాగడం వంటి అలవాట్లు ఎక్కువ ఉపయోగకరంగా ఉంటాయి. అయితే తరచూ మలబద్ధకం, తీవ్రమైన కడుపునొప్పి, మలంలో రక్తం లేదా కారణం తెలియని బరువు తగ్గడం వంటి లక్షణాలు ఉంటే వైద్యులను సంప్రదించాలి.

గమనిక : ఈ కథనంలో అందించిన సమాచారం నిపుణులు పంచుకున్నారు. ఇది సాధారణ సమాచార ప్రయోజనాల కోసం మాత్రమే ఉద్దేశించబడింది. వృత్తిపరమైన వైద్య సలహా, రోగ నిర్ధారణ లేదా చికిత్సకు ప్రత్యామ్నాయం కాదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే, ఎల్లప్పుడూ మీ వైద్యుడు లేదా ఇతర అర్హత కలిగిన ఆరోగ్య సంరక్షణ ప్రదాత సలహా తీసుకోండి.

మరిన్ని చదవండి

గ్యాస్, అసిడిటీతో బాధపడుతున్నారా? జీర్ణ సమస్యలకు బెస్ట్ సొల్యూషన్ ఇదే

కామన్ సమస్యలకు ఇంటి చిట్కాలు.. గొంతు నొప్పి, తలనొప్పి, జీర్ణ సమస్యలకు సులభమైన పరిష్కారాలు