Egg Pickle: నెలరోజులు నిల్వ ఉండేలా కోడిగుడ్డు పికిల్, చికెన్ పచ్చడిలాగే చాలా రుచి

నిల్వ పచ్చళ్లు ఇంట్లో ఉంటే ఆ ధీమానే వేరు. ఈసారి కోడిగుడ్డు పచ్చడి కూడా ప్రయత్నించండి.

(Image credit: Youtube)

నిల్వ పచ్చళ్లు అంటే తెలుగు వారికి ఎంతో ప్రీతి. నెలల తరబడి నిల్వ ఉండే మామిడికాయ పచ్చళ్లు, టమాటా పచ్చడిని చాలా ఇష్టంగా తింటారు. నాన్ వెజ్ ప్రియుల కోసం చికెన్, మటన్ పచ్చళ్లు ఉన్నాయి. రొయ్యల పచ్చడికి కూడా ఫ్యాన్స్ ఎక్కువ. ఎప్పుడైనా కోడిగుడ్డు పచ్చడి తిన్నారా? అదెలా చేస్తారు అనుకుంటున్నారా? చికెన్ పచ్చడిలాగే దీని రుచి కూడా అదిరిపోతుంది. అందులోనూ ఒక్కసారి చేసుకుంటే నెలరోజులు పాడవ్వకుండా ఉంటుంది కనుక హ్యాపీగా తినవచ్చు. కూర వండుకునే ఓపిక లేనివారికి ఈ పచ్చడి ఎంతో సాయంగా అనిపిస్తుంది. రుచిలో కూడా అదిరిపోతుంది. మసాలా దట్టించిన కోడిగుడ్డు గ్రేవీ తిన్నట్టు ఉంటుంది. పచ్చడి అనగానే కోడి గుడ్డును ముక్కలు చేస్తామేమో అనుకోవద్దు. గుడ్డుకు గుడ్డు పూర్తిగా ఉంటుంది.  

కావాల్సినవి
కోడిగుడ్లు - ఎనిమిది
అల్లం వెల్లుల్లి పేస్టు - రెండు స్పూన్లు
ఆవ నూనె  - ఆరు టీస్పూన్లు
గరం మసాలా - నాలుగు టీస్పూన్లు
కారం - రెండు టీస్పూన్లు
జీలకర్ర - రెండు టీస్పూన్లు
ఉప్పు - రుచికి సరిపడా
మెంతి పొడి - రెండు స్పూన్లు
ఆవ పొడి - రెండు స్పూన్లు
కరివేపాకులు - మూడు రెమ్మలు
నిమ్మకాయ రసం - రెండు స్పూన్లు

తయారీ ఇలా
1. కోడిగుడ్లను ఉడికించి పొట్టు తీసి పక్కన పెట్టుకోవాలి. 
2. ఇప్పుడు కళాయిలో కాస్త నూనె వేసి కోడిగుడ్లు వేయించాలి. కోడిగుడ్లకు గాట్లు పెడితే బాగా వేగుతాయి. 
3. కోడిగుడ్ల రంగు కాస్త మారేవరకు వేయించాలి. 
4. తరువాత అందులో అల్లం వెల్లుల్లి పేస్టు వేయాలి. 
5. అది వేగాక కారం, గరంమసాలా ఉప్పు వేసి కాసేపు వేయించాలి. 
6. అన్నీ వేగాక కరివేపాకులు వేసి కలిపి స్టవ్ కట్టేయాలి. 
7. ఈ మొత్తం మిశ్రమాన్ని చల్లార్చాలి. చల్లారాక అందులో ఆవపొడి, మెంతి పొడి వేసి కలపాలి. 
8. చివర్లో నిమ్మరసం పిండి బాగా కలపాలి. 
9. ఇది గ్రేవీలా ఉంటుంది. కాబట్టి వేడి వేడి అన్నంతో తింటే ఆ రుచే వేరు. 

కోడిగుడ్డు తినడం వల్ల ఉపయోగాలెన్నో...
కోడిగుడ్డు తినడం వల్ల మన శరీరానికి అవసరమైన ఎన్నో పోషకాలు ఉన్నాయి. విటమిన్ డి కూడా దొరుకుతుంది. కాల్షియం, పొటాషియం, మెగ్నీషియం, విటమిన్ బి... పుష్కలంగా లభిస్తాయి. ఇందులో ఉండే కోలిన్ అనే పోషకం మెదడు కణాల ఆరోగ్యాన్ని కాపాడుతుంది. పిల్లలు, గర్భిణులు, బాలింతలు కచ్చితంగా రోజుకో గుడ్డు తినాలి. దీనివల్ల వారికి శరీరానికి కావాల్సినంత శక్తి అందుతుంది. గుడ్డు తినే మహిళల్లో రొమ్ము క్యాన్సర్ వచ్చే అవకాశం తగ్గుతుంది. గుడ్లలో విటమిన్ ఏ పుష్కలంగా ఉంటుంది. ఇది కంటిచూపును కాపాడుతుంది. నరాల బలహీనత సమస్యతో బాధపడుతున్నవారు గుడ్డు తినడం వల్ల త్వరగా దాన్నుంచి  బయటపడతారు. గుండెకు, రక్తనాళాలకు దీనిలోని పోషకాలు ఎంతో మేలు చేస్తాయి.