ఊరేగింపులో వరుడు, అతడు వచ్చేసరికి వేరే వ్యక్తిని పెళ్లాడిన వధువు

వరుడు తన స్నేహితులు, బంధువులతో కలిసి ఊరేగుతూ పెళ్లి మండపానికి వచ్చేసరికి.. వధువుకు వేరే వ్యక్తితో పెళ్లయిపోయింది.

Representational Image/Pixabay

మరికొద్ది సేపట్లో పెళ్లి. వరుడు అల్రెడీ ఊరేగింపులో మండపానికి బయల్దేరాడు. స్నేహితులతో ఎంతో ఉత్సాహంతో చిందులేశాడు. అయితే, మండపానికి చేరుకొనేలోపే.. అతడికి ఊహించని షాక్ ఎదురైంది. అప్పటికే వధువు మరొక యువకుడిని పెళ్లి చేసేసుకుంది. 

ఈ ఘటన రాజస్థాన్‌లోని చురు జిల్లాలో చోటుచేసుకుంది. రాజ్గారా తహసీల్‌లోని చెలానా గ్రామానికి చెందిన యువతికి మరో గ్రామానికి చెందిన సునీల్ అనే యువకుడితో పెళ్లి కుదిరింది. మే 15న పెళ్లి ముహూర్తాన్ని నిర్ణయించారు. ఈ నేపథ్యంలో వరుడు తన ఇంటి నుంచి రాత్రి 9 గంటలకే ఊరేగింపుతో మండపానికి బయల్దేరాలి. కానీ, వరుడు తన స్నేహితులు, బందువులతో కలిసి మద్యం తాగుతూ బిజీగా గడిపాడు. చిందులేస్తూ సందడి చేశాడు. 

వరుడు ఎంతకీ పెళ్లి మండపానికి చేరుకోకపోవడంతో వరుడి బంధువులకు ఫోన్ చేశారు. ముహూర్తం దగ్గర పడుతున్నా వరుడు ఇంకా ఊరేగింపులోనే ఉన్నాడని, అతడు రావడానికి ఇంకా చాలా సమయం పడుతుందని తెలుసుకున్నారు. దీంతో వధువు తల్లిదండ్రులు కీలక నిర్ణయం తీసుకున్నారు. వధువుతో మాట్లాడి అప్పటికప్పుడు మరో యువకుడితో పెళ్లి నిశ్చయించారు. అనుకున్న ముహూర్తానికి ఆమెకు ఆ యువకుడితో పెళ్లి చేశారు. 

ఊరేగింపుగా మండపానికి చేరుకున్న వరుడి కుటుంబికులు షాకయ్యారు. వధువు కుటుంబికులపై ఆగ్రహాన్ని వ్యక్తం చేశారు. ఆ వెంటనే పోలీస్ స్టేషన్‌కు వెళ్లి వధువు కుటుంబికులపై ఫిర్యాదు చేశారు. అప్పటికే వరుడు మద్యం మత్తులో తూగుతున్నాడు. దీంతో పోలీసులకు కూడా సీన్ అర్థమైంది. పోలీసులు ఇరు కుటుంబాల మధ్య రాజీ కుదిర్చేందుకు ప్రయత్నించారు. పెళ్లికైన ఖర్చులను వధువు కుటుంబికులు తిరిగి ఇవ్వాలని వరుడి కుటుంబికులు డిమాండ్ చేశారు. అయితే, చివరికి ఏమైందనేది మాత్రం తెలియరాలేదు.