Anil Ravipudi: ప్రతి పంచ్‌కి నవ్విన అనిల్ రావిపూడి - రెండు గంటలు నాన్ స్టాప్ నవ్విస్తామన్న సంజయ్!

Sound Party movie pre release event : 'బిగ్ బాస్' సన్నీ హీరోగా నటించిన 'సౌండ్ పార్టీ' ప్రీ రిలీజ్ వేడుకకు అనిల్ రావిపూడి ముఖ్య అతిథిగా విచ్చేశారు.

హృతికా శ్రీనివాస్, వీజే సన్నీ, అనిల్ రావిపూడి, రవి పోలిశెట్టి, మహేంద్ర గజేంద్ర

''బిగ్ బాస్' నుంచి బయటకు వచ్చినప్పట్నుంచి సన్నీ (Bigg Boss 5 Telugu winner Sunny) బాగా కష్టపడుతున్నాడు. మంచి సినిమాలు చేస్తున్నాడు. 'సౌండ్ పార్టీ' ట్రైలర్ బావుంది. అందులో ప్రతి పంచ్‌కి నవ్వాను'' అని ప్రముఖ దర్శకుడు అనిల్ రావిపూడి అన్నారు. 'బిగ్ బాస్' సీజన్ 5 విజేత వీజే స‌న్నీ, హ్రితిక శ్రీనివాస్ జంట‌గా న‌టించిన సినిమా 'సౌండ్ పార్టీ' (Sound Party Movie). ఫుల్ మూన్ మీడియా ప్రొడ‌క్షన్స్ ప‌తాకంపై జయ శంకర్ సమర్పణలో రవి పొలిశెట్టి, మహేంద్ర గజేంద్ర, శ్రీ శ్యామ్ గజేంద్ర నిర్మించిన చిత్రమిది. సంజ‌య్ శేరి దర్శకుడు. ఈ నెల 24న థియేటర్లలో విడుదల అవుతోంది. 

'సౌండ్ పార్టీ' ప్రీ రిలీజ్ ఈవెంట్ (Sound Party pre release event)కు దర్శకుడు అనిల్ రావిపూడి ముఖ్య అతిథిగా విచ్చేశారు. ఆయన మాట్లాడుతూ ''ఇటీవల నేను ఇంత నవ్వుకున్న ట్రైలర్ ఇదే. సన్నీ, శివన్నారాయణ మధ్య సీన్లు బాగా ఫన్నీగా ఉంటాయని అర్థం అవుతోంది. చిన్నారుల నుంచి పెద్దల వరకూ ప్రతి ఒక్కరూ ఎంజాయ్ చేసేలా 'సౌండ్ పార్టీ' ఉంటుంది'' అని చెప్పారు. సినిమాకు సంబంధించి బిట్ కాయిన్ ఆయన చేతుల మీదుగా ఆవిష్కరించారు. దర్శకులు వియన్ ఆదిత్య, హీరో చైతన్య రావు, నిర్మాతల మండలి అధ్యక్షుడు కెఎల్ దామోదర్ ప్రసాద్ ఈ సినిమా విజయం సాధించాలని ఆకాంక్షించారు. నాని, కొరియోగ్రాఫర్ శేఖర్ మాస్టర్, 'హైపర్' ఆది వీడియో బైట్స్ ద్వారా అభినందనలు తెలియజేశారు.

వీజే సన్నీ మాట్లాడుతూ... "మాకు మద్దతు ఇవ్వడానికి వచ్చిన ప్రతి ఒక్కరికీ మా 'సౌండ్ పార్టీ' తరఫున థాంక్స్. నేను యాక్టర్ కావాలని కలగనే మా అమ్మ కళావతికి పుట్టినరోజు శుభాకాంక్షలు. మంచి నటీనటులు, సాంకేతిక తారాగణంతో ఈ సినిమా రూపొందింది. సినిమా చూసిన తర్వాత ప్రతి ఒక్కరికి శివన్నారాయణ లాంటి డాడీ ఉంటే బావుంటుందని అనిపిస్తుంది'' అన్నారు. శివన్నారాయణ మాట్లాడుతూ... "సంజయ్ పదేళ్ల క్రితం నన్ను దృష్టిలో పెట్టుకొని ఈ పాత్ర రాశారు. ఈ క్యారెక్టర్ ఇచ్చినందుకు దర్శక నిర్మాతలకు థాంక్స్. ఇందులో ఎలాంటి వల్గారిటీ లేదు. అశ్లీలత ఉండదు. 'అమృతం'లో నన్ను చూసిన మీరు ఎలా అయితే ఆదరించారో... ఈ చిత్రాన్ని అలాగే ఆదరిస్తారని ఆశిస్తున్నా'' అని అన్నారు. 

రెండు గంటలు నవ్విస్తుందీ సినిమా - సంజయ్
దర్శకుడు సంజయ్ శేరి మాట్లాడుతూ... "సినిమాకు రియల్ సౌండ్ పార్టీ మా నిర్మాతలే. రెండు గంటల పాటు కంటిన్యూగా నవ్విస్తుందీ సినిమా. సన్నీ ఎనర్జిటిక్ హీరో. మా టీమ్ సపోర్ట్ చేయడంతో సినిమా అనుకున్న విధంగా వచ్చింది. శివ కార్తికేయన్ గారితో సినిమా చేయాలని ఉంది. అని నాకు అవకాశం ఇస్తే స్టోరీ వినిపిస్తా" అని అన్నారు. సంజయ్ రైటింగ్ స్టైల్ త్రివిక్రమ్ తరహాలో ఉంటుందని నిర్మాత రవి పోలిశెట్టి అన్నారు. నిర్మాత మహేంద్ర, మ్యూజిక్ డైరెక్టర్ మోహిత్ రెహమానిక్, బిగ్ బాస్ ఫేమ్ కాజల్, లిరిసిస్ట్ పూర్ణాచారి, నటీనటులు అమీద, లోబో, టేస్టీ తేజ, శుభ శ్రీ కార్యక్రమానికి హాజరై సినిమా విజయం సాధించాలని కోరారు.