Deepika Padukone: శ్రద్ధా కపూర్... శ్రుతీ హాసన్... దీపికా పదుకోన్... ఎవరొచ్చినా ప్రభాస్ అతిథి మర్యాదలు మారలేదు!

'సాహో' సినిమా షూటింగ్ జరిగినప్పుడు శ్రద్ధా కపూర్‌కు... 'సలార్' చిత్రీకరణలో శ్రుతీ హాసర్‌కు... ఇప్పుడు దీపికా పదుకోన్‌కు... ప్రభాస్ చేసే అతిథి మర్యాదల్లో ఏమాత్రం లోటు లేదు.

ప్రభాస్, దీపికా పదుకోన్‌

యంగ్ రెబల్ స్టార్ ప్రభాస్ (Prabhas) సినిమాలో కథానాయికగా అవకాశం వస్తే... 'బాహుబలి' సినిమా ఏ స్థాయిలో ఉంటుందో, ఆ స్థాయిలో అతిథి మర్యాదలు బోనస్. ప్రభాస్ పంపే ఫుడ్ తినడం కంటే ముందు... అన్ని ఫుడ్ ఐటమ్స్, వెరైటీలు చూసి హీరోయిన్లు నోరెళ్లబెట్టాల్సిందే. 'సాహో' సినిమా షూటింగ్ జరిగినప్పుడు ప్రభాస్ ఎన్ని వెరైటీలు పంపిస్తారో శ్రద్ధా కపూర్ (Shraddha Kapoor) ఫొటోలు తీసి మరీ ఇన్‌స్టాగ్రామ్ స్టోరీలో పోస్ట్ చేశారు. ఆ తర్వాత 'సలార్' చిత్రీకరణలో శ్రుతీ హాసన్ (Shruti Hassan) సైతం అదే విధంగా చేశారు. ఇప్పుడు దీపికా పదుకోన్ వంతు వచ్చింది.

ప్రభాస్‌కు జంటగా దీపికా పదుకోన్ (Deepika Padukone) నటిస్తున్న సినిమా 'ప్రాజెక్ట్ కె' (Project K - ప్రస్తుతానికి ఇది వర్కింగ్ టైటిల్. భవిష్యత్తులో మారే అవకాశం ఉంది). 'మహానటి' ఫేమ్ నాగ్ అశ్విన్ దర్శకత్వం వహిస్తున్న ఈ సినిమా చిత్రీకరణ కోసం దీపికా పదుకోన్ హైదరాబాద్ వచ్చి వెళ్లారు. వచ్చి వెళ్లారు అని ఎందుకు అంటున్నారంటే... ఆల్రెడీ ఆమె ముంబై వెళ్లారు. ఈ షెడ్యూల్‌లో తన పార్ట్ షూటింగ్ ఫినిష్ చేసుకుని వెళ్లారు. అయితే... ఆమె ఇక్కడ ఉన్నప్పుడు ప్రభాస్ అతిథి మర్యాదలు చేశారు. ఎప్పటిలా వివిధ రకాల వంటకాలను ఆమెకు పంపించారు. 'If you know you know' హ్యాష్‌ట్యాగ్‌తో ఆ ఫుడ్ ఐటమ్స్ ఫొటో తీసి దీపికా పదుకోన్ ఇన్‌స్టాగ్రామ్ స్టోరీలో పోస్ట్ చేశారు. ఆ ఫుడ్ చూస్తే... ఎవరో పంపారో ప్రత్యేకంగా చెప్పాల్సిన అవసరం లేదు. నెటిజనులు అర్థం చేసుకున్నారు. ప్రభాస్ పంపినదే అని!

సాధారణంగా ఎప్పుడూ డైటింగ్ చేసే హీరోయిన్లు సైతం ప్రభాస్ పంపిన ఫుడ్ చూస్తే... టేస్ట్ చేయకుండా ఉండలేరని సినిమా యూనిట్ సభ్యులు అంటుంటారు. అదీ సంగతి. అమితాబ్ బచ్చన్ కీలక పాత్రలో నటిస్తున్న ఈ సినిమాను వైజయంతి మూవీస్ నిర్మిస్తోంది.

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి