Sanjay Dutt – Prabhas: విలన్‌గా కాదు, ప్రభాస్‌కు తండ్రిగా రానున్న సంజయ్ దత్?

ప్రభాస్, మారుతి కాంబోలో వస్తున్న సినిమాలో బాలీవుడ్ హీరో సంజయ్ దత్ కీలక పాత్ర పోషిస్తున్నారు. ఈ సినిమా కోసం మున్నాభాయ్ ని లాక్ చేసిన దర్శకుడు, ప్రభాస్ తండ్రి క్యారెక్టర్ చేయిస్తున్నట్లు తెలుస్తోంది.

Photo@Sanjay Dutt/twitter

బాలీవుడ్ నటుడు సంజయ్ దత్ హీరో పాత్రలతోనే కాదు.. విలన్‌గా కూడా ఆకట్టుకున్నాడు. ప్రశాంత్ నీల్ దర్శకత్వంలో తెరకెక్కిన ‘కేజీఎఫ్: చాప్టర్-2’లో అధీర పాత్రలో సంజయ్ దత్ ఒదిగిపోయాడు. తాజాగా మరో ప్రతిష్టాత్మక సౌత్ ఇండియన్ సినిమాలో అవకాశం దక్కించుకున్నాడు. పాన్ ఇండియన్ స్టార్ ప్రభాస్, దర్శకుడు మారుతి కాంబోలో వస్తున్న సినిమాలో కీలక పాత్రకు ఎంపిక అయ్యాడు.    

ఈ సినిమాలోని ముఖ్యమైన పాత్ర కోసం బాలీవుడ్ నటుడు సంజయ్ దత్ ను ఓకే చేశారు. తొలుత ఈ సినిమాలోనూ ఆయన విలన్ పాత్ర పోషించబోతున్నాడనే టాక్ వినిపించింది. కానీ, ఆ వార్తల్లో వాస్తవం లేదని తేలిపోయింది. ఇందులో ఆయన ప్రభాస్‌కు తండ్రిగా నటిస్తున్నట్లు తెలుస్తోంది. అధికారికంగా ఆయన క్యారెక్టర్ పై ఎలాంటి ప్రకటన రాకపోయినా, సినీ సర్కిల్స్ లో ఈ న్యూస్ వైరల్ అవుతోంది. అటు కేజీఎఫ్-2లో విలన్ పాత్ర చేసిన తర్వాత.. దళపతి విజయ్ సినిమాలో ఆయన్ను విలన్ గా తీసుకున్నట్లు సమాచారం. దానికి రూ.10 కోట్ల రెమ్యునరేషన్ ఇచ్చారట. మరి ప్రభాస్ సినిమాలో నటించడానికి ఈ నటుడు ఎంత తీసుకుంటాడో అనే ఆసక్తి నెలకొంది.  

ప్రభాస్ ద్విపాత్రభినయం

అటు ఈ సినిమా షూటింగ్ సైలెంట్ గా కొనసాగుతోంది. ఇప్పటికే తొలి షెడ్యూల్ కూడా పూర్తైంది. ప్రభాస్ షూటింగ్ లో పాల్గొన్నాడు. అతడితో పాటు రిద్ది కుమార్, వైవా హర్ష లాంటి నటులు కూడా షూటింగ్ లో పాల్గొన్నట్లు సమాచారం. ప్రభాస్ లేకుండా మరికొన్ని రోజులు షూట్ జరిగినట్లు సమాచారం. అటు 'రాజా డీలక్స్' అనే పేరుని ఈ సినిమాకి టైటిల్ గా అనుకుంటున్నారు. ఈ సినిమాలో ప్రభాస్ డ్యూయల్ రోల్ పోషిస్తున్నాడట. అందులో ఒకటి ఓల్డ్ గెటప్ కాగా.. మరొకటి యంగ్ రోల్ అని తెలుస్తోంది. తాతమనవళ్లుగా ప్రభాస్ రెండు పాత్రల్లో కనిపిస్తారట. రెండు డిఫరెంట్ టైమ్ పీరియడ్స్ లో కథ నడుస్తుందట. ఈ సినిమాలో ముగ్గురు హీరోయిన్లను తీసుకున్నారు.

దెయ్యంగా ప్రభాస్?

ఇదొక హారర్ స్టోరీ అని మొదటి నుంచి ప్రచారం జరుగుతూనే ఉంది. అయితే ఇక్కడ ట్విస్ట్ ఏంటంటే.. ఆ దెయ్యం ప్ర‌భాసేన‌ట‌. 'చంద్రముఖి' సినిమాలో జ్యోతిక క్యారెక్టర్ గుర్తుందా..? ఓ ఆత్మ అప్పుడప్పుడూ ఆమెని ఆవహిస్తుంటుంది. అలానే ప్రభాస్ సినిమాలో కూడా ఓ ఆత్మ అప్పుడప్పుడు హీరోని ఆవహిస్తుందట. ఆ సమయంలో ప్రభాస్ ప్రవర్తన వింత వింతగా ఉంటుందని.. అందులో నుంచే కామెడీ పుట్టేలా రాసుకున్నారట. ఓ స్టార్ హీరో, యాక్షన్ హీరో.. పైగా పాన్ ఇండియా ఇమేజ్ ఉన్న హీరో ఇలాంటి కాన్సెప్ట్ లో నటించడం కొత్తనే చెప్పాలి. మారుతి బలం.. కామెడీ. ఈ సినిమాలో అదే హైలైట్ అయ్యేలా చూసుకుంటున్నారట. ప్రభాస్ ప్రస్తుతం వరుస సినిమాలతో బిజీగా ఉన్నాడు. 'బాహుబలి' తర్వాత నుంచి పాన్ ఇండియా ఆడియ‌న్స్‌ను టార్గెట్ చేస్తూ... 'సలార్', 'ఆదిపురుష్', 'ప్రాజెక్ట్ కె', 'స్పిరిట్' చేస్తున్నారు.