Rashmika Mandanna: డీప్ ఫేక్ వీడియో కేసు నిందితుడు అరెస్ట్, రష్మిక రియాక్షన్ ఇదే!

Rashmika Mandanna: తన డీప్ ఫేక్ వీడియో కేసుకు సంబంధించి నిందితుడిని పోలీసులు అరెస్టు చేయడం పట్ల రష్మిక మందన్న స్పందించింది. పోలీసులకు కృతజ్ఞతలు చెప్పింది.

రష్మిక మందన్న(Photo Credit: Rashmika Mandanna/Instagram)

Rashmika Mandanna Deepfake Video:  ప్రముఖ సినీ నటి రష్మిక మందన్నకు సంబంధించిన డీప్ ఫేక్ వీడియో దేశ వ్యాప్తంగా సృష్టించింది. పలువురు ప్రముఖులు ఈ వీడియోపై సీరియస్ అయ్యారు. ఇలాంటి వీడియోలను రూపొందించే నిందితులపై కఠిన చర్యలు తీసుకోవాలని పోలీసులను కోరారు. ఈ ఘటనపై కేసు నమోదు చేసిన ఢిల్లీ స్పెషల్ సెల్  పోలీసు ఇన్వెస్టిగేషన్ చేపట్టారు. ఈ డీప్‌ ఫేక్ వీడియో వెనుక ఉన్న కీలక నిందితుడిని తాజాగా అరెస్టు చేశారు.  ఏపీలోని గుంటూరుకు చెందిన ఈమని నవీన్‌ (24) ను అదుపులోకి తీసుకున్నారు. అతడే ఈ వీడియోను క్రియేట్ చేసి సోషల్ మీడియాలోకి షేర్ చేసినట్లు పోలీసులు వెల్లడించారు. నిందితుడి నుంచి ల్యాప్‌ టాప్‌, మొబైల్‌ స్వాధీనం చేసుకొని పూర్తి స్థాయిలో విచారిస్తున్నట్లు తెలిపారు. డిలీట్‌ చేసిన డేటాను రికవరీ చేసేందుకు ట్రై చేస్తున్నట్లు వెల్లడించారు. రష్మిక పేరుతో కొన్నాళ్లు ఫ్యాన్ పేజీని రన్ చేసిన ఆయన,  ఫాలోవర్స్ సంఖ్య పెంచుకునేందుకు ఈ వీడియోను తయారు చేసినట్లు తెలిపారు. రష్మికతో పాటు మరో ఇద్దరు సెలబ్రిటీల ఫ్యాన్ పేజీలను కూడా నవీన్ నడిపినట్లు గుర్తించామన్నారు.

పోలీసులకు థ్యాంక్స్ చెప్పిన రష్మిక

అటు డీప్‌ ఫేక్‌ వీడియో కేసు నిందితుడిని  పోలీసులు అరెస్టు చేయడం పట్ల రష్మిక మందన్న స్పందించింది. పోలీసులకు థ్యాంక్స్ చెప్పింది. మార్ఫింగ్ వీడియోలు, ఫోటోల విషయంలో జాగ్రత్తగా ఉండాలని ఆమె యువతకు సూచించింది. “డీప్ ఫేక్ వీడియో క్రియేట్ చేసిన నిందితుడిని అరెస్టు చేసిన పోలీసులకు ధన్యవాదాలు. ఈ ఘటన పట్ల నాకు అండగా నిలవడంతో పాటు మద్దతు ప్రకటించిన వారందరికీ కృతజ్ఞతలు. ఇలాంటి పనులకు పాల్పడితే తీవ్ర ఇబ్బందులు ఎదుర్కోవాల్సి వస్తుందని యువత గుర్తించాలి. అనుమతి లేకండా ఎవరి ఫోటోలు, వీడియోలు మార్ఫింగ్ చేసినా నేరమే అవుతుంది” అని రష్మిక అభిప్రాయపడింది.    

Expressing my heartfelt gratitude to @DCP_IFSO 🙏🏼 Thank you for apprehending those responsible.

Feeling truly grateful for the community that embraces me with love, support and shields me. 🇮🇳

Girls and boys - if your image is used or morphed anywhere without your consent. It…

— Rashmika Mandanna (@iamRashmika) January 20, 2024

గత నవంబర్ లో బయటకు వచ్చిన రష్మిక డీప్ ఫేక్ వీడియో

గత ఏడాది  నవంబర్ లో రష్మిక డీప్ ఫేక్ వీడియో సోషల్ మీడియాలో కనిపించింది. బ్రిటీష్- ఇండియన్ ఇన్ ప్ల్యూయెన్సర్ జరా పటేల్ బాడీకి రష్మిక ముఖాన్ని పెట్టి డీప్ ఫేక్ వీడియోను రూపొందించారు. ఈ వీడియో బాగా వైరల్ కావడంతో  పలువురు సినీ, రాజకీయ ప్రముఖులు ఆగ్రహం వ్యక్తం చేశారు. టెక్నాలజీని చూస్తుంటే భయంగా ఉందని రష్మిక సైతం ఆవేదన వ్యక్తం చేసింది. ఈ ఘటనపై ఢిల్లీ మహిళా కమిషన్‌ సైతం సీరియస్ అయ్యింది.   నిందితుడు రష్మిక ప్రతిష్టకు భంగం కలిగించినందుకు గాను, సెక్షన్ 465, 469 కింద ఢిల్లీ పోలీసులు కేసు నమోదు చేశారు. గతేడాది నవంబరు 10న కేసు నమోదు కాగా, ఇప్పటికే ఓ నిందితుడిని పోలీసులు అరెస్టు చేశారు. తాజాగా కీలక నిందితుడిని అదుపులోకి తీసుకున్నారు.