Pushpa: పుష్ప ఈవెంట్‌కు సుక్కూ, దేవిశ్రీ ఆబ్సెంట్.. అందుకేనా?

పుష్ప సినిమా ప్రీ-రిలీజ్ ఈవెంట్‌కు దర్శకుడు సుకుమార్, సంగీత దర్శకుడు దేవిశ్రీ ప్రసాద్ హాజరు కాలేదు.

సుకుమార్(ఫైల్ ఫొటో)

పుష్ప ప్రీ-రిలీజ్ ఈవెంట్‌కు దర్శకుడు సుకుమార్, సంగీత దర్శకుడు దేవిశ్రీ ప్రసాద్ రాలేదు. ఒక సినిమా తెరకెక్కడానికి దర్శకుడు, సంగీత దర్శకుడు రెండు స్తంభాల్లాంటి వారు. అయితే పోస్ట్ ప్రొడక్షన్ వర్క్ పెండింగ్ ఉండటం, అమెరికాకు హార్డ్ డిస్క్‌లు ముందుగానే పంపాల్సి ఉండటంతో ఆ పనిలో వీరిద్దరూ ఈవెంట్‌కు హాజరు కాలేకపోయారు.

పుష్ప సినిమా డిసెంబర్ 17వ తేదీన విడుదలకు సిద్ధం అవుతోంది. తెలుగు, తమిళం, కన్నడం, మలయాళం, హిందీ భాషల్లో ఈ సినిమా ప్రేక్షకుల ముందుకు రానుంది. అల్లు అర్జున్ పుష్పగా, రష్మిక శ్రీవల్లిగా నటించిన ఈ సినిమాలో ఫహాద్ ఫాజిల్, సునీల్, కన్నడ నటుడు ధనంజయ నెగిటివ్ రోల్స్‌లో నటిస్తున్నారు.

ఈ ప్రీ-రిలీజ్ ఈవెంట్‌కు ఎస్ఎస్ రాజమౌళి, కొరటాల శివ, వెంకీ కుడుముల తదితర ప్రముఖ దర్శకులు ముఖ్య అతిథులుగా హాజరయ్యారు. ఈ సినిమాకు సంబంధించిన అడ్వాన్స్ బుకింగ్స్ కూడా ఇప్పటికే ప్రారంభం అయ్యాయి. అన్ని పాటలూ సూపర్ హిట్ అవ్వడంతో ప్రేక్షకులకు ఈ సినిమా మీద అంచనాలు ఎక్కువ అయ్యాయి.

దీంతోపాటు టీజర్, ట్రైలర్లను కూడా మాస్‌ను ఆకట్టుకునే విధంగా కట్ చేశారు. ముఖ్యంగా ‘తగ్గేదే లే’ అనే మ్యానరిజం విపరీతంగా జనంలోకి చొచ్చుకుపోయింది. రూ.250 కోట్ల వరకు బడ్జెట్‌తో ఈ సినిమా తెరకెక్కిందని వార్తలు వస్తున్నాయి. అయితే ఆంధ్రలో టికెట్ రేట్ల కారణంగా రికవరీ మీద నిర్మాతలు కూడా ఆశాభావంతో లేరు. అక్కడ టికెట్ రేట్లు పెరగకపోతే కష్టమే అని ఇటీవలే ప్రెస్‌‌మీట్‌లో తెలిపారు.

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి