Naga Chaitanya: నా యాక్టింగ్ నాకే నచ్చదు, ఏ సినిమా చూసినా ఇలా చేశానేంటి అనిపిస్తుంది: నాగ చైతన్య

నాగ చైతన్య హీరోగా తెరకెక్కుతున్న తొలి బైలింగ్వల్ మూవీ ‘కస్టడీ’. తమిళ దర్శకుడు వెంకట్ ప్రభు ఈ సినిమాను తెరకెక్కిస్తున్నారు. కృతి శెట్టి హీరోయిన్ గా నటిస్తున్న ఈ సినిమా మే 12న విడుదలకు రెడీ అవుతోంది. ఇప్పటికే ఈ సినిమాకు సంబంధించిన ప్రమోషన్ కార్యక్రమాలు కొనసాగుతున్నాయి. తాజాగా ఓ తమిళ యూట్యూబర్ కు హీరో నాగ చైతన్య స్పెషల్ ఇంటర్వ్యూ ఇచ్చారు. ఇందులో తన నటన గురించి, తన సినిమాల గురించి ఆసక్తికర విషయాలు చెప్పారు.

నా యాక్టింగ్ నాకే నచ్చదు - నాగ చైతన్య

ఇంటర్వ్యూలో భాగంగా  మీ నటనకు 10 మార్కులకు ఎన్ని మార్కులు వేసుకుంటారు? అని అడిగిన ప్రశ్నకు చైతన్య ఇంట్రెస్టింగ్ గా సమాధానం చెప్పారు. “నా నటనకు నేను వేసుకునే మార్కులు 5 కంటే తక్కువే. నా పాత సినిమాలు చూసినప్పుడు ఇలా చేశాను ఏంటి? అనిపిస్తుంది. నేను చేసిన ఏ సినిమా చూసినా యాక్టింగ్ పరంగా బాగా ఇంప్రూవ్ కావాలి అనిపిస్తుంది. ఇంత వరకూ నేను నా నటన పట్ల సంతృప్తిగా లేను. సెల్ఫ్ క్రిటిసిజమ్ అనేది మానసిక ఎదుగుదలకు చాలా మంచిదని నేను భావిస్తాను. నా సినిమాల్లో నా యాక్టింగ్ ను చూసి పెద్దగా ఎంజాయ్ చేయలేను” అని చైతన్య వివరించాడు. చైతూ ఇంత నిజాయతీ మాట్లాడటం చూసి ప్రేక్షకులు ఫిదా అవుతున్నారు. మిగతా హీరోలైతే ఇలా చెప్పుకోగలరా? అని అంటున్నారు.

👀 pic.twitter.com/IXjo8bWpXE

— T (@MovieNCriclover) May 8, 2023

తెలుగు, తమిళంలో మంచి హిట్ అవుతుంది- నాగ చైతన్య

ఇక ‘కస్టడీ’ సినిమా ప్రతి ఒక్కరికి నచ్చుతుందని నాగ చైతన్య తెలిపారు. సినీ అభిమానులను ఈ మూవీ అస్సలు డిజప్పాయింట్ చేయదని చెప్పారు. “ఈ సినిమాతోనే వెంకట్ ప్రభు టాలీవుడ్ కు డైరెక్టర్ గా పరిచయం అవుతున్నారు. ఈ సినిమాను తెలుగు, తమిళంలో చిత్రీకరించాం. డబ్ చేయలేదు. నేను ఈ సినిమాలో పోలీస్ కానిస్టేబుల్ గా నటిస్తున్నాను. సాధారణంగా హీరో విలన్‌ని చంపాలని చూస్తుంటాం. అయితే, ఈ సినిమాలో హీరో ఏదోవిధంగా విలన్‌ని బతికించుకోవాలి అని చూస్తాడు.  అందుకే ఈ సినిమాకు ‘కస్టడీ’ అని పేరు పెట్టారు. ఇది పూర్తి యాక్షన్ సినిమాగా రూపొందింది. రైలులోని యాక్షన్ సీక్వెన్స్ అందరినీ బాగా ఆకట్టుకుంటుంది. అరవింద్ స్వామితో పని చేయడం చాలా సంతోషంగా ఉంది. ఈ మూవీలో సీనియర్ నటులు శరత్ కుమార్, ప్రియమణి  కీలక పాత్రలు పోషించారు. కృతి శెట్టి, నేను ‘బంగార్రాజు’ సినిమాలో కలిసి పనిచేశాం. ఈ సినిమా తమిళ్, తెలుగులో మంచి హిట్ అవుతుందని అనుకుంటున్నాను” అని వెల్లడించారు.

మే 12న ‘కస్టడీ’ విడుదల!

నాగ చైతన్య, వెంకట్ ప్రభు కలయికలో ‘కస్టడీ’ సినిమాను శ్రీనివాసా సిల్వర్ స్క్రీన్ పతాకంపై శ్రీనివాసా చిట్టూరి నిర్మించారు. మే 12న తెలుగు, తమిళ భాషల్లో భారీ ఎత్తున విడుదల చేయనున్నారు. అరవింద్ స్వామి, ప్రియమణి, శరత్ కుమార్, ప్రేమ్ జీ అమరన్, ప్రేమి విశ్వనాథ్, సంపత్ రాజ్, 'వెన్నెల' కిశోర్ తదితరుల నటిస్తున్న ఈ చిత్రానికి తండ్రీ కుమారులు, సంగీత ద్వయం ఇసైజ్ఞాని ఇళయరాజా, యువన్ శంకర్ రాజా సంగీతం అందిస్తున్నారు. పవన్ కుమార్ సమర్పించనున్నారు. అబ్బూరి రవి మాటలు రాస్తున్నారు.  

Read Also: ఆ సినిమా చూస్తే రూ.82 వేలు ఇస్తారట - కానీ, ఓ కండీషన్ ఉంది!