ఓటీటీలో అదరగొడుతున్న గోపిచంద్ డిజాస్టర్ మూవీ - నెట్ ఫ్లిక్స్ టాప్-1 ట్రెండింగ్ లో రామబాణం!
గోపీచంద్ నటించిన 'రామబాణం' మూవీ ఓటీటీలో సూపర్ రెస్పాన్స్ గా దూసుకుపోతోంది. నెట్ ఫ్లిక్స్ లో స్ట్రీమింగ్ అవుతున్న ఈ మూవీ టాప్-1 ట్రెండింగ్ లో నిలిచింది.
యాక్షన్ హీరో గోపీచంద్ కథానాయకుడిగా నటించిన 'రామబాణం' ఇటీవల విడుదలై బాక్సాఫీస్ వద్ద భారీ డిజాస్టర్ గా నిలిచిన విషయం తెలిసిందే. చాలా ఆలస్యంగా నెట్ ఫ్లిక్స్ ఓటీటీ స్ట్రీమింగ్ కి తాజాగా అందుబాటులోకి వచ్చిన ఈ సినిమా ఇప్పుడు టాప్ ట్రెండింగ్ వన్ లో దూసుకుపోతుంది. రీసెంట్ టైమ్స్ లో థియేటర్స్ లో లాంగ్ రన్ కంటిన్యూ చేయలేకపోయిన 'రామబాణం', 'ఏజెంట్' ఓటీటీ రిలీజ్ కోసం ఆడియన్స్ ఎంతో ఆసక్తిగా ఎదురు చూశారు. వీటిల్లో 'ఏజెంట్' ఇప్పటివరకు విడుదల కానప్పటికీ, 'రామబాణం' మాత్రం సెప్టెంబర్ 14న నెట్ ఫ్లిక్స్ లో విడుదలై ఇప్పుడు టాప్ వన్ ట్రెండింగ్ లో ఉంది.
మెగాస్టార్ చిరంజీవి 'భోళా శంకర్' కూడా అదే నెట్ ఫ్లిక్స్ ఓటీటీలో విడుదలై కనీసం టాప్ -10 ట్రెండింగ్ లోకి కూడా నిలవలేకపోయింది. కానీ గోపీచంద్ 'రామబాణం' మాత్రం థియేటర్స్ లో డిజాస్టర్ గా నిలిచి ఓటీటీలో అదరగొడుతోంది. గోపీచంద్ - శ్రీవాస్ కాంబినేషన్లో తెరకెక్కిన హ్యాట్రిక్ మూవీ ఇది. కమర్షియల్ ఫ్యామిలీ అండ్ యాక్షన్ ఎంటర్టైనర్ గా మే 5న థియేటర్స్ లో విడుదలై ప్రేక్షకులను ఏమాత్రం ఆకట్టుకోలేకపోయింది. ఫలితంగా బాక్సాఫీస్ వద్ద ఘోర పరాజయాన్ని చవి చూసింది. పీపుల్స్ మీడియా ఫ్యాక్టరీ బ్యానర్ పై టీజీ విశ్వప్రసాద్ వివేక్ కూచిభట్ల నిర్మించిన ఈ మూవీ బాక్సాఫీస్ వద్ద భారీ నష్టాలనుసైతం మిగిల్చింది. గోపీచంద్ సరసన డింపుల్ హయాతి కథానాయికగా నటించిన ఈ మూవీలో సీనియర్ నటుడు జగపతిబాబు, కుష్బూ కీలక పాత్రలు పోషించారు. సచిన్ కేడేకర్, శుభలేఖ సుధాకర్, కాశీ విశ్వనాథ్, నాజర్, వెన్నెల కిషోర్, సప్తగిరి, గెటప్ శీను ఇతర పాత్రల్లో కనిపించారు.
'రామబాణం' కథ ఏంటంటే.. రాజారామ్ (జగపతిబాబు) సుఖీభవ పేరుతో పలు హోటల్స్ నడుపుతుంటారు. ఆ హోటల్స్ పోటీకి తట్టుకోలేని జీకే (తరుణ్ అరోరా) రాజారామ్ హోటల్ లైసెన్స్ ను ఎత్తుకుపోతాడు. దాంతో రాజారాం తమ్ముడు విక్కీ (గోపీచంద్) జీకే పై దాడి చేస్తాడు. ఆ తర్వాత రాజారాం అతన్ని పోలీసులకు పట్టిస్తాడు. పోలీసుల బారి నుంచి తప్పించుకున్న విక్కీ, కోల్ కత్తా కు పారిపోయి పెద్ద డాన్ గా ఎదుగుతాడు. అలాంటి విక్కీ మళ్లీ 15 సంవత్సరాల తర్వాత అన్నయ్య కుటుంబాన్ని వెతుక్కుంటూ వెనక్కి ఎందుకు వచ్చాడు? రాజారామ్ కి శత్రువుల నుంచి ఎలాంటి ఆపద వచ్చింది? దాన్ని విక్కీ ఎలా అడ్డుకున్నాడు? అనేది ఈ సినిమా కథ.
మరోవైపు రామబాణం వంటి డిజాస్టర్ తర్వాత గోపీచంద్ 'భీమా' అనే హాయ్ వోల్టేజ్ యాక్షన్ మూవీ చేస్తున్నారు. చాలాకాలం తర్వాత ఈ మూవీలో గోపీచంద్ పవర్ ఫుల్ పోలీస్ ఆఫీసర్ గా కనిపించనున్నారు. ఇప్పటికే విడుదలైన ఫస్ట్ లుక్ సినిమాపై ఆసక్తిని మరింత పెంచేసింది. కన్నడ దర్శకుడు హర్ష తెరకెక్కిస్తున్న ఈ చిత్రం శరవేగంగా షూటింగ్ జరుపుకుంటోంది. శ్రీ సత్య సాయి ఆర్ట్స్ బ్యానర్ పై కేకే రాధామోహన్ నిర్మిస్తున్న ఈ సినిమాకి 'కేజిఎఫ్' మ్యూజిక్ డైరెక్టర్ రవి బస్రూర్ సంగీతం అందిస్తున్నారు.
Also Read : ఓటీటీలో అభిషేక్ పిక్చర్స్ 'ప్రేమ విమానం' - రిలీజ్ ఎప్పుడంటే?
టాప్ హెడ్ లైన్స్
ట్రెండింగ్ వార్తలు
