No Sonali Bendre In NTR 30: సారీ, ఎన్టీఆర్ 30లో సోనాలి లేరు - ఇంకా హీరోయినూ ఫైనలైజ్ కాలేదు!

ఎన్టీఆర్, కొరటాల శివ సినిమాలో సోనాలి బింద్రే నటిస్తున్నారా? అంటే... 'లేదు' అని చెప్పాలి. ఈ విషయం స్వయంగా ఆమె చెప్పారు.

ఎన్టీఆర్, సోనాలి బింద్రే

యంగ్ టైగర్ ఎన్టీఆర్ (NTR) కథానాయకుడిగా కొరటాల శివ దర్శకత్వంలో ఒక సినిమా (NTR 30 movie) రూపొందుతోంది. ఇటీవల కాన్సెప్ట్ టీజర్ విడుదల చేశారు... ఎన్టీఆర్ పుట్టినరోజు నాడు! ఆగస్టులో సినిమా సెట్స్ మీదకు వెళుతుందని సమాచారం. ఈ లోపు కొరటాల శివ (Koratala Siva) స్క్రిప్ట్‌కు తుది మెరుగులు దిద్దే పనిలో ఉంటారు. మరోవైపు ఎన్టీఆర్ మేకోవర్ మీద దృష్టి పెట్టారు. అయితే, ఆ సినిమా కాస్టింగ్ గురించి నెట్టింట ఆసక్తికరమైన పుకార్లు చక్కర్లు కొడుతున్నాయి.

ఎన్టీఆర్ 30లో సోనాలి బింద్రే కీలక పాత్రలో నటించనున్నారని ఒక టాక్. అందులో ఎంత మాత్రం నిజం లేదని సోనాలి స్పష్టం చేశారు. తెలుగులో మెగాస్టార్ చిరంజీవి సరసన 'ఇంద్ర', 'శంకర్ దాదా ఎంబీబీఎస్' సినిమాల్లో.... నట సింహం నందమూరి బాలకృష్ణకు జోడీగా 'పలనాటి బ్రహ్మనాయుడు'లోనూ... కింగ్ నాగార్జున 'మన్మథుడు', సూపర్ స్టార్ మహేష్ బాబు 'మురారి' సినిమాల్లో ఆమె కథానాయికగా నటించారు. క్యాన్సర్ బారిన పడటంతో కొన్ని రోజులు చికిత్స నిమిత్తం నటనకు దూరమయ్యారు. మళ్ళీ సోనాలి మేకప్ వేసుకున్నారు.

క్యాన్సర్ తర్వాత సోనాలి నటించిన ప్రాజెక్ట్ 'ది బ్రోకెన్ న్యూస్' వెబ్ సిరీస్. ఇది జూన్ 10న విడుదల కానుంది. ఆ వెబ్ సిరీస్ ప్రచార కార్యక్రమాల్లో ఎన్టీఆర్ సినిమా గురించి సోనాలిని ప్రశ్నించగా ''ఎవరు? నేనా...!? నాకు అసలు ఆ విషయం తెలియదు'' అని సమాధానం ఇచ్చారు. దాంతో సినిమాలో ఆమె నటించడం లేదని స్పష్టం అయ్యింది. 

ఎన్టీఆర్ సినిమాలో ఇంకా హీరోయిన్ కూడా ఫైనలైజ్ కాలేదని తెలుస్తోంది. ఆలియా భట్‌తో డిస్కషన్స్ జరిగినా... ఇప్పుడు సినిమాలో ఆమె లేదట. జాన్వీ కపూర్, సాయి పల్లవి, రష్మిక తదితరుల పేర్లు వినిపిస్తున్నాయి.

నంద‌మూరి క‌ళ్యాణ్ రామ్ స‌మ‌ర్ప‌ణ‌లో యువ సుధ ఆర్ట్స్, నందమూరి తారక రామారావు ఆర్ట్స్‌ బ్యాన‌ర్స్‌పై మిక్కిలినేని సుధాక‌ర్, హ‌రికృష్ణ నిర్మిస్తున్న చిత్రమిది. అనిరుధ్ రవిచందర్ సంగీతం అందిస్తున్నారు. ఈ చిత్రానికి ప్రొడ‌క్ష‌న్ డిజైన‌ర్: సాబు సిరిల్, సినిమాటోగ్రాఫ‌ర్: ర‌త్న‌వేలు, ఎడిట‌ర్: శ్రీక‌ర్ ప్ర‌సాద్.