Nagarjuna: మళ్లీ సంక్రాంతే టార్గెట్, పోటీని లెక్కచేయని నాగార్జున - తర్వాతి మూవీపై కీలక అప్‌డేట్ ఇచ్చిన నాగ్

Nagarjuna: నాగార్జున హీరోగా నటించిన ‘నా సామిరంగ’ మంచి కలెక్షన్స్‌తో దూసుకుపోతోంది. ఇంతలోనే తన తరువాతి మూవీపై కీలక అప్డేట్‌ను అందించారు నాగ్.

‘నా సామిరంగ’ టీమ్‌

Nagarjuna Upcoming Movie: కొంతమంది హీరోలకు కొన్ని విడుదల తేదీలు సెంటిమెంట్‌గా ఉంటాయి. ఆ సమయంలో విడుదల చేస్తే.. తమ సినిమా కచ్చితంగా హిట్ అవుతుందని నమ్ముతారు. అలాంటి హీరోల్లో నాగార్జున కూడా ఒకరు. తన సినిమాలు సంక్రాంతికి విడులదయితే కచ్చితంగా హిట్ అవుతాయని ఈ సీనియర్ హీరో బలంగా నమ్మెతారు. అందుకే చాలావరకు సంక్రాంతికి ఎంత పోటీ ఉన్నా.. తన సినిమా కచ్చితంగా ఆడుతుందని నమ్మి బరిలోకి దించుతారు. ఈసారి అలా ‘నా సామిరంగ’తో ప్రేక్షకుల ముందుకు వచ్చారు. ఆయన అనుకున్నట్టుగానే మూవీ హిట్ అయ్యింది. ఇక ఈ సినిమా సక్సెస్ మీట్‌లో తన తరువాతి మూవీపై కీలక అప్డేట్ అందించారు నాగ్.

పర్ఫెక్ట్ సంక్రాంతి సినిమా..

2024 సంక్రాంతికి అప్పటికే మూడు సినిమాలు పోటీ ఉన్నా.. ‘నా సామిరంగ’ను కూడా బరిలోకి దించారు నాగార్జున. పూర్తిగా ఫ్యామిలీ సినిమా అని, పండగకు కుటుంబమంతా కలిసి దీనిని చూడడానికి వస్తారని ఆయన ధీమా వ్యక్తం చేశారు. నాగార్జున నమ్మినట్టుగానే జనవరి 14న విడుదలయిన ‘నా సామిరంగ’ పర్ఫెక్ట్ సంక్రాంతి సినిమాగా పాజిటివ్ రివ్యూను అందుకుంది. కలెక్షన్స్ విషయంలో కూడా దాదాపు బ్రేక్ ఈవెన్‌కు చేరుకుంది. ఇప్పటికే దేశవ్యాప్తంగా ‘నా సామిరంగ’ రూ.41 కోట్ల కలెక్షన్స్‌ను సాధించినట్టు సమాచారం. మూవీ ప్రీ రిలీజ్ ఈవెంట్‌లో ఎక్కువగా మాట్లాడని నాగార్జున.. సక్సెస్ మీట్‌లో మాట్లాడతానని మాటిచ్చారు. ఆయన మాటిచ్చినట్టుగానే సక్సెస్ మీట్‌లో తరువాతి మూవీ అప్డేట్‌ను ఫ్యాన్స్‌కు అందించారు.

క్లారిటీ లేదు..

సక్సెస్ మీట్‌లో తన స్పీచ్ పూర్తయిన తర్వాత చివర్లో ‘వచ్చే సంక్రాంతికి కలుద్దాం’ అని స్టేట్‌మెంట్ ఇచ్చారు కింగ్ నాగార్జున. దీంతో వచ్చే సంక్రాంతికి నాగ్.. తన తరువాతి సినిమాను సిద్ధం చేస్తున్నారని ఫ్యాన్స్ ఫిక్స్ అయిపోయారు. ఇలా తనకు వర్కవుట్ అయిన విడుదల తేదీని వదలకుండా.. ప్రతీ సంక్రాంతికి ఒక సినిమాను దించేలా ఉన్నారని కొందరు ఫన్నీ కామెంట్స్ కూడా చేస్తున్నారు. ప్రస్తుతం నాగార్జున.. అప్‌కమింగ్ సినిమాలపై పెద్దగా క్లారిటీ లేదు. శేఖర్ కమ్ముల, ధనుష్ దర్శకత్వంలో తెరకెక్కుతున్న మూవీలో నాగార్జున ఒక కీలక పాత్ర చేస్తున్నట్టుగా ఇప్పటికే అధికారికంగా ప్రకటించారు మేకర్స్. అది తప్పా.. ఫుల్ లెన్త్ హీరోగా ఆయన ఎవరితో సినిమా చేయాలనుకుంటున్నారు, అసలు దర్శకుడు ఎవరు లాంటి వివరాలు బయటికి రాలేదు.

తండ్రిని గుర్తుచేశారు..

విజయ్ బిన్నీ దర్శకుడిగా పరిచయమయిన ‘నా సామిరంగ’ చిత్రంలో నాగార్జున.. విలేజ్ లుక్‌లో కనిపించారు. దీంతో తన తండ్రి నాగేశ్వర రావును గుర్తుచేసుకున్నారు అక్కినేని ఫ్యాన్స్. ఇందులో నాగార్జున మెయిన్ హీరోగా నటించగా.. అల్లరి నరేశ్, రాజ్ తరుణ్ లాంటి యంగ్ హీరోలు సెకండ్ హీరోల పాత్రలు పోషించారు. నాగ్‌కు జోడీగా కన్నడ బ్యూటీ అషికా రంగనాథ్ నటించింది. సినిమా విడుదల అవ్వకముందు పలు కారణాల వల్ల అషికాను ట్రోల్ చేస్తూనే ఉన్నారు ప్రేక్షకులు. కానీ ఒక్కసారి మూవీ విడుదలయిన తర్వాత అషికా పర్ఫార్మెన్స్‌కు చాలామంది ఫిదా అయిపోయారు. పక్కింటమ్మాయి పాత్రలో అషికా ఒదిగిపోయిందని ప్రశంసించారు.