Shah Rukh Khan: షారుఖ్ ఖాన్‌పై వస్తువులు విసిరిగొట్టేవారు, మగాళ్లు అసూయపడేవారు - జానీ లీవర్

Johnny Lever: బాలీవుడ్ సినిమాలతో ఫేమస్ కామెడియన్‌గా గుర్తింపు తెచ్చుకున్నారు జానీ లీవర్. ఆయన షారుఖ్‌తో కలిసి ఎన్నో సినిమాల్లో నటించగా తాజాగా పలు ఆసక్తికర విషయాలు పంచుకున్నారు.

Image Credit: Bollywood Direct and Filmfare/Twitter

Johnny Lever about Shah Rukh Khan: బాలీవుడ్ బాద్‌షా షారుఖ్ ఖాన్‌కు కేవలం బాలీవుడ్‌లో మాత్రమే ప్రపంచవ్యాప్తంగా ఫ్యాన్స్‌ను సంపాదించుకున్నారు. ఇప్పటికీ షారుఖ్‌ను క్రష్‌గా ఫీల్ అయ్యే అమ్మాయిలు ఉన్నారు. షారుఖ్ కెరీర్ మొదట్లో ఎన్నో ప్రేమకథలతో ప్రేక్షకులను ఆకట్టుకున్నారు. ఇప్పటికీ ఆ ప్రేమకథలను ఇష్టపడి మళ్లీ మళ్లీ చూస్తున్నవారు ఉన్నారు. ఇక అప్పట్లో షారుఖ్ ఖాన్ క్రేజ్ ఏ రేంజ్‌లో ఉండేదని ప్రముఖ కమెడియన్ జానీ లవర్ బయటపెట్టారు. జానీ లీవర్, షారుఖ్ ఖాన్ కలిసి ఎన్నో సినిమాల్లో నటించారు. ఆయనతో కలిసి పనిచేసిన అనుభవాలను గుర్తుచేసుకున్నారు. అప్పట్లోనే షారుఖ్‌కు ఏ రేంజ్‌లో ఫ్యాన్ ఫాలోయింగ్ ఉండేదో రివీల్ చేశారు.

అసూయపడేవారు..

తాజాగా ఒక యూట్యూబ్ ఛానెల్‌కు ఇంటర్వ్యూ ఇచ్చారు జానీ లీవర్. అందులో షారుఖ్ ఖాన్ హీరోగా నటించిన ‘ఎస్ బాస్’ సినిమా ప్రీమియర్స్ కోసం లండన్ వెళ్లినప్పుడు ఏం జరిగిందో చెప్పుకొచ్చారు జానీ. లండన్‌లో లేడీ ఫ్యాన్స్ అంతా షారుఖ్‌ను చూసి చాలా ఎగ్జైట్ అయ్యారని ఆయన అన్నారు. కానీ వారి పార్ట్‌నర్స్ మాత్రం షారుఖ్‌ను చూసి అసూయ పడ్డారని గుర్తుచేసుకున్నారు. ‘‘షారుఖ్‌ను చూసి మగవాళ్లు అసూయపడేవారు. వారు షారుఖ్‌పై వస్తువులు విసిరేసేవారు. ఎందుకంటే వారి పార్టనర్స్ ఆయన్ని అంతలా ఇష్టపడేవారు. కానీ షారుఖ్ మాత్రం ఎప్పుడూ తన పని మీదే దృష్టిపెట్టేవాడు’’ అని తెలిపారు జానీ లీవర్. ఇక షారుఖ్ హీరోగా నిలదొక్కుకునే ప్రయత్నాలు చేస్తున్న సమయానికే జానీ లీవర్ ఫేమస్ కమెడియన్‌గా పేరు తెచ్చుకున్నారు.

అప్పటికీ అప్‌కమింగ్ మాత్రమే..

1991లో విడుదలయిన ‘బాజీగర్’ అనే చిత్రంలో షారుఖ్ ఖాన్, జానీ లీవర్ కలిసి నటించారు. ఆ సినిమాలో తనతో కలిసి పనిచేసిన అనుభవాన్ని గుర్తుచేసుకున్నారు ఈ కామెడియన్. ‘‘1991లో బాజీగర్‌లో కలిసి పనిచేయడం మొదలుపెట్టాం. తను అప్పటికే ‘రాజు బన్ గయా జెంటిల్‌మ్యాన్’ లాంటి కొన్ని సినిమాల్లో నటించాడు. కానీ నేను అప్పటికే ఫేమస్ అయిపోయాను. షూటింగ్ సమయంలో కూడా నేనే చాలామందికి తెలుసు. నేను అప్పటికే స్టార్, షారుఖ్ ఖాన్ అప్‌కమింగ్ మాత్రమే. మేము ఒకరినొకరం బాగా అర్థం చేసుకునేవాళ్లం’’ అని చెప్పుకొచ్చారు జానీ లీవర్. షారుఖ్, జానీ కలిసి ‘కరణ్ అర్జున్’, ‘బాద్‌షా’, ‘బాజీగర్’, ‘కభీ ఖుషీ కభీ ఘమ్’ వంటి చిత్రాల్లో నటించారు. వీరి ఆన్ స్క్రీన్ కామెడీకి ప్రేక్షకులు ఫిదా అయిపోయారు.

ఇద్దరి కాంబినేషన్ అదుర్స్..

మూడు దశాబ్దాలకు పైగా బాలీవుడ్‌లో పోటీ లేని కామెడియన్‌గా వెలిగిపోయారు జానీ లీవర్. గత కొంతకాలంగా ఆయన సినిమాల్లో కనిపించడం చాలావరకు తగ్గిపోయింది. మరోవైపు అప్‌కమింగ్ యాక్టర్‌గా తనతో కలిసి పనిచేసిన షారుఖ్ ఖాన్.. సూపర్ స్టార్ అయిపోయాడు. ఇప్పటికీ వీరిద్దరి కాంబినేషన్‌కు ఫ్యాన్స్ ఉండడంతో షారుఖ్ హీరోగా నటిస్తున్న సినిమాల్లో జానీ లీవర్‌ను క్యాస్ట్ చేసుకోవాలని మేకర్స్ ఆశపడుతుంటారు. ఇక ఇటీవల షారుఖ్ ఖాన్ ‘డంకీ’ అనే చిత్రంలో నటించి క్లీన్ హిట్‌ను సొంతం చేసుకున్నారు. డిసెంబర్‌లో థియేటర్లలో విడుదలయిన ఈ చిత్రం.. తాజాగా నెట్‌ఫ్లిక్స్‌లో స్ట్రీమింగ్ ప్రారంభించుకుంది. ‘డంకీ’ కోసం మొదటిసారి రాజ్‌కుమార్ హిరానీతో చేతులు కలిపారు షారుఖ్ ఖాన్.