Vaishnavi Chaitanya: పెళ్ళిళ్లలో డ్యాన్సులు చేసేదాన్ని, ‘బేబీ’ క్లైమాక్స్‌లో నిజంగా ఏడ్చేశా: వైష్ణవి చైతన్య

'బేబీ' సినిమాతో ఓవర్ నైట్ స్టార్ గా మారిన హీరోయిన్ వైష్ణవి చైతన్య తాజాగా ఓ ప్రముఖ యూట్యూబ్ ఛానల్ ఇంటర్వ్యూలో పాల్గొంది. ఈ ఇంటర్వ్యూలో సినిమా విషయాలతో పాటు తన వ్యక్తిగత విషయాలను సైతం పంచుకుంది.

Photo Credit: Vaishnavi Chaitanya/Instagram

షార్ట్ ఫిలిమ్స్ తో కెరియర్ స్టార్ట్ చేసి కేవలం ఒకే ఒక్క సినిమాతో ఓవర్ నైట్ స్టార్ అయిపోయింది వైష్ణవి చైతన్య. యంగ్ హీరో ఆనంద్ దేవరకొండ తో ఈమె నటించిన 'బేబీ' సినిమా ఏ రేంజ్ లో సక్సెస్ అయిందో చెప్పనక్కర్లేదు. సాయి రాజేష్ దర్శకత్వం వహించిన ఈ మూవీ బాక్సాఫీస్ వద్ద సుమారు రూ.90 కోట్ల గ్రాస్ కలెక్ట్ చేసి సరికొత్త రికార్డులు క్రియేట్ చేసింది. ముఖ్యంగా సినిమాలో వైష్ణవి తన యాక్టింగ్ తో అందరి చేత ప్రశంసలు అందుకుంది. చిరంజీవి, అల్లు అర్జున్ లాంటి అగ్ర తారలే ఈ తెలుగు అమ్మాయి నటనకి ఫిదా అయిపోయారు. ప్రస్తుతం 'బేబీ' సక్సెస్ ని ఎంజాయ్ చేస్తున్న వైష్ణవి తాజాగా ఓ ఇంటర్వ్యూలో మాట్లాడింది.

ఈ ప్రోమోలో 'బేబీ' విషయాలతో పాటు తన వ్యక్తిగత జీవితానికి సంబంధించి అనేక విషయాలను పంచుకుంది. తెలుగు అమ్మాయిలకు ఇండస్ట్రీలో అవకాశాలు ఎక్కువగా ఉండవు అనే భయం ఎప్పుడైనా కలిగిందా? అని యాంకర్ అడగ్గా.. "ముందు మనం ట్రై చేస్తేనే తెలుస్తుంది కదా.. అవకాశం వస్తుందా రాదా అనేది. వాళ్లు వీళ్లు చెప్పారని ట్రై చేయకుండా ఉంటే ఎలా? కానీ ట్రై చేస్తే రాదు అనేది ఏదీ లేదు" అంటూ చెప్పింది. తాను యూట్యూబ్లో వీడియోలు, షార్ట్ ఫిలిమ్స్ చేసేటప్పుడు కాస్ట్యూమ్స్ చేంజ్ చేసుకోవడానికి కూడా సరైన ప్లేస్ ఉండేది కాదని వైష్ణవి తెలిపింది. అక్కడున్న  వాష్ రూమ్స్ కెళ్ళి కాస్ట్యూమ్స్ చేంజ్ చేసుకునేదాన్ని అని పేర్కొంది. ‘‘అది మా అమ్మ చూసి, అసలు ఎందుకు చేస్తున్నావ్ ఇలా? వదిలేసేయ్ ఇవన్నీ అని చెప్తూ ఏడ్చేసింది’’ అని తన జర్నీ గురించి చెప్పింది.

"ఓ మూవీలో చిన్న క్యారెక్టర్ ప్లే చేస్తున్నప్పుడు మనకి కారవాన్స్ లాంటివి ఏవి ఉండవు. ఆ సమయంలో నేను రెస్ట్ రూమ్ యూజ్ చేసుకోవాలి. అప్పుడు పెద్ద ఆర్టిస్టులు ఎవరుంటారో వాళ్ళ దగ్గరికి వెళ్లి, మేడం మీ రెస్టు రూమ్ యూజ్ చేసుకోవచ్చా? అని అడిగినప్పుడు వాళ్లు అవమానించారు. నేను కెరీర్ స్టార్ట్ చేయకముందు 10th క్లాస్ లోనే ఫ్యామిలీ రెస్పాన్సిబిలిటీస్ తీసుకున్నా. అప్పుడు కుటుంబాన్ని పోషించడానికి బర్తడే ఫంక్షన్స్, పెళ్లిళ్లు, ఈవెంట్స్ లో డాన్స్ చేసేదాన్ని. అలా ఒక రోజు మొత్తం డాన్స్ చేస్తే నాకు 700 రూపాయలు ఇచ్చేవారు. అది తీసుకెళ్లి మా అమ్మకు ఇస్తే మా అమ్మ ఏడ్చేసింది" అంటూ తన కుటుంబ పరిస్థితి గురించి చెప్పుకొచ్చింది.

సినిమాలో ఇంటిమేట్ సీన్స్ చేసేటప్పుడు మీ పేరెంట్స్ తో ముందే మాట్లాడుకున్నారా? అని వైష్ణవిని యాంకర్ అడగ్గా.." అసలు షూటింగ్లో ఇబ్బంది అనే సిచువేషన్ ఏం లేకుండా సీన్ అంతా కంప్లీట్ చేశాను. అవన్నీ మా పేరెంట్స్ కి అప్డేట్స్ ఇస్తూనే ఉన్నాను. నిజానికి అలాంటి సీన్స్ చేయాలంటే చాలా కష్టం. కానీ అది నా జాబ్. కాబట్టి చేయాలి" అని తెలిపింది. బేబీ సినిమాలో ఎమోషన్స్ సీన్స్ చేసినప్పుడు గ్లిజరిన్ వాడరా? లేక నిజంగానే ఏడ్చారా? అనే ప్రశ్నకు బదులిస్తూ.." క్లైమాక్స్ సీన్ లో నేను గ్లిజరిన్ తీసుకోలేదు. మ్యూజిక్ పెట్టమని డైరెక్టర్ ని రిక్వెస్ట్ చేశా. మ్యూజిక్ స్టార్ట్ అయింది నా పక్కనే ఆనంద్ అలా నిలబడడాన్ని చూసి నిజంగా ఏడ్చేశా" అని చెప్పింది.

ఇక సక్సెస్ మీట్ లో ఆడియన్స్ అరుపులు, కేకలు వింటుంటే షాక్ అయ్యాను. వీళ్లంతా నన్ను పొగుడుతున్నారా? తిడుతున్నారా అనే డౌట్ కూడా వచ్చింది. ఆ సమయంలో నీ జర్నీ నువ్వు స్టార్ట్ చేయచ్చు అనే కాన్ఫిడెన్స్ నాలో వచ్చింది" అంటూ చెప్పుకొచ్చింది. అయితే వైష్ణవి చైతన్య ఇంటర్వ్యూ ప్రోమో చూసిన కొందరు నెటీజన్లు 'ఆ ఇంటర్వ్యూలో వైష్ణవి తెలంగాణ స్లాంగ్‌లో మాట్లాడటంపై కామెంట్స్ చేస్తున్నారు. గతంలో ఆమె అలా మాట్లాడేది కాదని, కావాలనే అలా మాట్లాడుతోందని అంటున్నారు. ఆమె ఫేక్ తెలంగాణ స్లాంగ్ వాడుతోందని కామెంట్స్ చేస్తున్నారు.

Join Us on Telegram: https://t.me/abpdesamofficial